سبحان الله وبحمده سبحان الله العظيم ♡
الوجد ببيت ابوها تحديداً غرفتها جالسه على السرير وهي تناظر ارجاء الغرفه الي وحشتها من زمان عنها التفتت تشوف ايبادها الي بمكانه من راحت مع فيصل
اخذته وفتحه واول مافتحت الايباد طلعت لها صوره امها وابوها وبينهم الوجد الصغيره
سوت زوم على الصوره وتتأمل ابتسامتهم وعائلتهم الصغيره وقرون الوجد الصغيره
دمعت بضيق : افف وش صار لكم عشان تفترقون الله لايسامح الي كان سبب بتفرقتكم
فيصل دخل الغرفه وتكى على الباب بهدوء وهو يراقب دموعها الي على خدها وتناظر الايباد وكان متاكد مليون بالميه انها تعاين صور امها مع ابوها
الوجد ماحست بوجود فيصل لانه دخل بهدوء وصمت تنهدت ورفعت راسها وطاحت عينها بعيون فيصل الي واقف عند الباب
ماعطته اهميه ونزلت انظارها تشوف الايباد
فيصل توقع انها تهاوشه بس ماصار شي غير انها شمقت له وتجاهلت وجوده
رفع حواجبه بأستغراب من تجاهلها ونطق : تعاينين ويش؟
الوجد بهدوء وبرود وبدون لاتطالع عيونه نطقت : شدخلك؟
فيصل اتسعت عيونه بصدمه وتقدم وجلس على طرف السرير عندها ونطق : يوجعك بطنك ؟
عقدت حواجبها الوجد ولازالت منزله راسها تطالع الايباد : وشدراك؟
فيصل هز راسه بتاكيد لـ كلام العنود الي قالت له "طالع اظافرها والمناكير " : لابس حسيت
الوجد ماردت وصارت تقلب بأحدى برامج الماركات العالميه وتشوف احدث صرخات الموضه
نطق فيصل : انا اسف طيب
الوجد : قلت لي اسف مليون مرهه بس بكل مره تجرحني
فيصل : والله كانت نيتي اصلح بينكم !
الوجد رفعت راسها عن الايباد وحطت عيونها بعيون فيصل : مايهم اذا تصالحنا ولا ماتصالحنا ! وبعدين بكل مره توعدني انها اخر مره واسامحك ولكن تخذلني
فيصل تنهد : بس هالمره ماكنت قاصدهاا
الوجد اجتمعت الدموع بمحاجر عيونها : بكل مره تقول نفس العذر وتقارني بكل الناس ماقد حسستني اني ثمينه وغيررهم كلهم !
فيصل : لاتقارنين حبي لك بأي مخلوق انا حتى بغيابك احبك !
الوجد لامست قلبها هالجمله لكن استمرت تكابر ونطقت : قارنت وماقد ميزتني
فيصل : حبك غيررر ي وجديي حبك غيرر لاتقارني حبك بأحد لانك بتفوزينن
الوجد سكتت ونزلت راسها لان الدموع نزلت على خدها
تقدم فيصل لها وجلس قبالها على السرير ورفع يده السليمه لخدها يمسح دموعها : انا اسف وماتهون دمعتك علي قومي معي للمكان الي تبينه لو تبين باريس الحين وديتك
الوجد : مابغى لاباريس ولا لاس فيغاس ابغى ماتجرحني لو بالقليله ولو بالكذب ! وشيهانه مابغى صلحها اذا انت بتقول لها سامحيها مسكينه !
فيصل ابتسم وحط صبعه على انفه ونطق : على هالخشم ابداً اخر مرهه ولا ادخل بمشاكلكم مره ثانيه بس تكفين ارضي عليي
الوجد رفعت حواجبها : ي دلوع جدو تحسب كل الناس ترضى عليك بنفس اليوم ؟
ضحك فيصل من قالت "دلوع جدو " لان فعلاً فيصل دلوع جده رغم ان فيصل بالوقت الحالي يكرهه جده لكن جده مصر بحب فيصل وكان بصغر فيصل يسمونه دلوع جدو
فيصل : يلا عاد يصعبه المنال !
الوجد : مستحيل ارضى
فيصل : يلا عاد ي دلوعه البابا
الوجد : ولو تقول اسمائي الي احبها من هنا لبكرا مابغى ارضى !
فيصل : طيب يلا ي المجرمه الفيونكيه
قصده فيونكه لان يوم يمسكونها الشرطه كان على شعرها شرايط فيونكه
الوجد طالعت فيه من فوق لتحت ونطقت : ماني مجرمه
فيصل : الا مجرمه ونص وسرقتي قلبي
الوجد اخذت نفس : خلاص افكر بالموضوع رح الحين
فيصل : لو رحت بترضين؟؟
الوجد رفعت كتوفها : مدري افكر
فيصل : اجلسي فكري انا بجيب لك الهديه
الوجد اخفت ابتسامتها ونطقت بثقل : ماترضيني الهدايا
فيصل :ترضيك ترضيك اعرفك اناا
وطلع والفرحه مستوطنه قلبه يحس لو احد سالته اي سوال خاص ومحرج بيقول " ياقلبي احبك "
ضحكت الوجد بخفه من فرحته واستمرت تقلب بالايباد
،
فيصل جالس بحوض النياق يتنقى افضل ناقه بيهديها للوجد رضاوه لها !
حاط يده تحت فكه : احس انها تحب الناقه هاذي
حميد : وش تبي بها
فيصل : الحين النياق من نياقه ؟ لي ولا لك ؟
حميد : لك طبعاً
فيصل : خلاص فارقني خلني اتنقى
حميد معقد حواجبه من فيصل الغريب وكان حميد يترصد ويراقب فيصل عشان ينقله علومه للجد
فيصل كان داري ان حميد بياخذ العلم ويركض للجد ويعلمه وابتسم فيصل بخبث : بذبحها واكل لحمها انا ووجيد شرايك؟
حميد اتسعت عيونه : ايش ايش تبي عمي سلطان ينحرك بدالها؟؟
فيصل : مالك دخل لا انت ولاجدي بذبحها يعني بذبحها
راح حميد يركض يعلم الجد
ضحك فيصل لانه لعب على الجد هو مستحيل يذبح نياقه هو بس بيعطيها الوجد تصير لها تعتني فيها
اختار لها افضل ناقه عنده وابتسم : تفداك ي شيخه الناقه وراعيها
،
مجلس النفاق وشهادات الزور... مجلس الجد سلطان
الجد جالس ومعه فنجان القهوه ومندبله كبده من الفديو الي شافه : قومي صبي قهوه لارشقها بوجهتس الودر
قامت شيخه وصبت القهوه له ونطقت : سم يبه
ابو نواف وابو بتال مانو مثل الاطرش بالزفه مو فاهمين شي
الجد همس : ابتس انتي حمارتن درعا تصاوبين الولد ليش ليش ماصاوبتي الوجد!
