😂😂😂😂😂
......: سسسسسيف ! الحقنى
سيف : مالك بس يا حبيبتى
خرجت له وهى ماسكه السكينه : بقولك ايه لم عيالك عنى عشان مقتلهمش ونخلص
سيف : طب نزلى السكينه ، السلاح ممكن يطول
ايه إللى حصل لكل ده
إسراء : طول اليوم يا فشار يا كيك تقوم تيجى بنتك المفعوصه تقولى الكيك بيكون طعمه وحش
بص اعمل انت وعيالك الأكل إللى يريحك
سيف : دى لسه صغيره ومش فاهمه حاجه
إسراء : دا مكنش حظر ده
رهف : ريلاكس مامى
إسراء : سامع المحروسه بنتك
ثم قالت وهى تقلدها : ريلاكس مامى
سيف : عيب كده يا اولاد لازم نسمع كلام مامى
الأطفال :حاضر
إسراء : عشان نكون على اتفاق ؛ طول فترة الحظر إللى عايز حاجه يقوم يجيب لنفسه ؛ أنا مش الخدامه الفلبينيه بتاعتكم
هادى : على فكرة يا مامى ؛ أثبتت الدراسات العلميه إن الست إللى بتقول كده جوزها بيتجوز عليها
صح يا بابا ؟
سيف : صح يا حبيبى
إسراء : هو ايه إللى صح ، عايز تتجوز عليا يا سيف
سيف : لا طبعا مش صح
إسراء : يووووه ؛ أنا عايزه راحه يا بشر
طب انتو كل واحد اخد اجازة واعدتو فى البيت
أنا اتجننت خلاص
سيف : إهدى بس يا حبيبتى ؛ هروح العب مع الاولاد على ما تجهزى المحشى
إسراء : وكمان عايز محشى ؛ لا وهتروح تلعب مع الاولاد
سيف : خلاص هساعدك فى المحشى تكرما منى بس
إسراء : هتعرف ؟
سيف : عيب عليكى ، دا انا اول ما هدخل المطبخ هتحسى انك معاكى الشيف شربينى
رهف : يحيا بابى
هادى : متأكد يا بابا ؛ والا هنموت من الأكل بدل ما هنموت من كورونا
سيف : استنوا بس دا أنا هبهركم ، يلا يا حبيبتى
إسراء : انت رايح فين ؟ المطبخ من الناحيه دى
هادى : دا انت حتى مش عارف المطبخ فين يا بابا
سيف : لا عارف طبعا بس اتوغوشت
إسراء : إما نشوف الشيف شربينى إللى جواك
........................
بدأوا فى لف المحشى
إسراء : كل ده ولسه ملفتش صابع واحد يا سيف
الطم يا ناس ، أمال فين الشيف شربينى
سيف : أصل المحشى بيزحلق
إسراء : ما تتزحلق عليه بالعجله ونعمل خمسات
سيف : ههههه ، دمك خفيف أوى يا حبيبتى
إسراء : برااااا
سيف : برااا فين ؟
إسراء : برااا بيتى
سيف : بس دا بيتى
إسراء : قصدى برااا مطبخى ، برااا يا سيف
سيف : استنى بس هعمل السلطه طيب
إسراء بدموع : يارب ، صبرنى يارب
الله يخربيت الصينين على بيت كورونا ؛ يارب خدنى يارب وريحنى
.....................
خرجت إسراء الصاله بعدما انتهت
إسراء : راكب عجله ابنك يا سيف
سيف : دا أنا بعلمه إزاى يركبها بس
هادى : انزل بقى يا بابا
وضعت إسراء يدها على رأسها : الطف بيا يارب
جلست رهف إلى جانبها : متزعليش يا مامى
إسراء : بت انتى انا عرفاكى ، قولى عايزه ايه
رهف : ريلاكس يا مامى ؛ مش كده
إسراء : ريلاكس تانى ؛ اه يا أنا يا صغيره على الهم يا انا ؛ عايزه ايه اخلصى
رهف : عايزه كيك بالشوكولا
إسراء : لا عشان انا الكيك بتاعى وحش
رهف : مين إللى قال كده بس ؛ دا انتى بتعملى أحسن كيك فى المجره كلها
إسراء : بقى كده
رهف : اه والله كده ؛ هاتى حضن بقى لبنتك حبيبتك
بعد قليل من الوقت
إسراء : يلا عشان هناكل
رهف : الله ! السلطه طعمها جميل يا بابى
هادى : السلطه عاديه يعنى ؛ ماما بتعملها أحسن
إسراء بفرح: حبيب ماما يا ناس
هادى : بس برضو المحشى عادى
إسراء وهى تخبط بيدها على الطرابيزه : نعم يا روح امك
هادى : إهدى يا ماما ، عنيفه انتى أوى ؛ سيبينى أكمل كلامى
إسراء : كمل يا اخويا
هادى : المحشى عادى بس روعه عشان انتى إللى عملاه
هدأت إسراء : هو دا الكلام
بعد أن انتهوا
إسراء بخبث : بابا هيغسل الأطباق
نظر لها سيف قائلا : أنا ؟
إسراء : ايوه انت يا سيف عشان تورى الأطفال انهم لازم يسعدوا ، لازم تكون قدوه لهم يا حبيبى
سيف : ربنا على الظالم والمفترى
إسراء : قصدك إن أنا ظالم ومفترى
سيف : لا خالص ؛ دا حد كده جه فى بالى
.....................
اجتمع الجميع أمام التلفاز ودخلت إسراء لتجلب لهم الفشار والكيك
إسراء بصدمه : ايه ده ؟
هادى : مفيش يا ماما بس بما إن مفيش إمتحانات فقررنا نعمل زينة رمضان بالكتب
إسراء : يا خبتى السوده ؛ زينة رمضان
رهف : بدل ما نرميها يا ماما ، خسارة
سيف : هاتى يا حبيبتى الصينية إللى فى ايدك دى
نظرت رهف بداخل الصينيه ثم قالت : ايه ده ؛ أمال فين البطاطس المحمرة ؟
إسراء : وكمان كنتى عايزه بطاطس محمره
رهف : ايوه يا مامى
إسراء : لا بقى ، وربنا ما ينفع كده ، أنا اطالب السلطات العامه والخاصه وسيادة الرئيس عبد الفتاح السيسي والسيد رئيس وزارة التربيه والتعليم
إنهم يرجعوا الأشغال والمدارس تانى والقهاوى
هموت يا ناس هموووت
نظر سيف ورهف وهادى إلى بعضهم ثم قالوا فى نفس واحد : ريلاكس مامى
يوميات عائله مجنونه
ندى عماد
