😂😂😂😂
بدر :حسام !
حسام : إيه ؟!
بدر : حد يقول لخطيبته فى التليفون ايه ؟
حسام : أمال اقول ايه ؟
بدر : لما أنادى عليك تقول نعم يا حبيبتى ، يلا نجرب تانى
حسام : ماشى
بدر : حسام !
حسام : إيه ؟
بدر : برضو ايه ؟
حسام : مالها بس الكلمه ماهى عسل أهى
بدر : المهم كنت بتكلم مين الساعه 34 : 3
حسام : انتى حاسبه بالدقايق كمان
بدر : اه وقعدت تتكلم 6 دقايق و 41 ثانيه مع انك قولت ليا هقفل عشان وراك شغل
حسام : هكلم مين يعنى ، كنت بكلم صاحبى عشان نتفق هنمشى وقتيه
بدر : طب لما بعتت لك رساله قمت قافل ليه
حسام : قفلت عشان انام عشان عندى شغل
بدر : لا انت شكلك مش بتحبنى يا حسام
حسام : يعنى انتى شايفه كده
بدر : ايوه ، وبقيت بتكون مشغول كتير ؛ انا مخصماك أصلا ، سلام
حسام : مالها دى ، أنا كان إيه إللى خلانى أخطب
كنت عايش مرتاح ولا نكد ولا غيره
.................................
بعد مرور يومين
أميره : مالك قاعده شبه المطلقين كده ليه ؟
بدر : اسكتى عشان انا مخاصمه حسام
أميره : مش هو دا حسام إللى اخترتيه وحبتيه
بدر: دا حتى ماتصلش بيا وصالحنى
أميره : ليه حصل ايه ؟
حكت لها لتقول أميره : بت انتى بجحه صح ! يعنى معملش حاجه ومخصماه وعيزاه كمان يجى يصالحك ؛ المفروض انتى إللى تصالحيه
بدر : يعنى انتى شايفه كده
أميره :ومش شايفه غير كده
بدر : انتى بتشوفي أصلا
أميره : تصدقى بالله انك عيله باردة وخسارة فيكى الواد حسام ده
بدر : أيوه انا شفت الحوار ده فى المسلسلات كتير
صاحبة البطله بتقول كده وبعدين تكتشف انهم اتخطبوا
أميره : أنا اتأكدت انك مجنونه
بدر : طب اسكتى بقى عشان أكلم حسام
أميره : مش انتى مخصماه
بدر : اه
أميره : طب هتتصلى بيه ليه
بدر : عشان اقول له إنى مخصماه
أميره : قوليلوا قدامى
بدر : لا مينفعش عشان كده عيب
أميره : يعنى بتطردينى عينى عينك كده
بدر : أيوه بالظبط ، هو دا
أميره : ماشى يا بدر
بدر : ماشى والا بيعرج
أميره : لا ماشى ولا بيعرج ؛انا خارجه ومن غير سلام بس بقى
بدر : مع السلامه
.................
اتصلت بدر بحسام
بدر : حسام !
حسام : ايه ؟
بدر : برضو ايه ؟
حسام : خير
بدر : طب قولى حتى مالك اسألنى
حسام : مالك ؟
بدر : لا مش كده ؛ اسمها مالك يا حبيبتى
حسام : مالك يا بدر ؟
بدر : عرفت بقى إنك مستخسر فيا كلمه حلوه
حسام : طب مالك من غير كلمه حلوه ؟
بدر : مليش
حسام : طب مقموصه ليه طيب ومش بتردى عليا
بدر : مش مقموصه أنا
حسام : قولى بس
بدر : ما انت لو مهتم كنت عرفت لوحدك
حسام : طب اقفلى يا بدر أحسن
بدر : هقفل يا اخويا ؛ هقفل
حسام : تعرفى يا بدر كل ده هيطلع عليكى يوم كتب الكتاب إللى هو بكره
بدر : بكره إزاى ؟
حسام : زى ما بقولك كده ؛ هيكون تخليص حق
بدر : استنى بس
حسام : إيه تانى ؟
بدر : تزعلش كنت بهزر
حسام : طب اقفلى
بدر : طب مين إللى عامله لك لايك على صورتك الشخصيه الساعه 12: 7
حسام : هعرفها منين يعنى وبعدين انا مفتحتش فيس
بدر : طب طلقني يا حسام
حسام : هو احنا لسه اتجوزنا أصلا
بدر : بقولك طلقنى
حسام : طب لكِ عليا يا ستى أول لما اجوزك بعدها بكام سنه كده ابقى اطلقك ان شاء الله
بدر : طب رجعنى
حسام : لا ! مفيش تغيير ؛ واللى بيروح مش باخده تانى
بدر : طب خلاص مش هطلق
حسام : يستحسن برضو بس انا حابب أطلق مرة من نفسى بقى
وأغلق الإتصال
.....................
يوم كتب الكتاب الصبح
أميره : انتو مش كنتوا متخاصمين امبارح
بدر : اه ومازلنا
أميره : هتتجوزوا وانتو متخاصمين
بدر : أنا شاكه إنه هيتجوزنى عشان ينتقم منى زى الروايات كده ؛ بس هينتقم منى على ايه ؟
أميره : يا دى الروايات إللى لحست دماغك ؛ انا هروح آكل
بدر : استنى ؛ فكرى معايا
أميره : مش انتى بتحبيه
بدر : اه
أميره : وعايزه تتجوزيه
بدر : اه
أميره : وهو الوحيد إللى اخترتيه
بدر : اه
أميره : خلاص بقى تك أوه منك له
بدر : بس يا اميرة متقوليش كده عليه
أميره : اه يا أنا مرارتى هتتفقع
...................
بعد كتب الكتاب
بدر : هو انت صح هتطلقنى
حسام :أنا بقول أجرب ونطلق واحده من ال 3 بس انا بحبك ومش هقدر بس برضو عايز أجرب
بدر : لا خليهم ال 3 هنعوزهم بعدين
حسام : بعدين إزاى يعنى ؟
بدر : يعنى لما نتخانق على الريموت وأقولك طلقنى يبقى طلقنى كده واحده
حسام : والتانيه ؟
بدر : لما اجيب شيبسى وتفكر تأكل معايا والتالته بقى لما اقولك خرجنى وانت تقولى لأ
حسام : معاكِ حق
بدر : بس لما اقولك رجعنى هترجعنى على طول
حسام : انتى فكرتي فى الطلاق وفى كل كلمه قولتها ونسيتى الكلمه الرومانسيه إللى اتقالت فى النص
بدر : الرومانسيه مش هتلاقيها غير فى الأكل
حسام : أكل !! أنا هموت مقتول حد يلحقنى
😂😂😂😂😂😂
تفتكروا برج بدر ايه ؟ 😂😂
مش محتاجه اقول انه غير واقعى وإنه للهزار 😌
ندى عماد
