نهاية الإستفزازية

الدفنة

[ميار]

ومن وخرت عنه كال النه راح شويه بعد راح تفوتون تشوفون امكم هاي اخر مره تشوفوها سمر باعيلي خالي ما اريد صريخ ما يجوز تصرخين ابد خوش خالي هي تبجي هزت راسها خله ايده على جتفي وكال وانت سبعي لا تضل هيج ارفع راسك مايلوكلك الكسر خلي امك تفتخر بيك

اني احس ماعندي طاقه كلام ابد اشرتله براسي احس نفسي شون الطفل الي ضاع بالسوك ويدور يريد امه هذا حالي بس الفرق اني امي راحت بعد ما ترجع لا صوتها ولا حجايتها ولا حنيتها ولا ضحكتها ماعندي بعد احد يسهر على راسي من اتمرض وماعندي بعد احد يواسيني من يشوفني مكسور وماعندي احد بحنيتها ابد

اجه خالي محمد كال مريد صراخ راح تفوتون تشوفوها وشدد على سمر شوفوها واطلعو رحت اني واختي جان المنظر ابد ابد ابد ابد مينسي جانت امي خاليها على شي عبالك مثل المصطبة ولافيها بابيض من فوك ليجوه عبالك مومياء ما طالع من وجهه بس عيونهاوخشمها وحلكها حتى حنجها وكصتها لافي

اختي رادت تروح تلزمها عاط بيها خالي محمد وكلها مايصير تلزم بعد غسلوها وصاح خالي محمد عليه كال يلا بعد خالك اخذ اختك واطلع اجتي مره خالي اخذت سمر وطلعت سمر تبجي اني مطلعت هاي امي وهاي اخر مره اشوفها بيها

كلتلها يمة سويتيها صدك رحتي وخليتينه كسرتيني يا يمة يمه محتاجج والله احس نفسي ضايع مالي احد يمة هو اليطيح ملزوم يطيح من كلهن ليش الله هيج عاقبني ودلالي كله طلع عليه اتمنى لو ما مدلليني ومطيحين حظي يمكن جان تعذبت بصغري وربي يعوضني بشبابي بس اني صارلي بالعكس احس روحي تاييه يمة والله كلشي تردي اسوي بس لا تخليني بحسره شوفتج

[وسام ]

جان ميار واكف على بعد مسافه من عمتي يحجي المكان محد بي بس عمامي وابويه وميار عمي محمد طلعهم كلهم ميار بقى يحجي جان كل كلمه يحجيها تبجينه احنه حتى عمي محمد بجه اباوع لابويه وعمي رضا منتهين

محد كله كافي وهو يحجي وعبالك امه كدامه حجه حجه حتى على اشياء بطفولته تذكرهن وكلام لامه وهو يعاتب امه ويلومها عاد عمي رضا راح حضنه وبلش ابويه وعمي يلفون بعمتي ويخلوها بالتابوت وهو يباوع عليهم يكلها يمه انتي ردتي قماش ابيض يتخيطلج ثوب ترحين بي عمره مو جفن للتابوت

جان كل حجايه يحجيها يمرد كلبنه بيها بس مابيدنه شي عليه خلصو وطلعو عمتي زوروها الامير علي وشيعو عمتي الشهيده ورجعنه للمكبرة مال النجف الموقف جان حيل صعب وخاصه الميار وسمر من خلو عمتي بالحفرة ميار جيت للحفره وحضن امه ويصيح ادفنوني وياها اني وياها رحنه سويه نزور ادفنونه سويه وجلب ما رضه يطلع ويجر بالتراب وينزل عليهم