😂😂😂😂
شيماء ( الأم ) : الأكل جهز يا أولاد
حازم : الأكل حامى ليه يا ماما
شيماء : أمك ولا طبخت ولا عملت ، دى الست أختك إللى عملت فيها ست العارفين ودخلت تطبخ
جنى : أنا ! دا أنا بريئه براءة الذئب من دم يوسف ابن يعقوب
حازم : لااااا ، مش قادر الأكل حامى خالص
أحمد ( الأب ) : فعلا الأكل حامى
ميار : وأنا بقى يا صغيره إللى هعرف آكل الأكل الحامى ده ، عايزين بديل
جنى : انتو ليه كده ؛ اهدوا يا جماعه ، فيها ايه يعنى لما الأكل حامى ، لازم يكون فيه إثارة فى الأكل
شيماء : إثارة !! الله يرحم
جنى : قصدك ايه يا ماما
شيماء : منك لله يا جنى يا بنتى روحى
أحمد : احنا هنتفرج على التلفزيون على ما الأكل يجهز
شيماء وهى تخبط بيدها على السفره : لا ، اسمعوا بقى إللى عايز ياكل يجى ورايا على المطبخ
جنى : صح كده ، اتعلموا إزاى تأكلوا بإيدكم
ميار : ما احنا طول عمرنا بناكل بإيدينا حد قالك إن احنا بناكل من رجلنا ، بتتكلمى كلام غير منطقى خالص يا جنى ، خالص خالص يعنى مش خالص بس
شيماء : اسكتى انتى يا مفعوصه ، اسكتى
ميار : متقوليش مفعوصه يا ماما ؛ أعملى ليا احترام شويه قدام اخواتى
شيماء : بت انتى اتلمى أحسن وربنا انتى عارفه إللى فيها
أحمد : استأذن أنا بقى
حازم :وأنا كمان أستأذن من الخناقه الجماعيه دى
شيماء : على فين يا روح امك ؛ كله هيدخل يساعد
حازم : كلم يا بابا ، ماما قصدها عليك
احمد : لا قصدها عليك انت يا خفيف
شيماء : خمس دقايق ونكون كلنا فى المطبخ
ميار : ما تخلصوا بقى احنا جعانين
شيماء : عشان انا أمكم وقلبى رقيق ورهيف ، مسئوليتكم كلكم أنكم تشتركوا وتعملوا سلطه
حازم : وأنا موافق ، هشرف عليهم أنا يا ماما عشان مياكلوش الطماطم
ميار : وأنا هتفرج عليهم
جنى : وانا مش هتدخل عشان متطلعش حاميه
أحمد وهو ينظر فى ساعته : وأنا ورايا ماتش
شيماء : يا حلاوة يا ولاد ، طب ما اعملها أنا أحسن
الكل فى نفس واحد : ياريت
شيماء : لا بقى ما احنا مش كل يوم هنعمل مشكله عشان الأكل
ميار : فعلا معاكى حق يا ماما ؛ لازم نسيب وقت عشان مشكله الغسيل
جنى : وطبعا التنظيف
أحمد : والشباب والرجاله أصلا ملهومش دعوة بالحاجات دى
حازم : ايوه احنا مالنا أصلا ؛ يلا يا بابا ورانا ماتش
شيماء : انتوا هتسيبونى لوحدى مع الإتنين دول
جنى : مالهم الإتنين دول
ميار : دا احنا عسلات
شيماء : شايف يا أحمد بناتك
أحمد : عيب يا بنات نسمع كلام ماما
شيماء : لا مهو احنا لو متلمناش هغور فى ستين داهيه ومحدش هيعرف طريقى
ميار : بس انا هاجى معاكى يا ماما فى كل داهيه تروحيها
حازم : وأنا عارف حتة داهيه إنما ايه حكايه
شيماء : أنا بقول يا أحمد ان احنا نودى العيال دى عند ماما يقعدوا عندها طول العمر وهى مش هتمانع طبعا
أحمد : ياريت
الاولاد : هو ايه إللى ياريت
حازم : هتتخلى عننا يا ماما ، هتتخلى عن ابنك حبيبك
ميار : وأنت يا بابا ؛ هتسيب ميار تروح ، طب مين هيصحيك الصبح ويكب على وشك مياه
أحمد : علشان العمله دى بقى انا موافق أوى كمان
جنى : طبعا أنا ليا معزة فى قلوبكم ومستحيل تسيبونى صح ؛ والا مين إللى هيغسل المواعين يا ماما
شيماء : احنا ممكن نسيب جنى عشان تغسل المواعين
جنى : إن شاء الله يخليكى
حازم : دى بتشحت
......................
