لاتقارنين حبي لك بأي مخلوق انا حتى بغيابك احبك

Part 45

سبحان الله وبحمده سبحان الله العظيم ♡

نازل من السياره وهو معصب وجنون الارض كلها براسه وبيهاوش اي احد قدامه وملامح وجهه معصبه والعصبيه توضح على بعد اميال حتى الموظفين من شافو وجهه ماسألوه بشي ولاتطمنو عليه
تعدى الرسبشن ووقف عند المصعد ينتظره يفتح
جاء الموظف تبع الفندق : لو سمحت اخوي فيصل ممكن تعـ....
فيصل دخل المصعد وتجاهل الموظف واخذ نفس طويل بضيق وتعب من الكلام الي انقال عنه وتشبيه بعديم الرجوله ومن هذا الكلام
ناظر نفسه بمرايا المصعد وشاف ملامح الغضب على وجهه وكشر وطلع من المصعد متوجهه للغرفه
حط يده على مقبض الباب وظل ثواني يفكر يواجهها بملامحه التعبانه او انه يختفي عنها ويشغل بالها الين يهدى
فتح الباب بهدوء وعقد حواجبه من هدوء الغرفه تقدم وشال شماغه ورماه على طاوله المدخل واتجهه لغرفه النوم
الوجد جالسه بالسرير ومغمضه عيونها والدموع تسيل على خدودها ومركيه ظهرها على الجدار وجاهله وجود شخص تنتظره
بلع ريقه بخوف ان وصل لها كلام جده وتقدم ومن زود تعبه رمى نفسه بحضن الوجد
الوجد فزت بخوف وفتحت عيونها وشافته بحضنها تعبان ماقدرت تمالك نفسها وبكت زياده على منظره
رفعت انظارها تمنع نفسها تنهار اكثر من كذا ومسحت دموعها باكمام بلوزتها
حطت يدها على خد فيصل وتدري انه انصفق كف من ابوه : فيصل
فيصل من رمى نفسه بحضنها نسى كل تعبه وكل التفكير راح بمجرد انه بحضنها نطق وهو مغمض : لبيه
الوجد بدموع وهي تمسح خد فيصل : عوروك ؟
فيصل قام وسحبها لحضنه: لايعيون فيصل محد عورني الا دموعك عورتني
الوجد حضنت فيصل وهي تبكي : فيصل قول الحقيقه ليش تختفي وليش ماترد على اتصالاتي خفت صار لك حاجه ليه تخوفني عليك كذا
فيصل مسك وجهه الوجد ومسح دموعها بأصابعه : يابوك خفت اصرخ واهاوشك وانتي مالك دخل بالموضوع خفت افرغ طاقتي السلبيه عليك خفت اخسرك ي وجدي
الوجد ناظرت عيونه الكاذبه وواضح فيها الالف من الهموم والضيق : بس عيونك تقول فيك شي قلبك تعبان
فيصل : لاتصدقين عيوني
الوجد : طيب عطني يدك بشوف جرحك
فيصل شمر اكمام الثوب : مافيني الا العافيه
الوجد تفحصت الجرح وتنهدت براحه : كويس سليم
فيصل : خليني بحضنك ارتاح
الوجد ابتسمت ورجعت استندت على الجدار وحطت المخده على فخوذها
فيصل انسدح وحط راسه على المخده الي بحضنها ورفع يدينه حاوط خصرها وغمض عيونه براحه
الوجد تلعب بشعره : تبغى اسوي لك شي ؟
فيصل : ابيك تطيعين شوري
الوجد تنهدت : فيصل صامل يعني على جده؟
فيصل : صامل وابشرك جامعتك وداومي وبيتنا كله هناك ضبطت كل شي
الوجد : لاحول ولاقوه الا بالله فيصل مو صاحي انت بهالسرعه ضبطت الامور؟
فيصل : ٣ شهور وانا احاول اضبط الامور بدون علمك وانتظر قبول الجامعه عشان اصارحك وفعلاً حجزت تذاكر وبكرا الصبح رحلتنا ان شاء الله
الوجد : بس مقدر اروح
فيصل عقد حواجبه : وراك ماتبين؟
الوجد : بقول لك حاجه او يعني خذها من باب الفضفضه
فيصل : اسمعك يعيون فيصل
الوجد : تهاوشت مع امتنان
فيصل : امتنان هي الي يحبها فهد ؟
الوجد : لا زوجه اخوك المستقبليه اسمها خيال خيال
فيصل : اجل بالطقاق دام الي زعلانه ماهي بزوجه اخوي بالطقاق
الوجد : يابرودكك فيصل اقولك صاحبتي امتنان تهاوش معها وزعلانه مني
فيصل : يبنت الحلال الي يزعل خليه يزعل ترى رضى امتنان مايدخلك الجنه !
