ငြိမ့် (COMPLETED)

Chapter-2

Unicode

သူ၏ အမှန်တရား

"မေမေ ကတော့ တကယ်ကို လုပ်ချင်တာ
လုပ်နေတော့တာပဲ"

ခေတ်မှီဆိုဖာခုံများနှင့် သန့်ရှင်းသပ်ရပ်လှသည့် ဧည့်ခန်းသည် မမကြီး၏
စိတ်ပျက်နေသည့် အသံအောက်တွင် ငြိမ်သက်မှုအငွေ့အသက်များ ပြည့်နှက်နေလျက်ရှိသည်။

အသက်ရှူသံများပင် သိသိသာသာ
ကြားနိုင်သော ဒီအခန်းထဲတွင်
သူတို့ တစ်မိသားစု အကုန် အတူတူ
ရှိနေကြတာဖြစ်ပြီး အားလုံးပေါင်း
၅ ယောက်ပင်။

မိခင် ဒေါ်မိုးမိုးဌေးဟာ သူမ၏
မျက်နှာကို မော့လို့နေပြီး ဘယ်သူ့စကားမှ
နားထောင်မည်မဟုတ်သည့် ဟန်နှင့်ဖြစ်သည်။
ရှားညိုရောင် ရင်ဖုံးအင်္ကျီ နှင့် နက်ပြာရောင်
ပါတိတ်ကိုဝတ်ဆင်ထားသော
အသက်၆၀ကျော် အမျိုးသမီးကြီးသည်
သူမ၏ နှဖူးပြင်‌တို့ထက်က အရေးအကြောင်း
များပင် ညှိုးငယ်လောက်အောင်
သွက်လက်နေဆဲ။

စိတ်သိပ်မာတဲ့ ဒီအမျိုးသမီးကြီးက
သူမ ဘဝမှာ ဘာမှလိုလေသေးမရှိခဲ့။
ဆရာမတစ်ယောက်ဖြစ်ခဲ့ပေမဲ့
မျိုးကြီးရိုးကြီးဖြစ်သည့် သူမက
အရွယ်ကောင်းတုန်းမှာပဲ အလုပ်ထွက်ခဲ့ကာ
ခင်ပွန်းဖြစ်သည့် ဦးကျော်နိုင်၏
လုပ်ငန်းများကိုသာ ကူညီပေးခဲ့ရသည်။

သူမ ဘဝမှာ ဘာမှမလိုအပ်ခဲ့ဖူးဘူး။
သားသမီး သုံယောက်မွေးဖွားခဲ့ပြီး
ထူးချွန်တဲ့ သူမရဲ့ သားသမီးတွေကြောင့်
သူမ တို့ ဇနီးမောင်နှံနှစ်ယောက်လုံး အမြဲတမ်း ခေါင်းမေ့ာနေခဲ့ရသည် ချည်းသာ။
တစ်ဦးတည်းသော သူမရဲ့သားငယ်က
လိင်တူသဘောကျသူဆိုတာကို
မသိသေးခင်အထိပေါ့။

ဆိုဖာပေါ်တွင် အသာထိုင်ရင်း
ငြိမ်သက်နေသော သားဖြစ်သူကို
သူမ တစ်ချက်လှမ်းကြည့်လိုက်မိသည်။
ရှင်းလင်းကြည်လင်တဲ့ သားက
အမြဲတမ်းအေးစက်နေခဲ့ပြီး
ခန့်ညားလှတဲ့မျက်နှာထက်မှာ
ပါးချိုင့်လေးပေါ်သည်အထိ ပြုံးနေတာမျိုး
သူမ မမြင်တာ နှစ်‌ပေါင်းများစွာကြာခဲ့ပြီ။
ခင်ပွန်းသည်နှင့် သားဖြစ်သူကြားက
ကြီးမားတဲ့ သွေးအေးမှုတွေကြားမှာ
မိသားစုဆက်ဆံရေးက သားပါလာသည်နှင့်
ပိုမိုတိတ်ဆိတ်ပြီးရင်း တိတ်ဆိတ်လာခဲ့ရသည်။