شيماء : نقف كلنا صف واحد عشان هنسمع إللى حفظناه ؛ مين الأول
حازم وهو يقرب جنى : جنى هى الأول يا ماما
جنى وهى تقرب ميار : لا ميار هى الأول
ميار وهى تمسك بيد والدها : لا طبعا مينفعش
لازم بابا هو الأول
جلس أحمد أمامها وهو يقول لميار: بس انا خلصت تعليم من زمان ؛ ثم قال وهو ينظر إلى شيماء : مساء الخير يا حبيبتى
شيماء : مساء النور
أحمد : أنا بقول بلاش تسميع النهاردة
جنى : معاك حق فعلا ؛ خلاص الوزير قال مفيش امتحانات
حازم : يبقى نذاكر ليه يا ماما ؟
شيماء : ويبقوا عيالى فاشلين ، مش كفايه مجانين
ميار : احنا مجانين يا ماما ؟ الله يسامحك
حازم : طب بلاش تسميع النهاردة بس
شيماء : هنسمع والغلطه بحساب
جنى : ما نخلى الحساب ليوم الحساب ، ما تقول حاجه يا بابا
أحمد : أنا ورايا ماتش ؛ إللى هسمع صوته هرميه من الشباك
جنى : ياريت حتى نشوف الشارع على الأقل
أحمد : ما انا اصلى هعقلك فى حبل البلكونة ولا منك طايله شارع ولا بيت
جنى : يوووه ، وبعدين دا ماتش قديم أصلا
حازم : فيه بنت محترمه تقول لأبوها يووه ؛ وانت ساكت لها يا بابا
جنى : اطلع منها انت بس
ميار : بيهدى النفوس يا جنى
أحمد : وربنا انا زهقت وقرفت من عيشتي ؛ كانت اجازه سوده
شيماء : عشان تعرف ، أنا طول السنه فى الدوشه والموال ده ، بس المدارس كانت رحمه والله
ميار : رحمه بس والا رحمه ونور
جنى : اهدوا بسسسس ، أنا شامه ريحة حاجه بتولع
حازم : اه فعلا
أحمد : انتى حاطه حاجه فى الفرن يا حبيبتى
شيماء وهى تأكل جزر : اه الكيك
هرولت سريعا ما إن أدركت الموقف قائله : الكيك باظ ، هو اليوم باين من أوله أصلا
ميار وهى تنظر للكيك : تصدقى فعلا اتحرق ، أمال انا مش شامه ريحة ليا
شيماء وهى تقلدها : تصدقى فعلا اتحرق ؛ حد قالك إنى عاميه ؛ وبعدين انتى كل الحواس عندك مش شغاله أصلا
....................
خرجت شيماء من المطبخ وخلفها ميار
حازم : حصل ايه ؟
شيماء : الكيك اتحرقت
جنى : متزعليش يا ماما ؛ وايه يعنى لما اتحرقت أعملى غيرها
شيماء : اه وماله نعمل غيرها أصل الموضوع بالساهل وقاعده أنا على قد الكيك ؛ دا انا قعدت 3 ساعات عشان افرق بين النشا والبيكنج بودر والكريمه
ميار : معلش يا ماما ، بابا هيعمل واحده تانيه
أحمد : بابا ماشى
شيماء : رايح على فين
أحمد : هروح اقعد انا عند أمى ، أصلها وحشتنى أوى
حازم :طب هات معاك شيبسى يا بابا
ميار : وبونبونى وشوكولا
جنى : وطبعا بسكويت ومعاه شوية حلويات كده
أحمد : أنا رايح عند أمى مش رايح أتسوق ، أنا مش ناوى أرجع تانى أصلا
ما إن خرج أحمد حتى نظر الأطفال إلى والدتهم ليبتسموا لبعضهم
شيماء : عارفه أنا النظره دى ، لو متلمناش وقعدنا ساكتين كافين شرنا هيبقى يوم ما يعلم بيه إلا ربنا
حازم : هو انا اتكلمت حتى
ميار : يعنى هو انا اللى اتنفست
جنى : دا انا حتى مضحكتش
شيماء : يا وقعتك السوده يا شوشو، يا خسارة شبابك وأيامك
قامت من على الكرسى وهى تقول : ابوكم وطفشتوه وربى لو ما اتلمينا وقولتوا يا مسا هسلم عليكم بالشبشب ؛ هو فيه ايه بقى ؟
حازم : مفيش يا ماما
جنى : دا احنا كنا رايحين ننام
شيماء : طب تصبحوا على خير
الاولاد : وانتى من أهله
...............
شيماء : أخيرا هسمع فيلم على رواق
وبينما هى تشاهد الفيلم
جنى : مش عيب يا ماما تسمعى فيلم من غيرنا
ميار: لا وبتاكل فشار من غيرى
حازم : والا اللب ، يرضيكى تاكلى من غير ولادك
شيماء : هو فيه ايه، الواحد ميعرفش ياخد راحته شويه ، انتم ولاد انتم ، دا انتو بتربونى مش انا اللى بربيكم
😂😂😂😂😂😂
كانت معكم شيماء وأسرتها
ميار : لا استنى قولى كانت معكم ميار وأسرتها
😂😂😂
كانت معكم ميار وأسرتها فى :
يوميات عائله مجنونه
( يوميات عائله مجنونه دى مجموعة اسكريبات عبارة عن مشاهد ؛ بس باختلاف الأسماء
وطبعا غير واقعى زى ما احنا عارفين ، ممكن يصادف إنه يكون شبه واقعى لكنه فى الأساس غير واقعى
ماهو الا وسيله للترفيه والتسليه فقط ؛ لإضافة جو من المرح )
عايزين يوميات عائله مجنونه والا كفايه لحد كده منها وننزل أنواع تانيه ؟
ندى عماد