الوجد اجتمعت الدموع بعيونها : فيصل اقولك خسرت صاحبتي صاحبتي خسرتها ليش متساهل كذا
تنهد فيصل وابتعد عنها ومسك يدينها : الي جابها يجيب غيرها مثل ماجت تجي وحده غيرها واحسن بعد
الوجد بدموع : ماتحسون انتم تهاوشت مع صاحبه عمري وتقول تروح وتجي غيرها
فيصل : يبوك انتي لو جلستي على ذي الحاله خايفه تخسرين فلانه وعلانه ترى ماراح تعيشين دامها تبيك تجيك والمحب يدل دربه زي ماانا ادل دربك وين ماهبيتي ادلك
الوجد صدت عنه واستمرت الدموع تسيل على خدودها والتزمت الصمت
فيصل : قولي لي السالفه من الطق طق ل السلام عليكم
الوجد اخذت نفس وقالت له السالفه بدون اضافه اي حدث او حذف اي كلمه
فيصل حط يده تحت فكه بالتفكير : شوفي ياعين ابوك انتي بهالقصه مانتي غلطانه ولو واحد بالميه انتي انسانه زي اي انسان يتعب بوقت ويفرح بوقت وطبيعي ان الانسان يصير عنده ضروف ومايرد على الناس انتي كثر خيرك رديتي عليها حتى وانتي بأصعب اوقاتك وش مضايقك الحين
الوجد نطقت بضيق : مضايقني انها عايرتني
فيصل : تعبت وانا اقول لك يابوك لاتفضفضين لحد الا لي عاد انا غيرر شوفي نهايه الثقه الزايده
الوجد رفعت كتوفها : طيب ماكنت عارفه ان هذي عواقب الثقه الزايده
فيصل مسح على خدها بحنان : الحين عرفتي وماعاد يفيد الندم والتفكير طنشي والحين الموظف يجيب الاغراض وتجي رطنه مع الاغراض
الوجد عقدت حواجبها : اي اغراض؟
رن الجرس وقام فيصل بدون لايرد على سؤالها وفتح الباب ونزل الموظف الشنطه وبوكس القطوه
فيصل : مشكور ماتقصر
الموظف : العفو
طلع الموظف وفيصل سكر الباب واخذ بوكس القطوه ورجع للوجد : هذي الاغرض
فزت الوجد بفرحه من شافت بوكس القطوه بيد فيصل
قامت واخذت بوكس القطوه ونطقت بفرحه : لالي
،
غرفه جوري للعلوم الخاثره
جوري دخلت ومعها صينيه قهوه سعوديه وحلا : حي الله عروستنا العنود
العنود بأبتسامه : الله يحييك
شيهانه منسدحه بسرير جوري ومبتلشه بالجداوي يزن
جوري تربعت قبال العنود وبينهم الصينيه : تقهوي
العنود اخذت قطعه من الحلا والتفتت : شويهين بالبدايات؟
شيهانه تعدلت ونطقت بفضول : وش شعور البدايات؟
جوري ضيقت عيونها : لايكون طايحه بغرام فؤاد الي بـ طاش ماطاش؟
شيهانه رمت المخده على جوري : انقلعي خير وش هالتشبيه