ردت شيخه وهي تهمس : شدراني يبه كنت ابي الوجد بس فيصل البطل المغوار يدافع عنها
الجد : ابتس والله انتس تسذوب جربا انا شايف بعيد الفيصل عن الوجد مير انتس حولا ماتشوفين الدرب زين
سكتت شيخه ونطقت الجده عمشه : ابك علامك انت وياها تساررون كنكم حريمن مطلقات تتحدن على رجلكن
دخل حميد وهو طاير بالعجه : عمي عمي
الجد : لاحول ولا قوه الا بالله ماكان ينقصني الا انت اهرج وشعندك؟
حميد يلقط انفاسه لانه جاء يركض : فيصل فيصل
فز ابو نواف ونطق : وش فيهه
ابو بتال : عسى ماشر شفيه البناخي
الجده : ابك تهرج لارنك بذا العصا انثر سنونك
حميد : فيه ناقه بيضاء هذيك الي وصل سومها نص مليون عرفتها؟؟
الجد : ايي انجز تهرج خلعت قلبي
حميد : فيصل نحر الناقه
اتسعت عيون الكل لان هالناقه لها مقام يعني فلوس وحليب وحركات وش اكثر من كذا
الجد بعصبيه : تقوله صادق؟؟
حميد : ايي
ابو بتال : اخو العيال الحق على ولدك ي خوي
ابو نواف : ولدي يعرف الصح من الغلط مو بورع اطرده من مكان لمكان
الجد : قم الحق ولدك لاقوم افرم وجهه
ابو نواف : ي بوي النياق نياق الولد حنا مالنا كلمه عليه اذا الناقه ناقته يذبحها يبيعها يهديها حنا مالنا حق !
الجده : كلمه الحق تنقال وش لكم بالولد كيفه
الجد : ي اوادم الناقه سومها نص مليون كيف ينحرها بدم بارد!!
ابو بتال : والله يبوي ودي افزع لكن الناقه ناقته
الجد : هالحين اوريكم به
وقام الجد ومعه عياله والعامل ..
،
وسط الديره ..
مازن بالعبايه جالس على الكرسي ومعه قطعه كرتون يهوي على نفسه : ابوك يالحرر
شيهانه جالسه بالارض وفاكه اللطمه من الحر: مطلعنا بعز القوايل ويقول حر
العنود : اهخخ احس بموت حررر مو قادره اتحمل
جوري متعوده على الكرف بالقوايل وقاعده تقلب الاوراق
طبت حرمه عليهم ونطقق : سلام علاتس
ام جابر : وعليتس السلام امري شبغيتي؟
الحرمه : جيتس الاسبوع الي فات وقلتي لي تعالي بعد اسبوع
ام صبحي بلعت ريقها من عرفت هالحرمه هي الي زوجها متزوج عليها بالسر !
ام جابر نطقت وهي تكذب : اي اي عرفتس لكن رجلتس ماعليه خلاف يوم يومين يرجع لتس زي الفل وان مارجع ابد تواصلي معي بتوطى ببطنه وارجعه لتس لكن ملفه نظيف مافيه كيني ميني
الحرمه : طمنتيني الله يطمنتس ويوفقتس ويفتحها بوجهتس الحمدلله ي رب
ابتسمت ام جابر ونطقت : ابد ابد حنا لانقاذ العلاقات الزوجيه
ابتسمت الحرمه وراحت ونطق مازن : انقذتي حياتها لو انا كان ناثر لها العفش من طق طق ل السلام عليكم
شيهانه : انت مصيبه !
مازن : الله يستامحتس
العنود :يربي مقدر احس برجع البيت ميته حرر!
جوري : قبل تروحين بعطيتس مهمه اشتغلي فيها
العنود اخذت الورقه وماقرت وش مكتوب ونطقت : اسويها اليوم؟
جوري وهي مشغوله بالاوراق : ايي امه تبيه الان
العنود : اوك تمام
الجوري وزعت اوراق لكل ضحيه من ضحايا ام جابر لافراد العصابه عشان يخلصون الشغل بشكل سريع
اخذت العنود الورقه وراحت وهي تقرى الورقه كان مكتوب " رجل هادي غامض ماتعرفين وش هو يهبب وانا امه خايفه عليه والصدق ابيكن تشوفون وش يهبب لاني خايفه عليه احس هدوءه مروعني مو طبيعي عكس اخوه "
شافت صوره الولد وكان نوعاً ماء جميل لكن ماهتمت لانها ميته حررر قرت اسمه ومالاحظت انها تعرفه !
،
فيصل لازال بوسط حوض النياق "المراح" وهو كذا يبغى يجلس فيه ويراقب تصرفات جده!
جاء الجد طاير ووراه عياله نطق بعلو صوته : هو صدز الي سمعت؟
فيصل ببرود ونطق : الله الله صدق
الجد بعصبيه : استح على وجهك شنبك خاط وجهك تسوي كذا على بالك تقهرنا؟؟
فيصل طلع من حوض النياق ونطق : على بالي ؟ لا هو صدق انت انقهرت
الجد منجلط من برود فيصل : ولد انا جدك !
فيصل رفع حواجبه : توي ادري انك جدي تصدق؟
الجد تنهد بعصبيه : اعقل واغد رجال ولاتذبح الناقه !
فيصل كان يناظر جده بسخريه نطق الجد : هاذا وانت يدك وحده وعجعجت بنا كيف لو يدينك الثنتين وش تسوي بنا !
فيصل رفع كتوفه : يمكن ادفنك حي
الجد : لاحول ولاقوه الا بالله ابك انا شاك شاك بالوجد
فيصل احتدت ملامحه من طاريها ونطق بعصبيه : الوجد لاتجيب سيرتها على لسانك!
الجد : دامك تبي ماجيب سيرتها بشرط لاتذبح الناقه
فيصل : تتشرط ولا ماتتشرط الوجد لاتجيبها على لسانك
الجد مغبون من تصرفات فيصل وبروده
فيصل حط يده بجيبه : شفقت عليك وقررت اني ماانحرها
تنهد الجد براحه : ايي هاذا حفيدي
فيصل : عموماً بعطيك خبر بعطي الناقه للوجد
اتسعت عيون الجد بصدمه ونطق : شنهوو؟! انت وش تقول انت توحي وش يطلع من لسانك!!!
فيصل : اي افهم ومرتب الكلام بعد الناقه للوجد شئت ام ابيت
انجن جنون الجد وتقدم ومسك ياقه فيصل بعصبيه : اصح على نفسك !
فيصل هز راسه وهمس: لالالا شيل يدك لاعاد افضحك بين ربعك واهلك انك متهجم على حفيدتك
ابتعد الجد عن فيصل بغبنه وقهر وراح معصب ووراه عياله ضحك فيصل من شكل جده المعصب والتفت لـ حميد ونطق بحده : وانت مو كل طرف علم تروح تقوله تقول غارب سلقه !
حميد : سم
فيصل طلع من جيبه فلوس : قم جب من البقاله او من سوق الشعبي شرايط باللون الوردي
حميد اخذ الفلوس وراح وابتسم فيصل وجلس ينتظر حميد يجي عشان تكون الهديه مره وحده
تكى ينتظر حميد يجي طلع جواله يشغل نفسه وبعد فتره زمنيه او بالاحرى بعد ماانسلخ فيصل بالشمس حميد جاء
حميد مد الكيس ونطق فيصل : سنه؟
حميد : كان زحمه عند المحل
فيصل اخذ الكيس ونطق : اي زين
وراح حميد وتنحنح فيصل واتجهه بيت العم تركي المتواجده فيه الوجد وحط الشرايط الورديه بـ جيبه
،
العنود معها الورقه ومتجهه للمكان الي فيه الولد المطلوب من امه
لكن وهي تمشي تعرض لها ولد وهو يحاول يسرق شنطها
صرخت العنود : فكنيي ي مجنون !
سمع صوت صراخ بنت ورمى الزقاره من فمه واتجهه لمصدر الصوت وهو يشوف ولد يحاول ياخذ شنطه البنت تقدم وهو معصب واعطى الولد وحده على عينه وطاح الولد ونطق بدون لايلتفت : جاك شي ؟
بلعت ريقها العنود لان الرجل الي واقف قدامها نفسه الي موجود بالورقه
عقد حواجبه من انها ماردت : جاك شي؟
العنود بتوتر : لا
: طيب امشي معي ارجعك بيتك مايصير تمشين لحالك بأخر الديره !
