اتجازيني حبا

31.

#اتجاريني_حباً؟!
.
لو كُنتِ أغنية
لأسمعتُكِ لأهل الحي والجيران
للحدائق والزهور
لأسمعتُكِ لأصدقائي وأنا أقول
" هاكَم اسمَعوا أغنيتي شگِد حَلوة ".... باقر

.
.

عاهَدَها قائِلًا :
" عَهدًا عَلي إن أزهَرَ شَجر التّين سأتَخلَّى عَنكِ "
لَم تَكُن تَعلَم أن شَجر التّين لا يُزهِر ♥️..!  قيصر
.
.
قيصر :
حسيت الصبح على صوت المنبه ساعه 7 ونص
كمت على كيف شفت ظهري ما نغزني
اي زين حمدلله، نمت اون من الوجع بسبب الحركه الغلط البارحه

نزلت شفت كرار و لمياء يتريكون صبحت عليهم و كعدت وياهم تريكت

لمياء : قيصوري اترك يمك محمد اليوم

قيصر : تركي بس ب10 ونص لازم اطلع اخوج مضبط الحجز مال الكيك

لمياء : زين جيبه وياك لبيت عذورة لان اني اليوم عدهم ارتب الكعدة مال الحنه

كرار : متجين للمعرض يعني

لمياء : لا حبيبي بس محضرة صينيه الحنه و التجهيزات عماد صانعك كال هو يجيبها ب12 لهناك حت ما انخبص بيها من البدايه ارتب كلشي بعدين يوصلون الغراض

كرار : هااا الله كريم

قيصر : اخوك داوم اليوم

كرار : اي كال يروح يسوي اجازة لعرسه

كملنه اكل و كامت لمياء كفت السفرة غسلتهن
و سوت صينيه صغيرة ودتها لأمي وياها خلت دواها
صعدت فوك و كرار اخذها يوصلها بعدها يروح للمعرض

اخذت محمد يمي بالغرفه نيمته
حاوطته بالمخاد حت ما يوكع و دخلت سبحت

طلعت خليت جل لظهري و حاولت اسوي مساج لنفسي بس حسيت خربتها كلها لان رجلي اذتني أكثر، غسلت ايدي و كعدت حت هاي ما فلحت بيها
يوميه اشبع قهر على نفسي و ادعي و اتضرع لرب العالمين انه يشافيني بأقرب وقت و ارجع لحياتي الطبيعيه

فتحت فيس و كعدت اكلب بالبرامج
لحد ما مضت الساعتين هاي
كمت بدلت و اخذت محمد و نزلت
لمحت امي بالمطبخ مدري شتاكل عفتها و طلعت

رحت اخذت الكيك و وصلته لبيت عذراء
دخلتني عمتي رحبت و سهلت بيه

بثينه : تفضل اكعد عمه هسه اصيح البنات

قيصر : لا عمه رايح بس جبت الكيك موصي عليه باقر للحفله و محمد جبته لأمه

بثينه : هسه اصيحها

دخلت صاحت لمياء اجت اخذت ابنها

بعدنه واكفين دخلوا براء و غيث زوجها
تسالمنه و هو مبين عليه متفاجئ من وجودي
يمكن ما يعرف الصله البينه، وسمع احجي وي ام عذراء و اكول عمه