العنود شرقت بالقهوه ونطقت بضحك : انهرتت جويريه وش هالتشبيه حرام عليك والله ان يزن حبوب
شيهانه قامت بزعل : ابوكم من جلسه كلها تنمر وين وجيد عني بس تدعمني
جوري بضحكه: خلاص يالزعول نمزح معتس وشبتس صدقتي
العنود : ماحبيت الصراحه شويهين صايره زعول
شيهانه تنهدت وتربعت جنب جوري : لاتلوميني وجيد من جهه وفصيل من جهه ودراستي من جهه والجداوي المعصقل من جهه
جوري قرصت شيهانه قرصه امهات من تحت لتحت وهمست : الفقيه
صرخت شيهانه بألم وتحك مكان القرصه : وجع توجع يد عدوتس
جوري : وش صرخه توم جيري ذي
العنود : لحظه لحظه وجيد وفيصل وش صاير فيهم؟
شيهانه : مدري خلي بخور السوق تقول لتس
جوري : لاحول ولاقوه الا بالله ماودي اقول وانقل العلوم هذي مو من اطاري انقل علوم !
شيهانه: يويلي يالتسذوب تموتين بالعلوم والنقل
العنود بنفاذ صبر نزلت الفنجان ونطقت بجديه : تكلمي انتي وياها بدون لف ودوران وش صاير بالكولد برو حقنا
شيهانه : ابد والله جدي لعن خير فيصل
جوري : خل اقولتس السالفه بالتفاصيل الممله
شربت فنجانها جوري وبدت تقول السالفه بكل التفاصيل حتى انها كانت تقوم وتطبق الحركات على شيهانه
شيهانه : لغه الجسد عليها درجات
جوري جلست بعد مانتهت من الشرح : وبس
شهقت العنود بصدمه : كل هذا صاير بدون علمي !
شيهانه ؛ لا صار بعلمتس الحين لاتفلينها
جوري : العنود مثل العروس الي تجي بيت اهلها وتسأل عن القبله
شيهانه : وربي صادقه
العنود : طيب وش صار على فيصل !
شيهانه : مايرد علينا الثقيل
العنود انجلطت من برود شيهانه : ي حماره اخوك طلع من المزرعه معصب وزعلان وانتي جالسه تتقهوين
شيهانه : وش تبيني اسوي اقلب الدعسوقه وانقذ العالم ؟
جوري : ياليل ي ذبات جيل الايباد
العنود : برودكن يجلطني بتصل على فيصل
شيهانه : هذا اذا رد
العنود تجاهلتهم واتصلت على فيصل لكن مارد : مارد
شيهانه : عوايد فيصل كانه عروس ماتبي تقابل احد عشان بليله زفتها تطلع بيرفكت
جوري : زوجو شيهانه تتكلمين عن العرس والحب واجد
شيهانه : وتسبدي لاان شاء الله ماتزوج !
العنود قامت : قومو امي تقول الحريم جن وام طلال جت الله يعين
جوري من التوتر كبت القهوه : ام مين ؟
شيهانه بمحارش : ام طلولي الحب
جوري : ورعه!