العنود : مشكور ماتقصر
طاحت الورقه من العنود وانفتحت على المعلومات ونزل وشال الورقه وطاحت عينه على صورته واسمه ونطق : ليش معلوماتي عندك؟!!
العنود بتوتر : وضيفتي لازم اخلصها
: ماتروحين من هنا الا وانتي معلمتني ليش اسمي الرباعي عندك!
العنود : هات الورقه عاد بلا حركات اطفال !
حس على نفسه انه يتهاوش مع بنت مايعرف حتى اسمها ومد الورقه لها ونطق بهدوء : اسف
اخذت العنود الورقه ومن التوتر الي فيها قرت معلوماته كلها واخيراً قرت الاسم " فارس بن عوض ال حسين "
اتسعت عيونها بصدمه والتفت له ونطقت : انت ولد خال الوجد؟؟
فارس : الوجد بنت عمتي هند؟
العنود بصدمه : اخو مشاري؟؟
فارس عقد حواجبه : انتي مين وكيف عرفتي الوجد ومشاري؟
العنود دخلت الورقه بشنطتها ونطقت : معليش باي
وراحت وهي مسرعه خطواتها معقوله عند الوجد ولد خال بهالرجوله والشهامه والجمال والهيبه ولاحبته !؟
زم شفايفه فارس ورجع الاستراحه مع اخوياه
،
شيهانه لازالت متنكره ب الثوب واللطمه تمشي بالسوق الشعبي وحاطه يدينها بجيبها ورافع راسها للمساء وتغني : لايالرفيق الغالي المزي...
انقطعت الشيله من اصتدمت بواحد
نطق بـ: عورتني!
شيهانه كشرت : خكري استرجل!!
: معليش انا جاي من جده ومو عارف وين فيصل بن محمد
شيهانه : الله الله هاذا اخوي
يزن : ماشاء الله ماني عارف كم اخو لفيصل انا اعرف فهد ونواف انتا من وين طلعت؟ بعدين ليش عيونك عليها ايلاينر انتا مو اخو فيصل مثال الرجوله كيف تحط ميكب!
شيهانه ضربت راس يزن ونطقت : اعقب ي المايع تعرف انواع الميكب !!
يزن : ايوهه هنا تاكدت انك اخو فيصل من اعقب
شيهانه : هيه يالطيب انا بنت بنت صوتي مو مالي عينك؟!
بلع ريقه يزن ونطق : كيف بنت وانت لابس ثوب
شيهانه : فارقني بس لااتوطى ببطنك
يزن : احنا عارفين فيصل عصبي بس ماني عارف ليش حتى اخواته عصبيين !
شيهانه مستغربه كيف يزن وفيصل اجتمعو: بالله انت خوي فصيل ؟
يزن : ايوهه انا صاحبه الروح بالروح حتى اني اعرف زوجه اخويا الوجد
شيهانه : اعقب استح على وجهك والله يتوطى ببطنك فيصل ان نطقت اسمها
يزن : هو اوردي ضربني عساس غيران وكذا
شيهانه : تستاهل الوكاد يوجهه الفقر وش تبا؟
يزن : ابغى فيصل يعني اذا معليك امر
شيهانه : عان امرح مناك واضرب بعينك اليمين وامش سيده تحصل عمي مازن يدلك عاد
يزن : معليش بس ابغى ترجمه لكلامك دا
شيهانه : اهيب ولاتسدك الا ابك عان عان هناك
يزن : ايش يعني عان؟
شيهانه : تراك دابلن تسبدي
يزن : طيب امشي معايا نروح لفيصل
شيهانه : اعقبب وانا اخت نواف ! تبيني امشي معك بوسط هالديره؟؟
يزن : ايوه عادي ايش فيها؟
شيهانه كشرت : اشهد ان المرجله كايده
يزن : ترجمي لو سمحتي
شيهانه : اوحيني زين انت امش وراي على بعد اميال لاتمشي جنبي ولا وراي مره عشان الجماعه وكذا انت توحيني؟
يزن : اوحيكي
شيهانه بهمس : ياشيب عيني صدز
ومشت شيهانه وهي تلفت كل شوي تتاكد ان يزن ماضيعها بعدين استوعبت فهاوتها انها متنكره محد بيعرفها اذا مشت مع يزن بس لوهله حست ان اهلها عطوها الثقه مايصير تمشي جنبه
واستمرو على هالحال ..
،
"ام جابر وام صبحي لحياه افضل"
انتهى فتره الدوام وقاعدين يضفون عفشهم وشادين للمزرعه
،
فيصل دخل غرفه الوجد ونطق : عادك زعلانه؟
الوجد تكتفت : اي
فيصل تقدم وجلس عندها : طيب دندني وغني اختاري الهديه
الوجد : مابغى شي بس ابعد
فيصل : افا افا طيب تقومين الحين ولا؟
الوجد : مابغى اقوم ولا اروح ولا شي !
فيصل رفع حواجبه : مصممه انك ماتبين؟
الوجد : ايوه مابغى
فيصل : طيب
عقدت حواجبها الوجد وسرعان ماصرخت من شالها فيصل بحضنه وهو ماشي
الوجد : فيصل نزلنيي والله الحين يشوفنا جدي والله مانسلم منه
فيصل بأبتسامه : اتحداها كانه ولد ابوه يفتح فمه عليك والله لااقصه لسانه
الوجد : فيصل وش مهبب وش هالثقه الي فيك؟
فيصل مايبغى يتكلم بهالموضوع معها ونطق يضيع الموضوع : تمسكي لاتطيحين
تعلقت الوجد برقبه فيصل ونطقت : طيب نزلني والله اعرف امشي
فيصل : بعيد عليك المراح
الوجد : ايش المراح؟
فيصل : حوض النياق
الوجد بفرحه : الله من زمان كان نفسي اروح اشوفه بس كان بعيد مرهه بأخر المزرعه
فيصل ضحك ونطق : وهالحين تروحين له مثل الاميره
الوجد : وناسهه
ابتسم فيصل واستمر يمشي والوجد مصر تنزل لكن فيصل رافض
فيصل : وجيد خلاص قلت لا يعني لا
الوجد : فصيل خلاص قلت نزلني يعني نزلني
فيصل : بصريح العباره لا وستين لا
الوجد : بصريح العباره نزلني وميه نزلني
فيصل : تقلديني ؟
الوجد : تقلديني؟
فيصل : انا احب الوجد!
