نهاية الإستفزازية

حضن بعد الصيام

كتله : على الالوان الي خالتهن بوجهي لا تخاف هسه يخترعون وميباوعون بعد
لاحضته ابتسم وكال : بالعكس طالعه حلوه ففوتي جوه قبل مياكلوج بنضرتهم
حسيت كلبي يدك الف وابتسامتي طلعت لا ارادي مني وهو عافني

ميار / يلا اني اترخص طبي جوه
راح هو واني بعدني متصنمه احسه لزم ايدي مو مجرد انطاني علاكه اني متاكده حسيت لمسه خفيفه وحتى وهو يبتسم بغمازاته ويكول طالعه حلوه شكله الجديد وصوته وشخصيته كانو داحبه من جديد مع العلم جنت اكول احس دفنت مشاعري مال مراهقه بس كلشي تبدل بدقايق قليله اجتي سمر

سمر / الحقير لعد ليش خلاني اجي اذا انطاهن الج
مايا / يدري بيج مثل الصخله تجين تركضين بس يشمرلج حشيش

سمر :دستقري يالبقرة هو منو الي اكل الحشيش اني لو انتي الي راحتله تركض واخذت العلاكه
باوعتله وعفته وطبيت جوه وهي بقت تضحك انطيت السفريات العمتي رانيا ورجعت ركصت لمن الله كالي بس بحيث احس خسرت على الاقل ٥ كيلو

وسام جاب خالتي العروس وسهى وسهى طالعه تجنن بس من فكرت كلت همزين مقبلو يخلوني اروح اني لو رايحه جان مشفت ميار منا لليل واجه عمو رضا ديحني العروس واجه وياه وسام وحتى عمو علي وبيبي بقيت ادور مصيبتي بس ماكو بينهم طاحظك حتى البيتك متجي وسام جان ديصور بيهم وبالعرسان

بيتهم جان المطبخ وبصفه الاستقبال ابوابهم منفصله والمطبخ بي درج يصعد للطابق الثاني اني رحت للمطبخ كلت بالكي المحه باوعت من شباك المطبخ وباب الشارع مفتووح وهو ولد واكفين بره وبابا هم وياه ناس واكفين

بقيت اباوع حتى نسيت نفسي مدري شكد بقيت اباوع الى ان شفت ابويه اشر وديحجي وياه وهو اجه طب للمطبخ ركض وكبل صعد حتى مشافني على كد ما يركض فضول اخذني وصعدت وراه صوت الكعب مالتي يطلع صوت من صعدت صارت كدامي بفد ٢٠ خطوه غرفه بابها مفتوح وضواها مشتغل تقربت قبل لا اوصل سمعته يصيح سمرر وين المسدس مال خالي محمد اني وكفت بالباب هو ابد مباوع يمكن عباله سمر شفته مدنك يمد ايده جوه الجربايه رجع كمل كلامه كال خليته جوه ليش ماكو

[ميار ]

حياتي كلها توقفت المدلل تحولت حياته ١٨٠ درجه تغيرت الدرجه صرت ما اعرف نفسي ومرات اخاف من نفسي احس نفسي صرت مثل الوحش الهايج الي ميكدر يتقبل احد وحش صعب احد يسيطر عليه

الانتظار حسيته سبب من اسباب غسل عقلي ٣ سنين واني انتظر ابويه وماكو اي خبر مرات افقد كل امل واكول كتلو ممعقوله عايش ممعقوله كلبه ينطي ما يسمع صوت عائلته كل هالفتره وانوب زادت عليه من حسيت بمسؤليه عائله صارت براسي

اني اختصاصي هندسه ميكانيك والحمد الله من كملت نقلي ورجعت للجامعه واحد من اصدقاء خالي علي اشتغلت عامل عنده وهو ميكانيكي جان هالشي فرصه الي هم اتعلم واستفاد منها بدراستي وهم اكدر اصرف على اهلي