Sazaye ishq. سزائے عشق Completed ✔️

Book 2 chapter 26

Book 2 chap 26

Kabhi to teri palkoon pay jhilmilaoun main
Tu intizaar karay aur aaoun main...

Samandar main lay ja kar fareb mat dena FAraZ
Tu kahay to kinaray pe hi DOOB jaoun main....

🌹AHMED FARAZ🌹

🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿

" assalaam u alaikum..." Halki awaaz aur narm lehjay main kiye gaye salaam par Aayat apni kefiyat se nikal kar uski taraf mutwajja huwi.

Safaid dupatta jis par neelay rung ke chhotay chhotay phoolon ki karhaayi ki gayi thi khoobsurat chehray ke gird lipta huwa nooraani rungat main aur izaafa kar raha tha.

" Wa Alaikum assalaam...apni androoni kefiyat ko chhupaatay huway Aayat ne halki muskaan ke saath wesi hi narmi se salaam ka jawaab diya .

" Mera naam Nasreen hai ,maaf kejiye ga main pehlay aap se milnay nahi aa saki , wo darasal jub aap log aaye us waqt se main baawarchi khaanay main masroof thi.... aap kesi hain..?.." Pehli nazar main hi Aayat ko is nayi larki ki saadgi ne mutaasir kar liya tha.

" Koyi baat nahi , mera naam Aayat hai...wesay aaj ka khaana aap ne banaya tha....?" Is tarhaan Aayat ne baat ko jaari rakhna chaaha shayad wo khud apnay dimaag ko masroof rakhna chaahti thi.

Kapray almaari main hang karnay ke baad Kuchh dair wo Nasreen ko apnay paas bitha kar us ke saath baatain karti rahi jis se usay pata chala ke Nasreen uski hum umar aur bewaah thi.

8 saal pehlay uski shadi uskay chacha zaad se huwi thi Par do saal qabal wo ek haadsay ka shikaar hokay foat ho gaya , uska koi bacha bhi nahi tha jis ki wajah se wo apnay susraal main bhi na reh saki , aur tab se uskay waalid ke kehnay par Nasreen wapas apnay amma baba ke saath rehnay lagi.

" in do saalon main Fatima chachi ne tumharay liye koyi munaasib rishta talaash nahien kiya..?" Ye jaantay huway bhi ke ye sawaal poochhna munaasib nahien par wo khud ko rok na saki.

" nahien.... humaray haan doosri shaadi ka rawaaj nahien , ek rishta aaya tha par baba ne mana kar diya. " Nasreen ne halki muskaan ke saath bataya jo uski aankhon main chhupi udaasi se yaksar mukhtalif thi.
Aayat ko uskay liye bohat bura mehsoos ho raha tha.

Thori dair aur idhar udhar ki baat ke baad Nasreen wahan se chali gayi aur Aayat ek baar phir us kamray main akeli reh gayi. Jis ke saath hi kuchh dair ke liye khaamosh sochain phir jaag uthi thien.

Karachi main Mateen ke saath room share karna alag baat thi, wahan us ghar main baaqi sub log thay , par yahan.... yahan wo khud ko Mateen ke saath bilkul tanha mehsoos kar rahi thi. Dimaag na jaanay kya kya sochnay laga tha. Dil ko kayi baar samjhaanay par bhi uska dil khauf ke maaray uskay seenay se nikalnay ko tayaar tha. Baar baar ye soch uskay dimaag main ghoom rahi thi ke agar Mateen ne phir se uskay saath kuchh......

Wo jo aaraam ke garz se kamray main aayi thi , bechaini ki zad main aa kay aaraam ke baaray main to bhool hi gayi thi. Par abhi is baaray main wo kisi aur se kuchh keh bhi nahi sakti thi. Kamray main nangay paaoon tehalti wo inhi sochon se ghiri huwi thi ke uskay mobile ke bajnay ki awaaz par usnay apnay pars se apna mobile nikaala. Aur screen par Aashir ka naam dekh kar usnay bina ek second zaaya kiye call attend ki.

" Assalaam u Alaikum Aayat.." Apnay azeez az jaan bhaai ki awaaz suntay hi uski aankhon main paani bhar aaya tha.

" Wa Alaikum salaam bhaai..." Koshish ke ba wajood wo apni awaaz se larzish chhupa na saki.