الوجد بثقه : مالومك يعني مين مايحبني
فيصل : انشهد ان الي ماحبك خسرانن
الوجد تسوي نفسها فاهمه عليه : خسرانن
فيصل ضحك من قلب ونطقت الوجد : ايش لايكون جبت العيد؟
فيصل : مو شعر يومنك تقولين اخر كلمه
الوجد : اما مو شعر ؟
فيصل : يصير شعر لعيونك ولايهمك
ابتسمت الوجد واخيراً وصلو المراح ونزل الوجد ونطق : ترارا
الوجد التفتت له ونطقت : ترارا ايش؟
فيصل وقف عند الناقه والناقه تلقائياً لفت رقبتها على فيصل ونطق : الناقه بحد ذاتها ترارا
الوجد عقد حواجبها ونطقت : الناقه واضح تحبك حبيتهاا
فيصل : يوهه نعيش انا وياها قصه حب دونها التاريخ
ابتسمت الوجد : يونسس بقول ل جومانه تكتب قصتكم
فيصل عقد حواجبه : جومانه مين؟
الوجد : جومانه الي قابلتني بالمستشفى وكتبت قصتنا
فيصل اتسعت عيونه ومسك راسه : فضحتنت يراسيي
الوجد ضحكت : لاتخاف قلت لها تطمس هويتنا
فيصل : الحمدلله
الوجد : ايوهه ليش جايبني هنا ؟
تقدم ووقف قبالها تماماً ونطق : هاذي هديتك
الوجد : وينهاا؟
فيصل : الناقه
الوجد تحت تأثير الصدمه والي طلع منها : هاه؟
فيصل ضحك ونطق : علامك؟ ناقه وصل سومها نص مليون
الوجد : ناقه؟ كيف اسيطر عليها ذيي انا كويس اسيطر عليك تجيب لي ثنتين من نسختك ليش؟
فيصل : اهخ يالقهر صرت ناقه بس يلا معليه نصير
الوجد : فيصل ستوب دقيقه وش اسوي فيها اخاف منها!
فيصل : لو تقولين سطوب من هنا لبكرا مافي سطوبات
الوجد ضحكت من نطقه : فيصل خلينا جديين شوي الناقه والوجد كيف تجي !
فيصل : شئتي ام ابيتي الناقه لك وجايب مع الناقه هديه
الوجد : ايش بعد اصدمني
طلع من جيبه الشرايط ونطق : عاني هذه تربطين اذان الناقه
الوجد ابتسمت بشر : اقدر اسوي لها مناكير؟
فيصل : يمديك بس تعطيك وحده تروحين لربي او تبرك عليك
الوجد عقدت حواجبها : كيف تبرك؟
فيصل : يعني تجلس عليك
الوجد بخوف : لايمه خلاص بموتت اذا جلست علي!
فيصل : اكيد بتموتين حبيبتي عشان كذا احترمي كونها ناقه
الوجد ضيقت عيونها : اذا ماحطيت للناقه بحط لك
فيصل كشر وضيق عيونه معها ونطق : سمعتي بـ تعقبين؟
الوجد كشرت بمزح : يعقب الي يقولها لي
فيصل صرخ بتعزيز لها : حييي عينها الداهيه وجيد
الوجد ضحكت وحط فيصل يده على كتوفها يمشيها للناقه
الوجد كانت مشغوله تسولف معه عن المناكير والشرايط كيف تركبهم على الناقه
صرخت الوجد من حست بالناقه قريبه منها وابتعدت ونطقت : يع فيصل لاتمزح معاي كذاا مره تخوف بشرتها جافه تحتاج عنايه !
ضحك فيصل ونطق : ايي عشان كذا عطيتك ياها تعتنين فيها
الوجد : نو ويت لو حطيت عليها مرطب تخلصه علي ومايبقى لي حاجه
فيصل : مادري وش تقولين بس اسلمي
الوجد : فيصل ماحبيتها مرهه كبيره مقدر لها
فيصل اخذ شريط ولفه حول رقبه الناقه ونطق : وش اسوي لك ابك اقول لك وش يرضيك تقولين مايرضيني شي قلت خلني اعطيك راس مالي تبين حوير؟
الوجد تخصرت : مابغى ناقه ابغى قطوه ! ايش يعني حوير
التفت فيصل لها بصدمه : تبين بسه؟؟؟
الوجد رفعت حواجبها بمعنى "ايوه" كشر فيصل بصدمه ونطق : غبيه انتي ؟ الناقه بـ نص مليون وتبين بسه بـ الف ريال !!
الوجد اتسعت عيونها بصدمه : انا غبيه؟؟ فيصل اوت
فيصل يحرك يده بيبرر لها : مو غبيه انا غبي بس خانني التعبير !
الوجد تكتفت : تبغى تراضيني جيب لي قطوه
فيصل حط يده على بطن الوجد ونطق : ماودك تجيبين لنا قطوه من بطنك ؟
رجعت خطوات لورا تبعد يده عن بطنها هي من الربكه مافهمت قصده توترت من يده : ايش يعني اطلع قطوه من بطني ؟!
فيصل : يعني تجيبين لنا بنت صغيرهه واعتبريها بسه
عقدت حواجبها الوجد من فهمت قصده وضربته بخفه : خير ماتفقنا كذا !
فيصل : اجل؟
الوجد تشتت انظارها وتحاول تصرف للموضوع : مدريي بس اذا تذكر ان الزواج على الاوراق
فيصل احتدت ملامحه لانه يكره كره هالسيره "زواجك على الورق "
تتلف اعصابه اذا احد ذكره ان زواجهم بدايته على الورق يمكن يذبح الشخص الي ذكره
فيصل انعمى من العصبيه ومسك فك الوجد وحطها على الجدار وكان قريب منها مره نطق بعصبيه : ي بنت تركي لاتجيبين هالسيره تحديني اقنعك ان زواجنا مو بس على الورق !
الوجد تطالع عيونه الحمرا وحواجبه المعقده ويده الخشنه على فكها الناعم خافت وقتها من قربه ومن عصبيته وبكت
فيصل كانت عيونه بعيون الوجد وعصبيته الف ولما شاف عيونها تدمع كأن دموعها غسلت عصبيته ! لان قلبه وحس على نفسه
شال يده من على فكها وحطها ورا راسها وسحبه لصدره يحضنها ويكرر ويعيد ويزيد ويغرقها بالاعتذارات
الوجد تبكي وتحاول تبتعد عنه
قدرت الوجد تبتعد عن حضنه ولكن فيصل مااستسلم وحط يدينه الثنتين حتى الي تعوره على وجهها ويمسح دموعها وينطق : اسف اسف ي وجدييي والله اسف نغزه شيطان تكفينن طالبك لاتبكين ولاتنزل دموعك تكفين
الوجد ماتقدر تمسك دموعها ونطقت بغصه : تخوفني كذا مابغى اعيش بخوف
فيصل كان يعض اصابع الندم وناسي الم يده الي اضطر يستخدمها : والله لو تبين اخذ القمر بين يديني حطيته بس لاتبكيين تكفين اسف
الوجد بضيق : كم مره امشيها فيصل كم مرهه !
فيصل تنهد لانه فعلياً اذاها مايقدر يبرر ماله وجهه يبرر عن خطاه
الوجد مسحت دموعها : ممكن تبعد بروح انام ؟
فيصل ابتعد عن طريقها ويفكر كيف يرضيها او يلفت انتباهها
جته فكره يخوف الوجد فيها وتكى على الجدار وماسك صدره وينزل تدريجياً على الارض ويصرخ
الوجد تجاهلته ونطقت بهمس : وش فيه يولد؟
فيصل شاف ان مافي امل تلتفت التزم الصمت وغمض عيونه عساس مغمى عليه !
الوجد خافت عليه لانه فجأه سكتت نطقت قبل تلتفت : تولد انت يوم تصرخ هالصراخ؟ بنت ولا ولد!
التفتت وشافت فيصل بوضيعه الميت الكذاب بس وش نسوي بالخبله الوجد الي تصدق بسرعه اتجهت له تركض وجلست عنده وحطت يدينها على وجهه تلف وجهه لها
فيصل ماسك نفسه لايقوم ويعطيها قبله الحب على قولته
الوجد بخوف : تسمعنييي؟؟
فيصل بهمس ويمثل التعب : تعبان احس بموت وبسجل املاكي بأسمك لاياخذهم شايب قريح
الوجد دمعت بخوف : فيصلل قومم ماعلينا من الاملاك الحين!
