اتجازيني حبا

30.

#اتجاريني_حباً؟!
.
لا نحتاج أن نكون مبهرين ، عاديتنا تُدهش
.
لمياء :

العصر دنروح لبيت باقر علمود سلامة قيصر مريت لامي نطيتها خبر انه راح نطلع ردتلي بعدم مبالاة
طلعنا و رجعنا ما دخلت عليها لان اكيد ننغث ودنيا ليل ما بينا حيل للمشاكل

كعدت الصبح نزلت لكيت غرفة امي مفتوحة
مديت راسي لغرفتها و انصدمت بمنظرها وحالتها
واكعة بالكاع لا ايد ولا رجل بس عيونها مفتوحة فتحة قليلة كانما تريد تغيب روحها و كلشي ما تكدر تحجي

بلا وعي كمت اصرخ واصيح على كرار والطم على رجلي مااعرف شسوي احس ايدي ورجلي تربطن ، اجة قيصر و وراه كرار ، ركض كرار عليها

كرار : يمة فتحي عينج شوفيني يمممة ويطبطب على خدها ، رفع راسة علية ، شلون وكعت !

لمياء : م ماادري اجيت لكيتها واكعة

قيصر : روحي لبسي حجابج بسرعة

كرار : ماما تسمعيني !

قيصر : شوف نبض اكو

كرار : اي اكو بس حالتها ما تطمن

قيصر : كوم خلي نطلعها ناخذها ، يلة لميااااااااء

نزلت ركض الجبة مفتوحة وشالي شامرتة شلون مجان ، الولد تعاونوا على امي خلوها بالسيارة وطلعنا للمستشفى تلكتنا براق استلمتها

شوية وطلعت كالت الضغط والسكر مرتفعات.
نطوها ابرة وهسة يرادلها تحاليل

بقينا متفاجئين لان امي ماعدها سكر
و الضغط و مو دائماً يرتفع كللللش قليل
و هم ما يوصل لهالمواصيل

بقت امي ساعة بالعناية والحمدلله حست
بس ممنوع عنها الكلام لبين ما يجي الدكتور وتبين التحاليل ، اجوي ياسر وبراق سوة وبيدهم نتائج التحاليل

براق : هاي التحاليل استلمتها هسة ، عدها فقر دم النسبة ٧ نازل هواية ، وعدها دهون بالدم وعدها التهاب مجاري بولية ٣ صلايب جراحة وعدها رمل ناعم بالمثانة ونسبة الزلال مرتفعة شوية

باقر : يا الله هذني كلهن ! ليش هيجي شنو السبب

ياسر : المجاري البولية كلش طبيعية بالعراقيين لان لاماي ولا اكل صحي عدنا بس لازم نبقى نراقب ونفحص كل فترة والظاهر الحجية هاملة الجانب الصحي

اما الدهون او الكولسترول بالنسبة لعمرها لازم حمية ونظام غذائي الانسان بس يعبر عمر ال٤٠ بعد لازم ينتبه للتغذية ويقلل اللحوم والدهون

وفقر الدم المسبب الرئيسي حاليا هو الكلة لان بيها اضطراب والنسبة قليلة وغير مقبولة لازم بالقليل تصعد لل١١ او ال١٢ ، وهسه لازم اترخص ادخل اشوفها

لمياء : اي فدوة روحلها

براق : لمياء حبيبتي لاتخافين عمة مابيها شي ان شالله