العنود : قومن بس
،
الساعه ١١:٣٠ باليل
فيصل جالس ويهز رجله بتفكير ويهوجس هو ابداً مافكر بالكلام الي انقال عنه يخاف ان الكلام الي انقال عن الوجد يوصل للوجد
يبغى يبعدها عن كل من يوذيها
طلعت الوجد من تلمطبخ ومعها كوبين شاهي وجلست جنب فيصل ومدت كوب الشاهي : فيصل
وعى على نفسه ونطق : هلا
الوجد : سويت لك شاهي
فيصل ابتسم واخذ الشاهي : يعطيك العافيه ماتقصرين
الوجد بأبتسامه : الله يعافيك ،بسألك
فيصل تعدل بأنصات : اسلمي
الوجد : ناوي تستقر بجده الي الابد؟
فيصل : الله الله حتى ان الجيب نقلته بالسطحه اليوم لجده يعني خلاص مافي شي يربطني بالرياض نهائياً غير امي وابوي وعمي تركي الي نزورهم كل فتره وفتره
الوجد : ليش مصمم الا لتستقر بجده ليش مانستقر بالرياض ؟
فيصل : لاني اشوف شي اني ماتشوفينه
الوجد عقدت حواجبها : وش الي تشوفه وانا ماشوفه؟
فيصل : ارقدي يبوك الرحله من صباح ربي
الوجد بفضول : مقدر انام لازم اعرف وش الي تشوفه
فيصل : جهزتي شنطتك؟
الوجد تربعت وحلفت يمين بالله تعرف وش الي الي يشوفه فيصل وهي ماتشوفه : اي جهزت بس قل لي وش الي شي تشوفه
فيصل تنهد : لاحول ولاقوه الا بالله صامله؟
الوجد بحماس : ايوهه
فيصل : شفت ضحكتك وسعادتك وعيونك الي تطلع قلوب اذا ابتعدتي عن الي يأذونك كل هذا شفته لما رحنا لجده شفت السعاده! حسيتك مليانه شغف طير حر محد يقيدك بقيود صارمه وقاسيه
الوجد شبكت يدينها ببعض ونزلت انظارها ونطقت : تهاويل يوم رحنا لجده كان شغف البدايات
فيصل : مو مساله شغف البدايات انا كل يوم معك اكون بالبدايات! ترى اشوف الضيق والحزن بعيونك اذا كنتي بمزرعه جدي والكل يلاحظ لو تسألين مازن بيقول كلام فيصل صح ومنطقي اسالك بالله متى اخر مره شفت غمازتك؟ من زمانن ماشفتها فاقد ضحكتك وفاقد حماسك وسعادتك فاقدك كلك ماكنتي الوجد الي نفسها راحت معي جده كنتي مليانه طاقه ايجابيه وادري ان قربك من جدي يضايقك بس ساكته ماتبغين تتكلمين عشان مانروح جده مهما خبيتي عني انا اعرفك من عيونك لاتحاولين تخفين عني شي
الوجد تأثرت من كلامه وكيف انه يعرفها ويفهمها من عيونها ويفرق بين ضيقتها وسعادتها وكيف انه يعرف المكان الي تكون سعيده فيه وكيف انه بيترك كل اهله عشان يشوف غمازتها ماتفارق وجهها
اجتمعت الدموع بمحاجر عيونها وقبل تنزل الدمعه فيصل مسح دمعتها وسحبها لحضنه ويطبطب على ظهرها : امنعيني من الدموع يابوك ماحب الدموع ولاودي اشوفها خصوصاً بعيونك
الوجد حضنته وبعيونها الدموع : كلامك اثر فيني مقدرت اتخطاه
فيصل مسح على ظهرها : وهذي الحقيقه ولاننكرها انتي تستانسين بجده اكثر من هنا
الوجد : مبسوطه معاك السعاده بالاشخاص مو بالمكان ي فيصل
فيصل : امنا بالله ان السعاده بالاشخاص ولكن برضو المكان له دخل بالسعاده المكان الخالي من معكرين المزاج هذا سعاده
الوجد رفعت انظارها لفيصل: طيب اذا رحنا لجده جيب لي شيهانتي ونودي وجويريه وعمي زوزو وخيالي وفهيدان
