اتجازيني حبا

7.

#أتجازيني_حُباً ؟!
.
.
ما يؤلمنا ليس الألم نفسه ،
ما يؤلمنا أننا لا نستحق كل هذه القسوة 🖤!
-
.
.

سراء :
مضت اربع سنوات من آخر مرة شفت بيها واثق
من يوم حادث قيصر رجل عذراء
بقه وياي يومين و سافر
و بعد ما عندي عنه اي خبر
هسه اني مرحله خامسه
آخر امل الي اشوفه بحفله التخرج
وإذا ما إجه
معناها هذا هو إنتهى

حلقتي كل ما اكول بعد ما البسها
هو ماكو المن باقيه بيها
بس گلبي ما ينطيني
حتى صديقاتي اللي وياي بالجامعه ميصدكون مخطوبين لان هو راح ومرت سنين واني هنا
ما فد يوم سأل أو كال شلونج
عايشه لو ميته ما يدري عني شي

يقهرني آدم من يكولي هو ميريدج بعد
لحد الآن يكرر عليه انه هو يريدني
لحد الآن عندة امل بيه
رغم دائما اصدة و اكوله اني على ذمه رجال
بس يجرحني بكلماته لان صدك هو وينه !!
ليش هيج سوة بيه يعني
من صديته و ما ردت احبه تخبل عليه
لو بس ممقرب لو بس ممتمادي وياي
جان قمعت مشاعري هاي كلها
بس شنو انسه !!
من يحضني لو يبوسني لو يكولي ساطرتني
كلامه و احلامه اللي تلاها على مسامعي وين اوديهن و شلون اكدر انساهن
شلون انسه الليله اللي نامها بغرفتي !
قيدني بيدة و كل شوي ياخذ نفس من رگبتي و يملي ريته و يبوس راسي
حسسني بعمق مشاعرة و شكثر يحبني گد مردد احبج
معقول هذا كله جذب !!
معقول بس غايته اتعلق بيه يعني ؟؟
هذي الذكريات كلها قاتلتني على مدار هاي الاربع سنوات المرت .. كل ثانيه و دقيقه تهاجمني
زين مو اني بت عمه لو غريبه جان نطيته عذر
جان كلت يمكن لعب عليه و هو عندة احد رغم هم ما يشفعله هذا السبب بس جان ارتاحيت شوي

زين مو اني سراء اللي كبرت كدامه ؟
من واني دخلت اعداديه و هو صار يغار من اقل حركه
كل شي جنت منتبها عليه و متجاهله هالشي حتى اكمل طريقي و دراستي و ما التهي بالحب و عثراته و هاي هسه وگعت وگعه دايخه شلون اطلع منها بلاه
ليش هيج الحب صعب !
مشاعر من تغزونه
تنطينه ايجابيه و سعادة عميقه
بس بعدين نشوفها عائق كبير

لو ما اهلي ، يمكن انهي حياتي
احس حالي مجنونه كثر ما اعاتبه وهو غايب
كثر ما انطيه أعذار و متأكدة الف بالميه هو ما يستحقها
ليش هيج يا ربي بس فهمني
بس نطيني اشارة
اريد اعرف هو يريدني او لا
اريد اعرف هو عايش لو لا 😭
من اربع سنين وهو ماكو

حتى عمي يسألني عنه
كل فكرة احنه نتواصل وي بعضنه
يعاتبني إلي لان ابنه ما يسأل عنهم
يعاتبني واني اريد ابنه بس حتى اعاتبه
تعبت واني ادبر كذبات
عمو عندة شغل
عمو عندة دورة جديدة ملتزم بيها
عمو هو كالي بس اكمل اتصل بيهم
عمو هو هم مشتاقلكم هوايه بس صعب الإتصال

و بعدين ! عمو اني ضعت بسبب ابنك
الاوائل اللي جنت احلم بيها
تبخرت
الشهادة اللي فنيت نفسي علمود احصلها بجدارة
تبخرت
الحلم اللي بتداه و زرعه بداخلي
تبخر
مبقالي بس هالمشاعر اللي تضعفني يوم بعد يوم
شنو احجيلك عمو !!! شنو اللي اكوله ؟