😂😂😂😂😂
محمد ( الأب ) : بصوا يا ولاد تعالوا اقولكم على الخطه
ليليان : ولو اتكشفنا يا بابا
أسر : هيبعنا زى كل مرة ونطلع احنا الغلطانين
يوسف : صح ؛ الواد أسر صح
أسر : متقولش واد أنا الكبير
محمد : بسسس ؛ أمكم هتسمع
......
حنان( الأم ) : الله الله ، ايه ربطة المعلمين إللى انتو عاملنها دى
يوسف : مفيش حاجه يا ماما
حنان : لا إزاى مفيش حاجه ، دا القعده دى مش بتتقعد إلا لما تخططوا لحاجه
ليليان : هقولك أنا يا ماما
حنان : شوفوا ليلى حبيبة قلبى هتقولى
ليليان : بابا كان عايز يعمل مفاجأة لكى
حنان : بجد ؟
محمد : مفاجأة ايه دى ؟ لا طبعا مش عامل مفاجأت
حنان : أكيد بتحاول تخبى صح
أسر : مفاجأة إيه يا ماما الموضوع مش كده ، كنا بنخطط إزاى نقنعك إنك تعملى لنا النهاردة مكرونه بالبشاميل
حنان بغيظ : مكرونه بالبشاميل !!
يوسف : أيوه يا ماما وجنبها صينية بسبوسه
أسر : ويا سلام بقى يا ماما لو جيلى كمان
حنان : بقى كده !
ليليان : اه والله الموضوع كده ؛ مكناش بنخطط لقتلك ولا حاجه
حنان : بص بقى منك له انت وهى ومعاكم أبوكم
المواعين جوا ، أصلى وأرجع ألقيهم مغسولين
ليليان : اسمعوا كلام ماما
حنان : ما انتى معاهم يا أختى
ليليان : لا إزاى ؛ ليلى هتصلى مع ماما ؛ مش انا حبيبة قلبك يا ماما
حنان : المواعين يا ليلى وبلاش جدال إنتى صليتى مع اخواتك
ليليان : ايه يعنى هصلى تانى واهو كله بثوابه
حنان : بصى يا بت انتى يا أم لسان ونص بلاش غلبه
محمد : حاضر يا حبيبتى هنغسل المواعين حاضر
أسر : عاش يا بطل
محمد : تعالوا هنتسلى شويه
دخلوا المطبخ
يوسف : مش انت برضو يا بابا إللى قولت إن احنا مش لازم نخاف
محمد : ايوا طبعا مش لازم نخاف من حاجه
يوسف : أمال انت بتخاف من ماما ليه ؟
محمد : أحم أحم ؛ لا يا حبيبى أنا مش بخاف منها أنا بحترمها بس
ليليان : طب عينى فى عينك كده
أسر : على فكرة يا بابا ؛ أثبتت الدراسات العلميه الحديثه والقديمه والمستجده أن الأسد هو الحيوان الوحيد إللى بيخاف من مراته ؛ يعنى لو انت بتخاف من ماما يبقى انت أسد
يوسف : عاش يا أسد
محمد : بس يا ولد منك له ، أنا هغسل وانتم تشطفوا
ليليان : وأنا هتفرج عليكم
يوسف : ليه بقى إن شاء الله
ليليان : عشان لسه حاطه مونوكير وكده هيبوظ
محمد : هترصى انتى يا ليلى
......................
أسر : بابا
محمد : يا نعم
أسر : هننفذ الخطه وقتيه
يوسف : وطى صوتك
ليليان : وسع كده يا يوسف ؛ احنا نجيب يا بابا الشيبسى ونخلى عمو عبدو البواب يحدفه من البلكونة
أسر : على فكرة احنا لو اتمسكنا أنا مش معاكم
يوسف : ولا أنا
ليليان : وطبعا انا كمان مش معاكم ، بس لو جبتوا شيبسى هاكل معاكم
محمد : حيث كده بقى هجيب انا الشيبسى واكله لوحدى
أسر : تخيلوا كده منظرنا واحنا بنتهزق من ماما
وطول اليوم بنخطط إزاى هناكل كيس شيبسى
محمد : الواد ده معاه حق
أسر : مش ابنك بقى
محمد : احنا ناكل الأكل إللى ماما عملاه بما يرضى الله أحسن
يوسف : وأنا بقول كده
................
