Sazaye ishq. سزائے عشق Completed ✔️

Chapter 13

Kya kahun tum se main, ke kya hai ISHQ ,💕💕
Jaan ka rog hai, balaa hai ISHQ💕💕.

       🌼MEER TAQI MEER🌼

***~~~~~***~~~~~***~~~~~***

Subha ke 7 ho rahay thay aur Aayat kitchen main khari Aashir aur sub kay liye naashta bana rahi thi.

Zyada tar naashta wagaira uski ammi uskay uthnay se pehlay hi bana deti hain ,  par kal raat Aashir aur Rehana beghum Haadi ke ghar se thora dair se aaye ,  aur abhi Rehana beghum ko halka bukhaar bhi honay ki wajah se Aayat ne unhain kitchen main dakhil honay se sakhti se mana kar diya tha.

Us din jub Aashir ne Haadi malik ki dawat ka bataya to Aayat ko laga ke usay na chaara Aashir aur Uski ammi ke saath jana pare ga. Lekin wo phir se Haadi ka saamna nahi karna chahti thi. Par jub Aashir ne Rehana bghum se kaha ke wo chahta hai ke sirf Rehana beghum uskay saath chalain to Aayat ke dil ko sukoon mil gaya tha.

Aashir ne kaha ke Haadi se uski sirf office main jaan pehchaan hai. aur uskay kaafi israar ke baad Aashir ne uski dawat qabool karli thi , lekin usay Aayat aur Zarish ko uskay ghar saath le jana munasib nahi lag raha tha. Is liye sirf wo dono hi dawat pe gaye thay.

" Aapi.. bhai keh rahay hain jaldi naashta lao, unhain office ke liye dair ho rahi hai ." Zarish ne kitchen main daakhil hotay huway kaha , aur khud chaaye bananay lagi.

" paratha bana diya hai , aur lo ye anda bhi bun gaya , tum jao bhai ko ye de ao , main chaye le kar aati hoon. " Aayat parathay aur anday ki plate tray main rakh kar usay detay huway boli.

"Ji" sirf itna jawab de  kar wo tray lekar bahar chali gayi.

Aayat usay jaata dekhti reh gayi. Kayi dino se Zarish ka Aayat k saath isi tarha ka rawaiya rehnay laga tha. Aayat ko ye baat bohat hurt kar rahi thi. Aur Usnay kayi baar Zarish ko udaas ankhon ke saath apni soch main uljhay bhi paaya tha.

Lekin jub bhi Aayat us se baat karnay ki koshish karti , Zarish ka rookha lehja Aayat ko us se kuchh bhi poochhnay se rok deta.

chaaye bana kar wo bahar sub ke liye le gayi.

" bhaai aur kuchh chahiye" Aayat ne Aashir aur baqi sub ke saamnay chaaye ke cup rakhtay huway Aashir se poochha.

" nahi , Betho naashta karo tum bhi " Aashir ne usay apnay barabar ki chair ki taraf ishara kartay huway  kaha.

Aayat chup chap wahan beth gayi aur naashta karne lagi.

Naashtay ke baad Aashir office chala gaya. Aayat, Zarish aur Rehana beghum teeno living room main aa gayien.

Aayat ke kayi baar kehnay ke baad bhi ke wo apnay room main aaraam karain , Rehana beghum ne ye keh kar mana kar diya ke letay letay to wo aur beemaar mehsoos karti hain , aur wesay bhi ab unki tabiat kaafi behtar ho gayi thi. Is liye Wahien beth kar Tv dekhnay lagien.

Aayat unkay barabar main , jubkay Zarish doosray sofa pe beth gayi.

Aayat ke dil main baar baar aa raha tha ke wo apni ammi se kal ki Dawat ke baaray main poochhay.  pata nahi kyun Haadi ne achanak Dawat ki thi , Aashir bhai ki dosti nayi to nahien thi Haadi se , lekin achanak Aayat se mulaqat ke baad ye dawat ..,,?. Aayat ko is ki wajah samajh nahi aa rahi thi. Bil aakhir usnay apnay ander himmat paida kar hi li.

" Ammi..."

" hmm" Rehana beghum ki nazar saamnay tv pe chal rahay drama serial par thi.