اتجازيني حبا

24.

#اتجازيني_حباً
.
.

انا اكثر احد يتحمل ويسكت ويعدي
بس بعد كل هذن يبتعد بگدهن كلهن.

.
.

كرار :

صبح الصبح واشرقت الشمس واني عيني ماغمضت ولا عرفت طعم النوم من غير الصداع وارتفاع بالضغط صار عندي وافكاري تضرب اخماس باسداس

افكر شنو الطريقة الي اخليها ممكن تحجي بيها الحقيقة .... اي الحقيقة لان مستحيل ريام ترفضني وتطعني بهالبساطة

شفت الساعة ب6 و طلع الضوة بعد
كمت سبحت وكلت انزل اسويلي فنجان كهوة مرة
بلكي اصحصح ويخف وجع راسي

نزلت، بعدني بالدرج بس احس اكو حركة بالبيت استغربت منو كاعد من الصبح

شفت امي دخلت من المطبخ بركضة لغرفتها وكأنه اكو شي بيدها تخفي طلعت للكراج ماكو احد بس اكو ماي بالعتبة مال البيت، يمكن واكع او من صوندة التبريد

تركتة ودخلت للبيت رحت لغرفة امي ماموجودة رحت للصالة لكيتها واكفة قريب الشباك وشايلة ايدها وتحجي بصوت كلش خافت مدري شنو

كرار : يمة شعندج كاعدة ! شدتسوين ؟!
ساجدة : ( بخوفة و جفله) يمة بسم الله منين طلعتلي انت هففف بسم الله بسم الله

كرار : شايفة جني شبيج من الصبح
ساجدة : مابية شي شبية ، ااااا صليت الصبح وداادعيلكم دعاء الام مستجاب ( تقربت عليه وخلت ايدها على صدري ) دعيت الله يبرد كلبك يايمة البارحة مردتني مرد عليك ماتستاهلك بس ماسمعت كلا.... ( قاطعها وبعد ايدها عنة )

كرار : هاي من شوكت صعد عندج هرمون الامومة وحسيتي نفسج ام وتدعين لولدج ؟؟! وليش تنمردين علية مابية غير العافية والي اريدة اسوي مو صغير حتى اسمع كلامج

ساجدة : ابقى ابقى هذا راسك اليابس يجي يوم وينكسر وتجي تكلي كلامج صحيح هسة تشووووف
كرار : هي وتحجي تركتها وصعدت حتى كهوة ماشربت وبقيت افتر بغرفتي

افكر بكلامها هسة وكلامها البارحة ومرتاحة وتوزع ابتسامات واجتي ببالي ريام وكلامها وكلام لمياء وعركة امي البارحة الصبح كمت اربط شي بشي توصلت لنتيجة انه امي الها ايد بالصار اذا ما الله كذبني

بس يكون ريام تحجي الحقيقة
انتبهت صارت ساعة ٧ ونص رأساً بدلت وطلعت توجهت للامام الكاظم سلام الله عليه زرت وصليت صلاة الزيارة وبقيت كاعد بالضريح اتأمل الشباك والضريح و الراحه اللي تسكن جوف الشخص بهالمكان

فجأة اسمع صوت رجال ، كبير يطلع عمرة خمسينات صاح بصوت تقشعرلة الابدان وتجبر الجسم ينتفض والروح تفرفح وتكون اذنك صاغية الة وتنزل دمعتك على دموعة العزيزة و عبرة صوتة وكسر خاطرة، الكل انصت اله و سمع كلامه و حس بوجعه