South Boys #2: Heartbreaker

Chapter 12

"BAKIT MO AKO INIIWASAN?"

"Huy, di ah!" tanggi ko agad nang makabawi sa pagkabigla.

Napaatras ako dahil hindi man lang siya tuminag kahit nasubsob na ako sa leeg niya. Nang tingalain ko ulit siya ay seryoso pa rin na nakatingin sa akin ang matingkad na naghahalong brown at tanso niyang mga mata.

"Bakit ka pala andito?" painosente kong tanong habang pigil-pigil ang mga labi sa pagngiti. 

Umalon ang kanyang lalamunan bago siya seryosong sumagot. "May inutos sa akin."

"Weh?"

Tumiim ang mapula niyang mga labi dahil sa aking reaksyon.

"May inutos daw," nakangusong bubulong-bulong ako.

Pustahan, may crush talaga sa akin ito. Kung wala, e di wala pala siyang silbi.

Mula sa hagdan ay paakyat ang next teacher namin. Nang makita ako ay sumimangot agad ang nasa mid fifties na ginang. "Carlyn, nag-bell na, ano pang ginagawa mo riyan? Nakikipagharutan ka pa—" Natigil sa pagsasalita si Mrs. Buencamino nang makilala niya ang kausap ko.

"Good afternoon po, Ma'am," bati ni Jordan sa teacher ko at mukhang kilala nga siya nito.

"Ay, good afternoon, Jordan." Magiliw na ngumiti si Mrs. Buencamino sa kanya. "Bakit ka pala nandito?"

"May sasabihin lang po sana ako kay Carlyn," magalang na sagot niya.

Ha? Sasabihin sa akin? Akala ko ba may inutos lang sa kanya? Impit akong napahagikhik sa gilid.

"O siya, sige." Tiningnan ako ni Mrs. Buencamino. "Umakyat ka na lang, Carlyn pagkatapos, ha?"

Agad naman akong tumango at nagthumbs up pa. "Opo, Ma'am!"

Nang makalagpas na sa amin si Mrs. Buencamino ay tiningala ko ulit si Jordan.

"Ayos, ah? Lakas mo sa teacher!"

"Pumasok ka na," nakaismid na utos niya.

"O akala ko ba may sasabihin ka?"

Napahagod siya ng buhok gamit ang kanyang mahahabang daliri. "Wala."

"Wala raw. Itatanong mo lang sa akin kung bakit ako naiwas, e!" Humalukipkip ako. "E nakita ko kasing masaya ka na kay Lou kaya nagparaya na ako."

Kumunot ang noo niya. "Lou?"

"Oo! Si Lou!" Inirapan ko siya. "Di pa nga tayo, may iba ka na agad!"

Though may iba pang dahilan ang pag-iwas ko sa kanya, pero kung ano man iyon, limot ko na ngayon. Hehe.

"Hoy! Makabuo kayo ng pamilya riyan!" sigaw ng estudyante mula sa taas ng hagdan. Nagtapon ito ng basura sa trashcan.

Natawa ako pero si Jordan ay kabaliktaran, na-awkward-an yata. Pasimple siyang yumuko at hinilot ng daliri ang kanyang sentido. Nang masilip ko ang mukha niya ay namumula ito. Lalo akong natawa. 

"Why are you laughing?" sita niya sa akin. Lalo siyang namula habang kulang na lang ay magbuhol ang makakapal niyang kilay dahil sa pagsasalubong ng mga ito. 

Umusli ang nguso ko. "Bakit masama bang maging masaya? Pati pagtawa, issue? Hindi pa tayo pero ang toxic mo na!"

Naglapat ang mga labi niya pero hindi siya nagsalita. Supla-suplado, pikon naman.