فيصل حط يده على خشمه : على هالخشم ان شاء الله بس يتزوج فيهدان ونحوم حوله ونخرب افكاره ونخليه يستقر بجده وبرضو شويهين اذا يزن صامل وهي راضيه ابد ان شاء الله زواجهم هنا اما جوري انا رافع يدي مالي حيله
الوجد بأبتسامه : تحمست لزواجهم ، جوري الوقت يجيبها
فيصل قام وهو حاضن الوجد على جنب : خلي هالمواضيع الي مالها داعي وخلينا ننام ورانا رحله بدري من صباح ربي
الوجد : تمام بنام بس استنى شوي بشوف ستريكات البنات
فيصل انسدح : الي ودك
،
انتهت العزيمه وجاء وقت الكرف
البنات لابسات قمصان روز ورابطاته على الخصر ورابطات شعورهم
الي معها مكنسه والي تغسل المواعين والي معها رشاش ومنشفه وحتى عهد وعهود انكرفو مع البنات
شيهانه تكنس : يوهه ياحياه الشقى وش هالشغالات الي ندفع لهم راتب كل شهر وينامون الساعه ٩
العنود تغسل المواعين : احمدي ربك انا عروس واكرف
جوري تمسح الطاولات : اقول اسكتي انتي وياها انا وراي علوم مانقلتها وقاعد اكرف معكم
عهود ترتب : شيهانه بسالك
شيهانه : وش تبين الله يستر
عهود : وش سار على فيسل؟
شيهانه : فيسل طاير بالوجد ورايح ينام بحضنها
عهود رمت المخده بالارض بقهر : شويه اسلوب!
شيهانه وفعت كتوفها : سالتي وجاوب وش المشكله
عهود : تستهزين فيني
شيهانه : وش الاستهزاء بالموضوع قلت فيصل بحضن حرمته بالحلال وين المشكله حرمته وش يزعلتس انتي
العنود معها القدر : عهود يرحم والديك فكيني من سالفه فيصل لاافقع وجهك بهالقدر هذا
عهود كشرت وطلعت
شيهانه بعلو صوتها : الخلا
جوري ناظرت عهد : الحقي اختس لاتجليسن تنصتين علينا تنقلين سوالفنا لختس
عهود ناظرتهم من فوق لتحت ونطقت بسخريه : من زين جلستكم عاد ! اجلسو اكرفو وانا واختي بننام
شيهانه تقدمت بتصفق عهد بالمكنسه الي معها لكن طاح القدر الي مع العنود والكل حط يده على فمه بصدمه وخوف
مع الهدوء والتوتر وانفاس الخوف سمعو خطوات الجده وصوت العصا الي تطق بالارض
شيهانه بلعت ريقها وهمست : جاك الموت ياتارك الصلاه
جوري : يقردنا وياسواد ليلنا
العنود بخوف : الحين العصا تلعب على ظهرونا
: الله لايبارتس بعدوتس انتي وياها ماودعتو المسلمين يرقدون مع المسلمين علامتس انتي وياها تسلطتو علانا بتالي هاليول
شيهانه : يجده خلـ...
الجده : البخي لاسمع حستس الله يعطيتس الصجه واللجه ماخليتيني ارقد زي باقي الناس
جوري : بس يـ...
قاطعته الجده : بس تعرش راستس الفقيه وعاني هالقدر افركيه انتي والداجات الي معتس لعنبو بليسكن توالي هاليول تخانقن تقل طويرات !
عهد : بس انا يـ..
الجده ديورت وتجاهلت عهد وطلعت من المكان
تنرفزت عهد وطلعت من البيت
شيهانه : حلالات بس من صفقها كف كفين ثلاث يسنعها
جوري : على بالطلاق ان دبجه عهد تجيب المطر
العنود : عزتي له تطلق قبل يجي
شيهانه : رحمت زوجها مبدياً

__________________
انتهى البارت ♡
رضيت بالله ربًا وبالإسلام دينًا وبمحمد ﷺ رسولًا ونبيًا)، ♡
حسابي تيك توك :Ot348285
حسابي انستا انزل فيه الروايه : Ot34828
النجمه تدعم الروايه✨

خوفتكم على الخفاش المختفي؟ مابغيت اسوي له حادث وشقى وحزن ومدري وش عشان سيناريو الحادث مستهلك جداً بين الروايات 🌷