اتجازيني حبا

18.

#اتجازيني_حباً ؟!
.
.

• متباركين بعيد الغدير الأغر ، جعلنا الله واياكم من الثابتين على ولايه أمير المؤمنين عليه السلام .

‏اللهمّ طاقَة، طاقَة بها نَعيش، ونتحمّل، ونرضَى، ونَتأقلَم ونتقبّل، ونهوّن، ونتجَاهل، ونفوّت، ونغامِر، ونجازِف، ونصبِر ونصبِر ونصبِر.
.
.

عذراء :
مرت الايام وصبحنة الجمعة يوم عقد براء
الصبح بـ٦ حسيت رحت كعدت براء وزينب حتى يروحون للصالون يتجهزون لان يجون الرياجيل يعقدون بـ١٢ وحفلة المهر بـ٤ العصر 

تريكو وياسر وصلهم ورجع هم كمل شغلات مطلوبة منة تاجير كراسي وجاب مشاريب وجاب عشة المهر جاهز همزين خلصنة من هوسة الطبخ والتحضير

براق اجتني بـ٨ كعدنة كملنة اخر اللمسات للكوشة والميز وجهزنة غراض العقد
صينية البخت نسميها ( خنچة )
صينية البياضات
القرآن
المراية زينتها هادئة شحلاتها
الشمعة كبيرة هم زيناها
شموع صغيرة
حضرنة سجادة جديدة اختاريناها لون اخضر الخضار حلو وخير ان شالله
براق جابت وياها ياس
جهزنة الهيل والقفل والزئبق

امي نبهتنة عالحرمل نسوي صوة صغيرة حتى من تجي براء تشيلة من العين والنفس لان هي منا حلوة وهسة اكيد بعد احلى راح تصير

كملنة كلشي تقريبا
براق كالت خلي نعدل نفسنة حيجون الناس
صعدنا للغرفتي كعدنة نرتاح شوية براق ذبت حجابها ومبين عليها التعب سودة عليه ، هم دوام و هم وياي

عذراء : حياتي بروقتي تعبناج ويانة نجازيج بعرسج ان شالله
براق : يمعودة انتو اهلي ، ان شالله هم عايزة ماتجازوني وماتجوني 😏
عذراء : هههههه ولج قابل شكلت اني اجي اجي لتخافين
براق : تدرين البارحة باقر طلب مني اتحول لبيتة بعد متخبل لأن مطولتها لحد الآن
عذراء : يااا ، بس صدك يحجي
براق : اي والله
عذراء : شنو يعني انتي ماتريدين ! لو شنو احجيلي
براق : عذراء خايفة من امة هواية ماريد اعيش اللي عشتيه

عذراء : وشعليج بامة ، انتي بيتج وحد وباقر خوش ولد ويحبج واكيد ما يخليج تتاذين من اي احد .. براق باقر حبج لسنين مستحيل يقبل احد يأذيج

براق : هو اني اهون على نفسي بهالكلام ، وكاظم هم مااكدر اعوفة وحدة صح خطب بس بعد مو هسة يتزوج
عذراء : تنحل وداعتج لا تشيلين هم شي
براق : اكو شي ثاني 😔
عذراء : شنووو 😳

براق : عذراء اني هم بنية من حقي احلم واحقق احلامي مثل كل بنية ، من حقي افرح واعيش ايام حلوة تبقى بالذاكرة حلوة ، عذراء تعرفين طبيعة علاقتي بباقر وشلون عقد علية وكل فرحة ما شفت ولا حسيت وتمنيت اموت بدل ماافرح بهيجي مناسبة وحدث مهم بحياتي ، يعني شوفي هسة هاي خبصتكم وفرحتكم وترتيباتكم لخطوبة براء اني انحرمت منها ، مااريد انحرم من فرحة العرس هم