فيصل يسوي نفسه يلقط انفاسه الاخيره : الوجد
الوجد بخوف : فيصللل لاتخوفيني قومم
فيصل لازال يمثل : الوجد
الوجد : هلاا
فيصل يمثل التعب : احس اذا اخذت قبله الحب استعيد طاقتي
الوجد عقدت حواجبها ونطق فيصل : بموتت عطيني قبله الحب لاتحرميني ياها بأنفاسي الاخيره
الوجد زي ماقلنا لكم تصدق بسرعه وفعلاً عطته قبله الحب على خده
استقعد فيصل وعدل جلسته : اهخخ ي زينها من قبله
الوجد : كان مقلب ولا؟
فيصل : لاويني ووين المقالب انا رجال عاقل ماسوي مقالب
الوجد : لاصدق فيصل يعورك شي؟!
فيصل رجع تكى على الجدار : احس يدي واصابتي توجعني
الوجد رجع الخوف لها : طيب امش اعالجها لك
فيصل : كيف تشيليني وانتي عليك الهرمونات مايصير تشيلين شي ثقبل !
"الهرمونات= اغراضنا ي بنات افهموها "
الوجد عضت على شفايفها بأحراج وخدودها حمرت من الاحراج
ضحك فيصل من شكلها : عاديي خلاص العنود فضحتك
الوجد ضربت فيصل بخفه : واذا قالت لك يعني عاملني بلطف مو تضحك علي لاتخليني ابكي عليك الحين !
فيصل زم شفايفه: عاملتك بلطف وجبت لك ناقه بس انتي ماتبين ناقه
الوجد ذبحتها العبره ونطقت بغصه : مدريي احس ببكي
ضحك فيصل وسحبها له ونطق : ابكي خذي راحتك
جلسو كذا وانا وياكم مغبونين منهم يتهاوشون ويرجعون وحنا ناكلها
ابطالنا توم وجيري ..
قطع اللحظات الجميله عادي من اقبلت اكبر عقرب بالعالم "عهود"
وقفت قدامهم وهي بقمه الغيره لما شافت فيصل جالس بالارض والوجد حاضنته وحاطه راسها على صدره
عقدت حواجبها وتنحنت
فيصل غمض عيونه بضيق ووده يتفل بوجهها ونطق : خير
عهود : ليش جالسين هنا !
الوجد : شدخلك جالسين على راسك؟
عهود : حبيبتي شيلي راسك عن صدره اكيد يوجعه
الوجد : صدر حبيبي وزوجييي انتي وش حارق رزك؟
فيصل خارج الخدمه من قالت "حبيبي وزوجي " ذايب الولد ومسرح بـ كلمه الوجد
عهود : ترى زواجكم على ورق!
فيصل لو انه مو مسرح كان مكوفنها بس مع الاسف كان خارج الخدمه
الوجد تنهدت : ياليل عاد انتي شكلك تبيني اقوم اتوطى فبطنك هنا !
عهود : ياليت تقومين عن فيسل حبيبي
اتسعت عيون الوجد بغيره وقامت وشمرت يدينها ونطق : عاد شوفي ي بنت الست شوشو هرموناتي ضاربه اليوم وبخاطر هرموناتي تكوفن احد ان ماامسيتي مع المسلمين ترى بمسي عليك!
عهود تلعب بشعرها : ترى سار لك بس كم شهر مع فيسل ليش تغيرت لهجتك سرتي تتكلمين زيه!
"سار=صار""سرتي=صرتي "
الوجد منفقعه كبدها من عهود : يافقع كبديي ابك عاني ان مانطقتي الصاد زين الناس بخليك تنطقينه صح !
اخيراً اخونا فالله فيصل استوعب وحس على نفسه واستوعب لهجه الوجد وكيف هي تعلمت منه كلمات خصوصاً "ابك عاني"
ترك الوجد على راحتها يدري بها شوي وتسطر عهود
عهود : وايي تغيرنا يالوجد ؟
الوجد مو مستوعبه التغير الي حصل للهجتها نطقت: تهبين وتخسين قارقني
عهود تخصرت : ماراح اروح الا وابي اتكلم مع فيسل
تنهدت الوجد ورفعت صبعها : ياحرمه انتي اصبحي اصبحي
عهود تجاهلت الوجد وتعدتها وصارت مقابل فيصل الجالس ونقطت: ابيك تسلح لي شغله على جوالي ي فيسل
"تسلح=تصلح"
الوجد كانت ورا عهود وماتشوف غير كشه عهود قدامها من الغيره وماترددت تمسكها وتسدحها بالارض : الله ابوك يبنت ال **
فيصل فاتح فمه من الصدمه الوجد مو معقوله هي نفسها الوجد الدلوعه الغنوجه ! مستحيلل
كيف كذا الوجد سدحت البنت قدامه !
غمض عيونه وفتحها يستوعب الهوشه الي قدامه ومايسمع غير لعن وشتم من الوجد وصراخ عهود
الوجد : وهاذا احلى بوقس لعيوني القارئين
عشان الذمه بس قام ويعينني يفارع بينهم : يوهه خلاص خلاص انهو الهوشه
كان مايفارع بس يوهمهم انه يفارع!
جت العايله على صراخ عهود يركضون : علامكن
فيصل عشان الوجد مايجيها شي سحبها
شيخه قومت بنتها المسدوحه من الارض وهي تتدعا على الوجد
نطقت الوجد : هيه انتي اسكتي لااسدحك جنب بنتك
فيصل يزيد النار حطب : اوهه عاشت الداهيه وجيد
شيخه : لابوتس لابو من جابتس
الوجد اتسعت عيونها بصدمه وشمرت : لااا انتي ناويه تخليني اكل عدس تعالي
الجد : انتي مو زوجناتس عشان تستجنين؟
الوجد ربطت شعرها : اسمع عاد ترى اخلاقي قافله اليوم وودي اسطر لي شايب والظاهره ان اسمه سلطان الظاهر !
ام نواف : اقولكم الوجد راكبه جني من امس ابك امس تضارب معها !
فيصل : احس احس مجرد احساس يعني ان...
قاطعه ابو نواف : ورع ي السربوت تشيش الوجد على عمتها شيخه ؟! اطلع منها هوشه حريم
الوجد تناظر شيخه : ارحم الله هالصوابر صوابر هالعنز
للكل انصدم من قالتها الوجد لان مايقولها الا فيصل !
ابو بتال : اعقب ي فيصل مخرب البنت
فيصل رفع يدينه يعلن الاستسلام : مالي دخل
الحد : خلاص فكينا شرتس وروحي مع رجلتس
الوجد : بروح معه لكن علمو العنز عهود لاتجينا وانا الوجد بنت تركي
فيصل يعزز : عاشت ام محمد
الوجد التفتت له : ام تركي
فيصل : اي صح ام تركي
الجد : عويذ الله من شرتس ي بنت هند !
الوجد ارسلت قبله لجدها بالهواء : بنت هنوده حبيبي تاخذ حقها بيدها
فيصل مصدوم من الوجد وقوتها
الوجد : يلا باي جدوو وعمتو وعمو
ومشت الوجد وراحت وفيصل بقى واقف من الصدمه هو والجد وشيخه وعمامه وامه
الوجد قدرت بكلماتها تستفزهم كلهم ولكن هناك من سحرته بكلماتها "فيصل الخفيف!"
