نهاية الإستفزازية

الجلب العضاج كتلناه

باوعت على غرفه عمتي احس عيني دمعت احس من راحت ضعت اني يمكن هي محبتني كد محبت سهى ويمكن فرحانه بزواج ابنها من سهى بس اني حبيتها هواي جانت طيبة

مايا : لا ميحتاج اي غرفه اخذها اني افتر بالهول متعوده اضل امشي من اقرا واذا اريد انام ساعتين من ارجع من الدوام وهيانها غرفه عمتي اقرب شي للهول

ابد معترضت سمر واصلا اخذتني الغرفه عمتي وكالت نامي وارتاحي لعد اني ما جذبت خبر نمت كبل كعدت احس اراحيت هوايه الغرفه مريحةةة احس بحنان بدفو بكلشي حلو بحيث كمت متحمسه حتى اقره

طلعت للهول شفت سمر واكفه بالمطبخ داطلع من الثلاجه مهتميت اجتي شايله صينية بيدها خاله فواكه وعصير طبيعي مسويته هي وخلتها على الميز

سمر : مايا انتي مو غريبه قبل لا تنامين كلتي متشتهين تتغدين من تجوعين تاكلين فهاي خفايف واذا جعتي المطبخ مو بعيد واني صاعده فوك اي شي تحتاجي صيحيلي

هو من جهه احبها ومن جهه اكرها بس رغم هذا ادري بيها طيبه وتعاملني عبالك تعامل بنتها الصغيرة خلت وصعدت فوك شربت العصير وفعلا كعدت اقره الى ان صار الليل اجه اخويه ورجعت وياه للبيت وحتى سمر اجتي ويانه اليوم جر الثاني والثالث وميار وسام صارلهم اسبوع من راحو واني تعودت كبل انزل البيت عمتي من الدوام

سمر حتى نسخه المفتاح الي عند سهى انطتها الي رجعت بهاليوم تعبانه بقالي امتحان واحد واخلص والجماعه بعد ٤ ايام ويجون وامتحاني عكب باجر رجعت دكيت الباب ما فتحت سمر كلت لعد يم اهلي بعدهي مراجعه لان البارحة اني وياها رحنه الاهلي

فتحت الباب انفتح بسرعه يعني ما مقفول كلت يجوز موجودة بس نايمة اني على كد متعودت هنا حتى ملابس جبت الي وكمت من ارجع ابدل وانام ومرات مالكي سمر يم اهلي فتعودت بدلت ودخلت غرفه عمتي وقتت المنبه على الاربعة العصر حتى اكعد ابلش اقره ونمت

[ميار]

الحياة ابد محاولت تنصفني او يمكن اني الي استسلمت للامر الواقع جنت احتاج امل صغيررر امل يعفيني من كلشي من راح ابويه محسيت بغيبته امي سدت مكانه وكدرت اتعود واتقبل الحياه ويمكن حتى كدرت اعتمد على نفسي فكلت يمكن الله راد يخليني اعتمد على روحي واعرف المسؤليه بغيبة ابويه

من ماتت امي حسيت روحي نهدمت روحي الي جانت ساندتها حسيت تهدم الامان والحنان الي يحيط اما مايا فجانت احاسيسي الها مو مجرد امان وحنان بس على الاقل امي اعرف راحت الدار حقها بس مايا موجوده

امي هدمت الامان بداخلي ومايا كسرت هالروح تركت نفسي عايش على الهامش كل الي اتمناه امل صغير ايامي صارت مثل كل يوم مجرد روتين يمكن فرق قبل لا ازوج عن هسة قبل جنت حر اكدر احلم واتمنى وعندي امل اما حاليا حتى اذا حاولت احلم اكول مريد اظلم بختها السهى