Sazaye ishq. سزائے عشق Completed ✔️

Chapter 26

chapter 26
Bichrra jo aik baar to milte nahin dekha,
Iss zakham ko hum ne kabhi silte nahin dekha,
Ik baar jisse chaat gayi dhoop ki khawhish,
Phir shaakh pe uss phool ko khilte nahin dekha

              PARVEEN SHAKIR

💕💕💕💕💕💕💕💕💕💕💕

naa jaanay kya waqt huwa tha jub Aayat apni neend se neem bedaar huwi thi. Uska poora jism dard kar raha tha , aur dimaag is qadar bhaari. Us ne yak dum apnay  haath se apnay sar ko thaam liya.

Jub aankhain kholi to saamnay deewaar pe lagay globe ki halki roshni bhi uski Aankhon ko takleef de rahi thi, Aayat ne kayi baar Aankhay jhapkaatay huway ,apni Aankhon ko us roshni ka aadi banaya.

Wo karwat badal kar doosri taraf huwi, aur is halki si harkat pe bhi uskay pooray  jism main dard ki taissay uthna shroo ho gayi thien.

Baathroom ka Darwaza khula aur Zarish ne Aayat ko Jaagta dekha to uskay bed ke paas chali aayi.

" Aapi ab kesi tabiat hai aap ki..?" Wo Bed pe beth kar Aayat ki tapti paishani par haath rakh kar poochhnay lagi.

" aap ko to ab bhi bukhaar hai.."

" time kya huwa hai Zarish.." Zarish ki baat pe gor na kartay huway Aayat ne Zarish ki madad ke saharay  uth kar bethtay huway poochha, deewaar pe lagi watch roshni kam honay ki wajah se usay saaf dikhaayi nahi de rahi thi.

" abhi raat ke 8 ho rahay hain... aap ne din se kuchh nahi khaaya,  rukiye main aap ke liye khaana laati hoon , phir aap paracetamol kha lena. Mujhay pata hai is waqt aap ka poora jism dard kar rha hoga. "

Zarish ye keh kar , bina Aayat ka nafi main jawab sunay wahan se uth kar kamray se chali gayi.

Zarish ke din kehnay se Aayat ke zehn pe phali dhund ek jhatjay se chhatnay lagi,  aur Aaj huwa  saara waaqya uski Aankho'n ke gird ghoomnay laga.

Mateen..!!!

Aaj usnay Paanchh saal baad Mateen ko dekha tha, us shakhs ko jo uski barbaadi ka sabab tha.

Mateen ke khayal se hi  Aayat ki reerh ki haddi main sard lehar dor gayi thi. Aur Uski humaisha ki bewafa Aankhain phir bhar aanay ke darpe thien.

Wo yahan Pakistan kya kar raha hai..? Kya wo uskay liye Aaya hai..?

Nahien...!!  Wo uskay liye nahien aa sakta..!!

Phir kyun..??!!

Aayat ka dimaag ek jung main main mubtla ho raha tha, wo apnay dimaag ke banaye gaye dalaail ko qaboolti aur Jhutlaati rahi. Aisa lag raha tha, jesay uska dimaag ek aur makhlooq hai, Aayat se juda.

Uska gala theekray ki tarhaan khushk mehsoos ho raha tha. Aayat ne kaanptay haath ke saath side table pe rakha paani ka glass uthaya aur saara paani ek saans main galay se undailne lagi.

"Aapi Ammi ne aapki favourite dish "pulaao" banaya hai" Zarish haath main plate pakray kamray main daakhil hotay boli. Aayat ne glass hoto'n se hatate huway Zarish ki taraf dekha.

Mateen Zoyan ke saath tha... jis se Zarish shadi karna chahti hai..ye soch uskay zehn se guzri.

" kya huwa aapi..? Aap theek to hain ..?  " Zarish ne Aayat ka urta rung dekha to wo Pareshan ho gayi .