الجد : اضبط حرمتك ي فيصل لااضبطها لك
فيصل التفت للجد ونطق : مضبوطه بس في واحد يبي له ضبطه
الجد عض شفايفه بغضب من فيصل الي ماعاد صار يهاب من جده !
اما الكل مايدري وش يقصد فيصل
فيصل ناظر ساعته : عطيتك وجهه يلا سلام
وراح فيصل لحق الوجد
الجد : اعقبب
ابو نواف : وش صاير يبه ليش فيصل طويل لسانه عليك؟
ام نواف : من هالجنيه الي معه انت شفت كيف سدحت البنت وتهاوشت مع شيهانه !
الجد ابتسم ابتسامه شر من عرف ان الوجد تهاوشت مع شيهانه كان هدفه يكرهه الكل بـ الوجد وواحد ووا الثاني الين يوصل فيصل ويكرهه يالوجد !
ابو نواف : مشاكل بنات مالي بها
،
نقطه الالتقاء
العنود جايه من جهه وشيهانه ويزن بجهه ومازن والجوري بجهه
كانت وجهتهم للمزرعه لكن !
مازن رمى كل شي بيده وركض : ليزز
يزن ابتسم بوسه ثغره وركض ويصرخ بـ : زوزو
وحضنو بعض : اشتقنا وش هالقطعه!
يزن : الاشغال والله
شيهانه : تعرفون بعض؟!
والعنود وجوري مع بعض: مين هاذا!؟
مازن : ابك هذا تؤام روحييي يزن ومازن اذا ماتعرفون من يوم حنا صغار وحنا مع بعض
العنود : مافهمت هو تؤمنا الثالث؟؟
مازن : لا خويي
يزن : انا صاحبه
شيهانه : كيف تجمعتو انتو
جوري : كود نسوي استخبارات عشان نعرف
يزن : انا صاحب فيصل ومازن من يوم كنا اطفال بس حدتنا الضروف ونقلنا جده
شيهانه : يعني اصولك نجديه ولاحجازيه؟؟
يزن : انا جحازي من جده لكن جينا فتره لنجد وبعدها رجعنا
العنود : حلوو كيف جده هناك؟
يزن : مرهه لزيزه طعمه
شيهانه : امشو بس يلا جدي ينتضرنا
ودخلو المزرعه ..
وقلطو يزن بس الجد كان في قمه الوقاحه كان يستحقر يزن وطريقه كلامه !
،
العشاء
العنود وجوري مشتاقات للوجد وراحو لها ودخلو غرفتها حصلو فيصل والوجد يسولفون
جوري : اوه معليش
فيصل قام بأحراج ويحك راسه : لا عادي ادخلي انا بطلع اتصل علي يزن قال انه هنا
العنود : ايي الجداوي؟؟ مرهه عسول يضحكني
جوري : معلينا منه شلونك جويجهه ي حيوانه اشتقت لك
طلع فيصل من عندهم والبنات حضنو بعض والوجد دموعها اربع اربع مشاعرها متضاربه
العنود : واي جوجي خلاصص
الوجد مسحت دموعها : وحشتونيي خير
جوري : اقول اجلسييي عطينا علومك وش صار وش ماصار
جلسو البنات على سرير الوجد وياخذون ويعطون من علوم الوجد
سكتو البنات العنود وجوري وهم يطالعون ببعض
الوجد : شفيكم مخبيات شي ؟
العنود : وجيد والله مدري كيف افاتحك بالموضوع لكن
الوجد : لكن ايش تكلميي خوفتينيي
جوري : بعطيك على بلاطه موضوعك انتي وشيهانه !
زمت شفايفها الوجد وتنهدت ونطقت بضيق : خلاص بنات تكفون الموضوع لاتتكلمون فيه الي صار بيني وبينها يبقى بيني وبينها
العنود : الوجد عاديي انا عمتك واختك وصاحبتك وجوري مو غريبه !
جوري : الموضوع مايزعل وعادي انا وشيهانه تهاوشنا ورجعنا زي اول
للعنود : شيهانه تمر بحاله نفسيه جلست عند ابوي قرابه الاسبوع وهو يملى راسها بالافكار السلبيه !
الوجد : بنات جايين تدافعون عنها ولاايش مافهمت قصدكم!
جوري : نبيك تتكلمين عن الموضوع بالتفاصيل
الوجد تكتفت وحطت ضهرها على الجدار ونطقت : بناتت خلاص ماحب الموضوع هاذا
العنود طاحت عينها على جوال الوجد ونطقت : جوالك يتصل
رفعت الوجد جوالها وقرت الاسم وتنهدت بضيق وحطته صامت وسكتت
جوري : الوجد امك! عيب تسوين فيها كذا
الوجد : صاير موضوع بيننا ومن امس وحنا نتهاوش
العنود : ولو قومي ردي عليها
الوجد سحبت جوالها ونزلت من السرير وطلعت
جوري : الله يعينها
العنود : انا اتوقع ان امها تهاوشها عشانها تهاوشت مع ام نواف
جوري : تصدقين؟؟ ايي الظاهر
،
على عتبه البيت
الوجد ردت على الاتصال لكن مانطقت بحرف
ام الوجد بقمه العصبيه : انتي متى تعقليننن انا من مره قايله لك لحد يشتكي منك امس ام فيصل داقه علي تشكي منك وتسبني
للوجد : ماما تسبك وتسبني اكيد بدافع عن نفسي ونفسك!
ام الوجد : ولو هاذي حماتك احترميها
الوجد : اطقع حماه
ام الوجد اتسعت عيونها بصدمه : بنت احترميها كبر امك اعتبريها بحسبه انك
الوجد : تخسي مابقى الا هاذي تعايرني واسكت واعتبرها امي !؟
ام الوجد : الوجد لاسمع منك كلمه !
الوجد : اقولها بوجهها كانك تبين انا ماخاف الا من الي خلقني
ام الوجد : طولان لسانك
الوجد : ايي يطول يطول وان شاء الله مايقصر ويسكت
ام الوجد : بنت!
الوجد : بسوي الي براسي ماما كافيه الي اشوفه يسبونك واسكت لاحبيبتي مستحيل !
ام الوجد : الله لايبارتس فيتس من بنت انتي يبي لتس قصه لسان يالموذيه انقلعي
وقفلت الخط ام الوجد ونزلت الوجد جوالها وزمت شفايفها تمنع دموعها تنزل وصارت تفرك باطن يدها بقوه وتبكي
،
فيصل ضاق خلقه من جلسه جده وقام وطلع من مجلس النفاق والزور وجلس بالدكه
فتح جواله مايدري كيف راحت صبعه لرقم الوجد واتصل
ماردت
دب بقلبه الخوف واتصل مره ثانيه وهالمره ردت لكن مانطقت بحرف
فيصل : وجيد وشفيك!
الوجد كانت بتتكلم لكن طلعت شهقاتها
فيصل فز ونطق : وينك انتي فيه اجيك
الوجد نطقت وهي تبكي : فيصل وينك
فيصل : موجود انا انتي وينك!
الوجد بدموع : بال...
قاطعها فيصل : خلاص جايك جايك لاتبكينن
الوجد سكتت لكن استمرت تبكي
جاء فيصل يركض وخايف وجلس عندها من شافها تبكي وجالسه على العتبه : علامك يابوك
الوجد رفعت انظارها ل فيصل : عادي اضمك ؟
فيصل : وتسألين بعد وانا كلي لك ؟ تعالي
تقدم فيصل لها وحضنها وقومها عن العتبه وحضنها وهو واقف وبيد وحده نطق وهو يسمح على شعرها : بسم الله على قلبك مين الي مبكيك ابكيه
الوجد بدموع : ماتقدر تبكيه هالمره
فيصل : اقدرر بس قولي منهو !