ليليان : ماما ؛ تعالى اقولك على السر
حنان : قولى يا أخرة صبرى
ليليان : كده يا ماما ؛ دا انا بحبك وجايه احكى لكى أهو
حنان : قولى يا أختى واشجينى
ليليان : ما انا مش هقول إلا لما آخد شوكولا ، دا سر خطير خالص
حنان : بت انتى يا تقولى بالزوق يا تمشى ؛ شوكولا ايه مش كفايه سنانك كلها مسوسه
ليليان : مش عارفه انا يا ماما ليه معامله مرات الأب دى ، خليكى حونينه
حنان : حونينه ؟! فين شبشبى
ثم تابعت : الطف بيا يارب ، يارب متجننيش يارب
يا تعقلهم يا أتجنن أنا
..................
حنان : الأكل جهز
أسر : مش واكل
يوسف : ولا أنا
حنان : وانتى يا مقصوفة الرقبه
ليليان : أنا باكل فى كل الأوقات فمش هتفرق
حنان : قدامى على الأكل ، غسلى ايدك واقعدى جنب ابوكي على ما اجى
ليليان : ماشى
حنان : مش عايزين تاكلوا ليه يا بشوات
أسر : عشان كنت عايز مكرونه بالبشاميل
يوسف : وأنا عايز بسبوسه
حنان : وانا كنت هعمل دا كله وقتيه ، دا احنا لو فاتحين مطعم مكنش هيكون الطلب كده
يوسف : برضو مش هاكل
حنان : اه دا انتوا عايزين لكل واحد نوع آكل على السفره عشان يعجب
أسر : ياريت
حنان : دماغى هتطير يا عالم ؛ يخربيت العيال وسنينها ، كنت قاعده مرتاحه كان مالى ومال الجواز أصلا
.................
جلس الجميع يشاهدوا التلفاز
حنان : كل واحد يروح ينام
ليليان : استنى بس يا ماما لما نشوف ايه إللى هيحصل
محمد : هاتى طبق الفشار ده يا حبيبتى
أسر : وأنا يا ماما قربى كوباية العصير ده
حنان : وانت مش عايز حاجه يا سى يا يوسف
يوسف : حدوته يا ماما
ليليان : وانا نبع الحنان بطاطس محمره
حنان : مش عايزين قهوة بالمرة
محمد : ياريت يا حنون
أسر : القهوة بتاعتك جميله يا ماما
حنان : معاكم 5 دقايق إللى هلاقيه قدامى هو حر
ليليان : حتى انا يا ماما
حنان : دا انتى اولهم ، كان مستخبى ليا فين ده يارب ، أنا ناقصه جنان ؛ وكمان حظر
منكم لله يا صينين ؛ هيحصل ايه يعنى لو اكلتوا رز و ملوخيه أو عدس
يوسف : تزعليش يا ماما
حنان : انت لسه هنا
يوسف : يعنى دى جزاتى إنى جاى أطبطب عليكى
حنان : أمشى من وشى أحسنلك
يوسف : همشى بس متنسيش تيجى تحكى ليا حدوته
حنان : حسبى الله ونعم الوكيل فى إللى كان السبب
كنتوا بتناموا من المغرب زى الفراخ ولا حدوته ولا غيره
حسبى الله
😂😂😂😂😂
كانت معكم حنان وأسرتها فى
يوميات عائله مجنونه
" الأسكريبات بتكون غير واقعيه ، قد يكون فيه اسكريبت شبه واقعى لكنه فى الأساس غير واقعى
للهزار والترفيه فقط "
ندى عماد
