မနက်ခင်းနေရောင်ခြည်က မှန်တံခါးတွေမှတဆင့် အခန်းထဲကို ဖြာကျလို့လာသည်။ မနေ့ကတစ်နေ့လုံး ရှား အပြည့်အဝ အနားယူလိုက်ရသည်မို့ အဖျားငွေ့တို့ကမရှိတော့။ ရှားကို ကောင်းကောင်းအနားယူဖို့ ပြောတဲ့ခိုက်ကိုတော့ မနေ့မနက်ပိုင်းက သူ့ကိုဆေးတိုက်ပြီး သူအိပ်ပျော်သွားတဲ့ အချိန်ထဲက မတွေ့မိတော့။
မိုးထိဘွားဆိုသူက ရှားကို အရိပ်ရိပ်တကြည့်ကြည့်နဲ့ စောင့်ကြည့်နေတာကြောင့် ရှား အခန်းထဲမှာပဲ တစ်နေကုန်ငြိမ်နေရသည်။ သူကိုယ်တိုင်ကလည်း လှုပ်လှုပ်ရှားရှား သိပ်မလုပ်နိုင်သေးတာကြောင့်။
ဒေါက် … ဒေါက် … ဒေါက်
အိပ်ရာနိုးနေပေမယ့် မထသေးပဲ မျက်နှာကြက်ကို အကြောင်းမဲ့စိုက်ကြည့်နေစဉ် အခန်းတံခါးခေါက်သံ ကြားရတာကြောင့် ရှား ထ,ထိုင်လိုက်သည်။
“ ဟုတ်ကဲ့… ”
ရှား အသံပြုလိုက်တော့ မနေ့ကတစ်နေ့လုံး ပျောက်ချက်သားကောင်းနေသည့် ခိုက် ဖြစ်နေသည်။ အပေါ်ပိုင်းက အဝတ်အစားကပ်မနေပဲ အောက်ပိုင်းကတော့ ရေချိုးခန်းသုံး တဘတ်တစ်ထည်ကို ပတ်ထားသည်။ ရှားကိုတွေ့တော့ တစ်ချက်ပြုံးပြရင်း
“ ကိုယ့်ကြောင့် နိုးသွားတာလား ”
“ မဟုတ်ပါဘူး… နိုးနေတာကြာပါပြီ .. မထဖြစ်သေးတာ ”
“ ဟုတ်ပါပြီကွာ… စုတ်ဖွားလေး ”
ရှား ဆံပင်တွေကိုတစ်ချက် လာဖွသွားပြီး ရေချိုးခန်းဝင်သွားသူကို ကြည့်နေရင်း ရှားကိုယ်တိုင် မသိလိုက်ခင်မှာပဲ နှုတ်ခမ်းစူမိသွားသည်။
“ ငါ့ခေါင်းကိုများ လာဖွသွားသေးတယ်… လုပ်ချင်သလိုကို လုပ်နေတော့တာပဲ … လူကို သူမွေးထားတဲ့ ကလေးများထင်နေလား မသိဘူး ”
ရှားတစ်ယောက်တည်း ရေရွတ်နေရင်း ခြုံထားတဲ့စောင်ကို အကြောင်းမဲ့ရိုက်နေမိသည်။ ရှား ကုတင်ပေါ်က မဆင်းရသေးခင်မှာပဲ ခိုက်က ရေချိုးခန်းထဲ ပြန်ထွက်လာသည်။ bathrobe ကို လျှော့ရဲရဲဝတ်ထားတာကြောင့် ရင်ဘတ်တစ်ဝိုက်က အထင်းသားမြင်နေရသည်။
YOU ARE READING
My Step-mom's EX becomes My HUSBAND [[ Complete ]]
General Fictionသတိုးရှန်ခိုက် (Thatoe Sxan Kxite) ဥတုရှားမြတ် (Utu Sxarr Myat) (Own Creation) Starting Date •• 26/8/2021 Ending Date •• 18/10/2021