الوجد : ماما
فيصل عض على شفته بقله حيله هو مستحيل يتعرض انثى
فيصل : امشي معي نغير جو
الوجد : وينن
فيصل : معليك وين بنروح لكن امشي
مشت الوجد مع فيصل وكان متجهه لسيارته وفتح باب الراكب ودخل الوجد بهدوء وحنان : لاتفكرين كثير شوي وجايك
الوجد هزت راسها برضى وسكر الباب فيصل ودخل بيت العم تركي وتنحنح اذا فيه احد ولا
حصل العنود وجوري موجودات بغرفه الوجد
العنود عقدت حواجبها من وجود فيصل : شفيك؟ الوجد وينها ؟
فيصل : الوجد مافيها شي بس ابي جاكيت او بلوفر لها
جوري : ليش؟
فيصل : ابي بلوفر وبس
العنود قامت وفتحت دولاب الوجد وطلعت له بلوفر ومدته لفيصل ونطقت : دقيقه بعطيك شال ثقيل اخاف مايدفيها البلوفر
فيصل اخذ البلوفر ويتحسس قماشه ونطق : تمام عطيني الشال وغيري البلوفر هاذا خفيف
العنود طلعت لها شال كبير وثقيل ومدته لفيصل واخذت البلوفر واستبدلته ببلوفر ثاني ثقيل اخذهم فيصل وابتسم ونطق : مشكوره
العنود : العفوو
وراح فيصل ونطقت جوري : عندي فضول وش مهببه الوجد عشان ياخذ لها بلوفرر
العنود : اكيد امها ضيقت خلقها وهو يونسها بس مايبيها تبرد
جوري : ي حليلهم بس
نرجع لفيصل الي ركب السياره وحط البلوفر بالمرتبه الثانيه
نطقت الوجد : ليش اخذت البلوفر؟
فيصل : بنروح مكان بعيد وبرد شوي
الوجد هزت راسها برضى وسكتت مد يده فيصل لها ونطق: هاتي جوالك
الوجد عقدت حواجبها : ليش؟
فيصل : مابي اي اتصال يعكر مزاجك وينك او وين مختفيه
حطت الوجد جوالها بيده واخذه وفتح الدرج الي قدام الوجد وحط جواله وجوالها ونطق : كذا نقول تمت المهمه
بقت الوجد ساكته ومشبكه يدينها ببعض تنهد فيصل وهو يحاول ياخذ ويعطي معها مايبيها تسكت : ودك تسمعين شي؟
الوجد : لا
فيصل : طيب جيعانه؟
الوجد : لا
فيصل سكت واتجه لاقرب سوير ماركه ونزل بدون لايناقشها وش تبغى وش ماتبغى نزل شرى له اكل وحطب
عقدت حواجبها الوجد من شافت الحطب معه
فتح صندوق السياره وحط الحطب وفتح عزبه السياره وتاكد ان كل شي كامل
سكر صندوق السياره وفتح الباب وركب وحرك السياره وهو ناوي يحارشها
الوجد : ليش جايب حطب؟
فيصل ساكت
الوجد : اتكلم معاك
فيصل ساكت
تنهدت الوجد وجت تبغى تبدا حوار وموضوع "انت ماتحبني"
قاطعها فيصل : لالا امنعيني من هالموضوع
الوجد تكتفت : لا صدق انت ماتحبينيي
فيصل : والله احبك والله الي شاهد على حبي لك
الوجد : طيب ليش سكتت يوم سالتك؟
فيصل : بحارشك بس لعلي خربت ام المقلب
الوجد ضحكت ونطقت : تستاهل لاتسوي فيني مقلب
فيصل ابتسم ونطق : انا احبك امنا بالله طيب انتي؟
الوجد حمرت خدودها بخجل هي تحبه بس ماتعرف كيف تقول انها تحبه : فاصولياء!
فيصل ضحك ونطق : تمام تمام معك وقتك فكري كيف تقولينها معك وقتك منتظرك وش وراي انتظرك
الوجد تضيع الموضوع ونطقت : كيف تسوق بيد وحده؟
فيصل ناظرها بطرف عين يعيني "ليش تغيرين الموضوع"
: ابك انا مدرك السواقه ازهليني
الوجد : الله وناسهه لازم تعلمين
فيصل دخل البر ونطق: هابشري على هالخشم
الوجد ابتسمت ونطقت من شافتهم دخلو البر : يوه البر من زمان عنه!
فيصل : على طاري البر تخيلي خويي هو خويي من بعيد بيني وبينك شايب عود قده صك الثلاثين
الوجد : ايوه وش فيه؟
فيصل : حرمته كانت تخاف من البر
الوجد حطت يدها على فمها : يوهه يعمري عليها ليش؟
فيصل وقف السياره بالمكان المناسب : توفو اهلها وهي رضيعه
شهقت الوجد : لا فيصل لاتبكيني ! صدقق؟
فيصل نزل : دقيقه بس افرش الفرشه واشب الضوء واعلمك قصتهم
الوجد تحمست للسالفه : تمام يلا
شب فيصل الضوء وجلس عندها ونطق : اقربيي ي دهر قلبي تعالي لايهفك البرد
الوجد كان بالها مشغول بالبنت الي تخاف من البر وتقدمت وجلست جنب فيصل
كان الجو هادي وضلام ومافيه غير ضوء القمر وشبه النار والوجد وفيصل الي جالسين جنب بعض
فيصل نسى السالفه تماماً ، حط يده على كتف الوجد الثاني وضمه ونطقت الوجد : بليز فصفص قول لي السالفه
فيصل ابتسم من انه قدر يشد انتباهها بسالفه : يالطويله العمر والسلامه هاذا لواء عندنا بالداوم كانت مشهور بالعصبيه والهيبه وكثير هواجيس
الوجد زمت شفايفها : يوهه ياعمري عليه اكيد مهموم
فيصل رفع حاجبه بغيره : ياعمري؟
الوجد ضحكت : لا اقصد البنت
فيصل : ايي اشوا،، المهم فجأه اخذ كم شهر عقبها صار يضحك ويمزح وياخذ ويعطي استغربت منه
الوجد : اكيد لقى حبيبه قلبه
فيصل : عليك نور لقاها
الوجد بفرحه : الله وناسههه يجننون حبيتهم
فيصل : تزوجها اجباري عشان خالته مريض مرض خبيث ومن اول يوم عرفها حتى قبل الخطبه كسر ظفرها
الوجد عقدت حواجبها : يوهه هاذي بدايتها قاسيي !
فيصل : والله اخذها وهو خاطب بنت عمه
الوجد : ويي كيف حرام ومشاعر البنت الثانيه !
فيصل : كان مجبور بكل الحالاتين زوجته الاولى الثانيه مجبور عليهم
الوجد : مدعي عليه هاذا
فيصل : وفعلاً تزوجهم كلهم ولكن زوجته الي كسر ظفرها اظن اسمها نوره اذا ماخاب ظني كانت ماتطيقه في عيشه الله والثانيه كانت طايحه عليه اظن هيام او شي زي كذا
الوجد : اييوه الحين نوره الي تزوجها عشان خالته وهيام الي عشان عمه؟
فيصل : اي كذا ،، نوره ماتبيه وتكابر وتزيد وتعيد ب طلقني وكانت بكايه زيك تماماً
الوجد ضربت فيصل بخفه : خير ماني بكايه !
