نهاية الإستفزازية

عرس

........ Timescape........

[سهى ]

واكفه كدام المرايا اتامل كل تفاصيل بدله عرسي وشكلي وتفاصيلي بحيث احس كلش مقتنعه بكل التفاصيل سعادتي ما اكدر الاحد انطيها الاحد شكد تمنيت هاليوم منو يصدك عقد قراني وعرسي كله باسبوع باسبوع واحد وراح اصير على ذمة شخص من اني طفلة اشوفه حلمي

ابد مجانت الفتره الي راحت سهلة من وره مايا كلش تمردت وزادت بعنادها وخاصه وياي واعتقد كلنه نعرف السبب وسام داتريد توصللنه رساله انو ما اريده جنت اتمنى اني واختي عرسنه بنفس اليوم رغم محاولات وسام المستميته وياها بس ابد مفااد وياها وبقت مصرة انو لو يصبون وسام ذهب ما اخذه

احترمنه رغبتها وهي اساسا باخر فتره بعد ما شافت وسام ايس دخلت بطور الاختفاء بحيث اغلب وقتها بغرفتها تدرس حتى خطبتي عقد قراني ابد منزلت ولا اجتي لان خطية عدها امتحانات واساسا الي مجنه متخيلي ابد انو تطلع الاولى بالمرحلة الاولى وهالشي انطانه حافز انو منضغط عليها اكثر ونتركها على راحتها حتى بالكي هالسنه هم هيج

اختي تغييرت وكلنه تغيرنا جانت هالسنه كفيله انو تخلي الكل ناضج واعي ويشوف الحياه من منظور ثاني مردت عرسي بقاعه رغم انو ميار ابد مناقشني ومعارض اي تفاصيل كلي شنو الي تردي سوي ومعليج

ردت بمكان عام مثل حديقه نحجزها حتى يكون احلى وكلشي بسيط حتى مقبلت اروح مركز ردت بالبيت تجي الماكيرا وبدلتي ردتها من تركيا وبيبي ابد ممانعت بحيث كلمتها وهي تكلي لو تردين نسوي العرس هناك غاد هم نسوي بس امري جان شعوري كلش حلووو دخلت رنا للغرفه واني داشوف نفسي بالمراية

رنا : ها حبي كملتي تره وسام خابر كال راح يجي
سهى : اي ماعندي شي وانتو
رنا :كاملين
سهى : خوما هم مايا نازل عليها ملك الشطارة اليوم ومراح تجي للعرس مثل الخطبة والحنة
رنا : لا لتخافين اصلاً بدلت قبلنه وخلصت هم وداتنتظر ويه الاهل جوه

سهى: يلا لعد خلي انزل اني هم
رنا : اساعدج بشي
سهى : لا عمري البدله كلش خفيفة مثل مردتها
رنا : سهىىى طالعه تجنننين فدوةةة
سهى : يروحي يوم الالج والي بالج حصراً

رنا :عيع الله ليكولها امشي امشي سديتي نفسي
نزلت رنا قبلي واني نزلت وراها على كيفي بايه بايه عماتي وبيبيتي كلهنننن كامن يهلهلن ويصلون على محمد احسني مثل الفراشة الطايره الي السمه ابد مواسعتها نزلت افتريت كدامها
سهى : حلو مو

كلهم ايدو والفرحة جانت اطير من عيونهم الكل باركلي لمحت اختي واكفة وياهم صحتلها اجتي هي باوستني وباركتلي بس جان واضح كلش هي تعبانه
سهى :بيج شي

مايا : لا بس يمكن منشوله جسمي احسه تعبان
سهى : سلامتج حبيبي اخذتي دوة مو الله عليج لا تتحججين وتكولين تردين تبقين تره كلش صرتي متوحده عمي وسام عافج بحالج اطلعي من التوحد الي زرعتي نفسج بي باوعت على لبسها جان لبسها معبالك رايحة عرس عبالك رايحة دوام جامعه بس رغم هذا هي كلش انيقه وحلوه يعني هالبس كلش منطيها جاذبيه وحضور وقوة