Code Chasers

Vol. 8 Code Seventy Four: "A Gentlemen's Agreement"

Code Seventy Four: "A Gentlemen's Agreement"

*****

Hindi sa lahat ng pagkakataon ay nasasaksihan ng sinoman ang pananahimik ng mga alon sa dagat pagkatapos ng malakas na bagyo. Hindi araw-araw ay nagagawang masaksihan ng sinoman kung paano humalik sa dagat ang mamula-mulang sinag ng papalubog na araw. Pambihirang pagkakataon sana ang mga ganitong tanawin para pagnilayan ang mga bagay-bagay para kina Faust, Lala, Grau at Fillan kung hindi lang din sana nagkataon na tumatakbo sila para sa kanilang mga buhay.

"Masuwerte pa tayo dahil hinayaan nila tayong makaalis ng buhay sa islang iyon." Hindi man kaaya-ayang pakinggan, pero aminado si Faust na nagmukha silang mga kaawa-awang daga na nagsipulasan para makaiwas sa mataas na baha. Hindi niya estilo ang tumakas sa totoo lang, at wala rin sa plano niya ang magmukhang duwag at mahina lalo na sa harapan ng mga nilalang ng kalangitan. Pero wala siyang pagpipilian, lalo na't sugatan at nag-aagaw-buhay si Grau at wala namang malay si Fillan.

"Pero hindi tayo pwedeng manatili rito sa gitna ng dagat ng matagal..." ito ngayon ang malaking inaalala ni Lala. Kung sila ni Faust ang tatanungin, magiging ayos lang sila na magpalutang-lutang sa karagatan ng ilang araw na walang pagkain at tubig hanggang sa may dumating na tulong o makadaong ng ligtas ang sinasakyan nilang maliit na bangka sa dalampasigan. Pero sina Fillan at Grau? Hindi siya sigurado kung tatagal pa si Grau ng isang buong magdamag, o si Fillan na makakatagal na walang tubig at pagkain sa loob ng isang linggo o higit pa. "Kailangan ni Grau ng tulong. Hindi maganda ang lagay niya ngayon. At si Fillan..."

"Alam ko, alam ko!" Bahagyang tumaas ang boses ni Faust pero nagawa parin niya itong pagmukhaing kalmado. "Kaya ko silang ialis dito at ilagay sa ligtas na lugar, pero matatagalan pa bago makabalik ang kalahati ng lakas ko. Halos ako ang sumalo ng mga laban kanina! Walang nagawa ang inutil na 'to kundi ihara ang sarili niya't magpakamatay na isang bayani!"

Totoo ang lahat ng sinabi ni Faust, at walang naging pagtutol doon si Lala. Lalo na sa parte kung saan si Faust ang halos nagtanggol sa kanila mula sa mga kalaban at kay Fillan.

"Pasensya na kung wala akong masyadong naitulong sa inyo..." Aniya sa nananahimik na Sinner. "Kung hindi sana dahil sa akin at sa kapangyarihang nasa loob ko, hindi sana mawawala sa sarili niya si Fillan at...."

"Teka, teka!" Udlot ni Faust sa pagsesentimyento ni Lala para sa kaniyang sarili. "Lilinawin ko lang, wala akong sinisisi sa nangyari. Hindi kita sinisisi. Wala kang kasalanan sa pag-aamok ng Decipher."

"P--pero siya at ako ay..."

"Siya ang Decipher." Binigyang-diin ito ni Faust kay Lala. "Natural na sensitibo siya sa Kapangyarihan ng mga Salita na nakapalibot sa kaniya. Ginawa siya para ariin ang kapangyarihang 'yon, kaya anumang reaksyon mula sa iyo at sa iba pang bahagi ng Code ay...normal na reaksyon."

"P--pero..."

"Shuuush!" Nag-uumpisa nang mairita ng seryoso ang Sinner sa pagpupumilit ni Lala na isa siya sa mga responsable sa nangyari. "Ayaw ko sa lahat 'yong paulit-ulit ako. Kaya kung pwede lang manika---"

"Lala."

"Ha?"

Bahagyang umiwas ng tingin si Lala para maikubli ang hiya sa kaniyang mukha.

"May pangalan ako. Kung gusto mong makinig ako sa iyo, tawagin mo ako ng maayos sa pangalan ko."

"Ayaw ko nga." Sabay isnab ng Sinner sa dalagang manika. "Hindi ko kayo kaanu-ano kaya bakit ako mag-aaksaya ng laway para lang banggitin ang mga pangalan n'yo?"

"Aba't...ikaw na Sinner ka! Sige, bahala ka kung anong gusto mong gawin. Para namang may magagawa pa ako para d'yan sa nakakainis mong ugali."

"Masasanay ka din." At kinuha ni Faust sa gilid ng bangka ang sagwan para umpisahan ang manu-manong paglalayag nila sa karagatan. "Dahil mukhang matatagalan pa ang pagtsatsaga mo na kasama ako sa munting paglalakbay na 'to."