فيصل ضحك وكمل : حب نوره رغم انها ماتحبه وهيام تحبه بس مايحبها
الوجد : ياعيشتن قشرا
فيصل : بس مشكلته كان مايعرف يحب نوعاً ماء يضرها
الوجد : حيوان كلب ايش اسمع بدعي عليه الا نوري!
ليصل : اسمع بهاج بن مطلق
فزت الوجد من عرفته : كذابب هاذا هو!!
فيصل عقد حواجبه : اي هو شفيك؟
الوجد : هو بطل روايه هي التي علمتني كيف اعشقها !
فيصل اتسعت عيونه بصدمه : اما عاد!
الوجد : ايوهه اعرفهم جاهم بنت ولد ملاذي وحموديي
فيصل : لازم نزوهم والله
الوجد : ايي لازم والله
ضحك فيصل وكملو جلستهم بالنفود والهواء يلعب بشعر الوجد وضحك وسوالف الين فيصل نطق : اعترفيي
الوجد : ايشش
فيصل : بحبك
الوجد تشتت انظارها تستحيي تقولها نطق فيصل : قوليي مافي احد ولا ترى بجمع العايله كلها واخليك تعترفين
الوجد : فيصل خلاص انت سمعتها قبل
فيصل : لاماسمعهاا زين كانت وقتها بنكهه الدموع والصراخ وانا ابي الكلمه بنكهه الحب والموده !
الوجد : عصير هو لازم نكهات؟
ضحك فيصل وبوسط ضحكاته نطقتها الوجد بسرعه: احبك
توقف فيصل عن الضحك من سمع الكلمه الي طال الزمن وهو ينظرها والتفت لها ومسك كتوفها متجاهل الم يده المصابه : عيديها
الوجد : هوب هوب بشويش على يدك
فيصل : معليك من يدي قوليها !
الوجد ضحكت ونطقت : احبك
فيصل وقف من الفرحه وصرخ ب: تحبينيييي ي ناس !
ابتسمت الوجد وكمل فيصل : ي لبيههه
حضن الوجد وشالها ويدور فيها !
المفروض يكون هالمشهد قدام بحر او مطر او اي شي جميل لكن قدر الله وصارت اللحظه بالبر لحضه الاعتراف
فيصل مع الحماس الي فيه يشيل الوجد وصدره تعبان يعني من العصر وهو يشيل الوجد جاء وقت ان الجرح يألمه باللحظه الحلوه
بدا الم الجرح يعوره بالمره مو زي اي الم نزل الوجد وحط يده على صدره وجلس بالارض ساكت مايبغى يخوف الوجد
الوجد عقدت حواجبها وجلست على ركبها عند فيصل ويدها على وجهه : فيصل وش فيك خوفتني ؟
فيصل ابتسم بألم : مافي شي لاتخافين
الوجد : لاوالله فيصل قول تكفىى لاتخوفني
فيصل : مافي شيي
الوجد مسكت يد فيصل ونطقت : قوم معاي
قام معها لانه بأختصار مايرد لها شي
نطقت : فيه اسعافات اوليه صح بالسياره؟
فيصل : ايه
الوجد : كويس
فتحت باب السياره ونطقت : اجلس يلا ولاتناقشني !
رفع حواجبه فيصل مستطلف عصبيتها وخوفها
وفعلاً ماناقشها وجلس بالسياره واخذت الوجد الاسعافات الاوليه : ليتك جالس بالمستشفى اسبوع بس كان ماتطول الا الجرح بريان بس انت عنيدد
فيصل : انا العنيد ولا انتي؟
الوجد وهي مشغوله بالاسعافات : طبعاً انت
فيصل : لاوالله انها انتي بس وش نسوي نصير انا عشانك
الوجد رفعت راسها وتذكرت كيف تعالج الجرح وهو بصدره نطقت : والله والبلشه
ضحك فيصل : شفيك؟
الوجد : اسمع مافي مناشف هنا؟
فيصل تذكر حركتها قبل ونطق : مافيه
الوجد : يلا معليه الضروف حدتنا نعالج بدون مناشف
فيصل طلع الجرح وابتسمت الوجد بوهقه ولكن الضروف حدتها تعالجه وتقدمت تحط المعقم على الجرح
عوره الحرج ويدها البارده : بردانه ؟
الوجد وهي مركزه تعقم الجرح: لا اذا عورك قول لي
فيصل سكتت والوجد استمرت تعالج الجرح وحطت الصق ونطقت : خلصنا انتبه على نفسك ثاني مره ولاتحمس
فيصل ابتسمت ونطق : قدامي يلا اجلسي عند الضوء يدك ثلجهه باردهه
الوجد ابتسمت وجلست عند الضوء
فيصل فتح باب السياره الي ورا واخذ الشال وسكر الباب واتجهه للوجد وحطه على كتوفها ابتسمت الوجد له
: الحين يجيك احلى شاهييي
الوجد : يلا نجرب شاهي حقك
فيصل اعطاها الكاسه ونطق : سمي
الوجد : بسم الله الرحمن الرحيم
ابتسم فيصل لان ردها غلط
الوجد : يميي والله حلوو
فيصل ضحك : حلا هو تقولين يمي؟
الوجد ضحكت : بعير ماتنسى عشان قلت لك عصير هو
فيصل : وحده بوحده
ابتسمت الوجد ومسك يدها فيصل وقربها من النار عشان تدفى
فيصل : والله يبي لها رقده !
الوجد شرقت يالشاهي من الصدمه : هاه!
فيصل :بسم الله عليك، وش ماقد رقدتي بالنفود؟
الوجد : ايوهه ماعمريي يمه احس مايصلح يمكن تجيك حشره او ذيب
فيصل : الي يجي اذبحه
الوجد : لو انسان؟
فيصل يحارشها : اذا بنت بقلطها واذا رجال بذبحه
الوجد اتسعت عيونها بصدمه وضربت فيصل : ي حيوان
فيصل : مستحيل اشوف بنت غيرك
الوجد ابتسمت ولكن تحولت ابتسامتها الي ربكه وتوتر من انسدح فيصل وحط راسه على فخذها
ترددت تلعب بشعره ولكن حطت يدها على شعره تلعب فيه وتسولف معه
فيصل جاه النوم بس قاوم مايبغى ينام وهو على فخذها يبغى العكس
قام ونطقت الوجد : وين؟
فيصل: بجيب فروتي
هزت راسها برضى وجاب الفروه وجلس جنب الوجد وسحبها له : نامي يلا اكيد تعبتي
الوجد : لامستحيل انام هنا
اجبرها فيصل تحط راسها على فخذه وحط الفروه على جسدها وهو حاط يده على شعر الوجد وانظاره على الضوء
مع الوقت الوجد اخذها النوم ارتاح لما نامت
________________________
انتهى البارت ♡
رضيت بالله ربًا وبالإسلام دينًا وبمحمد ﷺ رسولًا ونبيًا)، ♡
حسابي تيك توك :Ot348285
حسابي انستا انزل فيه الروايه : Ot34828
*اعتذر عن الاخطاء الاملائيه*
YOU ARE READING
لاتقارنين حبي لك بأي مخلوق انا حتى بغيابك احبك
Randomفيصل بحده وعصبيه نطق: ان ماخذيتك وربيتك ماكون ولد محمد الوجد ببرود وعناد : ان مارفضتك ماكون بنت تركي ! تبدأ القصة لما الجد أجبر الوجد إنها تتحلى بالصبر والهدوء وكأنها لازم تكون ضعيفة شخصية قدام الناس خصوصاً في عزيمة كبيرة جمع فيها أهل الديرة وسط ال...
