" ကိုကိုက ဋီကာ့ကိုချစ်နေတာတဲ့ .."
" ဘာ .."
" လင်းက ပြောတယ် .. ကိုကိုက ဋီကာ့ကို "
" တော်တော့ဋီကာ .."
" ............... "
အထိတ်တလန့် ပိတ်ပင်တားဆီးလိုက်မိသည့်အသံက
အခန်းအတွင်းမှာ ခပ်ကြိတ်ကြိတ်ပဲထွက်ပေါ်လာသည် ။
ဋီကာ့မျက်နှာ ဘယ်လိုရှိမယ်မှန်းမသိနိုင်အောင်
လူသစ်နေ၏မျက်နှာမှာ အပူငွေ့တို့ လွှမ်းခြုံနေသည် ။
ဖုံးကွယ်ထားတာတွေကို တူးဖော်ခံလိုက်သူလိုမျိုး
အခုချိန်မှာ လူသစ်နေ၏စိတ်တွေသည် တည်ငြိမ်မှုမဲ့နေ၏။
လှုပ်ရှားလွန်းနေသည့်စိတ်အစဥ်ကို
အံကိုတင်းတင်းကြိတ်ကာ ထိန်းနေရသလို
အစွန်းဆုံထိ ငြင်းပယ်သွားဖို့ကိုလည်း သူ့ဦးနှောက်က
သူ့ကို အရှိန်ပြင်းပြင်းနှင့် အချက်ပေးနေခဲ့လေသည် ။
ဒီနေရာမှာ သူ့ကိုညှင်းပမ်းနှိပ်စက်ပြီး
မေးမယ်ဆိုလျှင်လည်း အဖြေသည် ပြောင်းလဲစရာမရှိ ။
သတ္တိမရှိဘူးလို့ပဲဆိုဆို သူ့ဘဝမှာ
တဇွတ်ထိုးလုပ်ပြစ်ဖို့အခွင့်အရေးဆိုတာ
ဘယ်တုန်းကမှ မရှိခဲ့သလို သူကိုယ်တိုင်သည်လည်း
ကိုယ့်စိတ်ခံစားချက်ထက် ကိုယ်ချစ်ရတဲ့မိန်းကလေးကို
ပိုပြီးတွေးပေးတတ်သူမို့ လူသစ်နေဆိုတဲ့ သူ့အတွက်တော့
အချစ်ဆိုတာ လျှို့ဝှက်ချက်တခုရယ်ပါပဲ ။
တသက်လုံး လျှို့ဝှက်သိမ်းဆည်းသွားရမယ့် အရာ ။
ထာဝရမြှုပ်နှံသွားရမည့်
သူ့ဘဝ,ရဲ့ မျှော်လင့်ချက်အိပ်မက် ။
" လင်းပြောတာ တကယ်မဟုတ်ဘူးမို့လားဟင် "
" ကြံကြံဖန်ဖန်ဋီကာရယ်
ကိုကိုဋီကာလေးကိုချစ်တယ်ဆိုတာက .. "
" ညီမလေးလို .. ကိုကို့ရဲ့ညီမလေးလို .. "
" .............. "
" အဲ့ဒီလိုမဟုတ်လားဟင် "
သူ့စကားကို ဝင်ထောက်လိုက်သည့်ဋီကာလေးကြောင့်
လူသစ်နေမှာ အတန်ကြာသည်အထိ တိတ်ဆိတ်သွားမိသည်။
YOU ARE READING
ပန်းပျိုးလက် ))) 🥀 (((
Romanceကိုကိုက မင်းရဲ့ရေသောက်မြစ်လေးပါဋီကာ မင်းဘဝလေးသာ စိုပြေစိမ်းလန်းရမယ်ဆိုရင်ဖြင့် ငရဲပြည်အထိလဲ ထိုးဖောက်ဆင်းသွားရဲပါရဲ့ဋီကာရယ် 🥀 #လူသစ်နေ ( ပန်းပွင့်မချိုး ပန်းပင်ပျိုး မြတ်နိုးသူသာ ပန်ထိုက်စေ ) 🥀 ကိုကိုက မင္းရဲ႕ေရေသာက္ျမစ္ေလးပါဋီကာ မင္းဘဝေလးသာ စ...
