South Boys #2: Heartbreaker

Chapter 60

HNY!  This chapter was supposed to be the UD last Sat hehe.

-----

"DAHAN-DAHAN."

Inalalayan ko si Jordan na maibaba sa kotse si Kulitis. Dahil tulog na ito pagdating namin sa compound ng mga del Valle ay kinarga na lang niya ang bata.

Ako ang nagbukas ng gate ng compound. Ako rin ang nagbitbit sa mga pinamiling laruan ni Jordan para sa bata. Hindi pa kami nakakalapit sa bahay nina Isaiah ay lumabas na si Tita Anya. Nang makita kami ay sumalubong agad ang ginang.

"Pakipasok na lang sa loob, 'To."

Sumunod naman si Jordan sa utos sa kanya. Sa sofa ng sala niya inilapag ang tulog na tulog pa rin na si Kulitis.

Binuksan ni Tita Anya ang wall fan at itinutok sa apo na nakabulagta sa sofa. Ang stand fan naman ang itinutok niya sa amin ni Jordan. "Salamat sa pag-asikaso sa apo ko."

Ngumiti ako sa ginang. "Walang anuman po."

"O talaga? E di pwedeng umulit?"

Ang ngiti ko ay nauwi sa pagngiwi.

"Sino pala itong kasama mong lalaki?" Tiningnan ni Tita Anya si Jordan mula ulo hanggang paa. "Guwapo, ah."

Ikinuha niya ng ginang ng tubig si Jordan at muli akong hinarap.

"Akala ko naman e makikipagbalikan ka sa anak ko, meron ka na palang boyfriend. Pero mukhang mas ayos 'to, mukhang mas matino kay Isaiah. Kung wala namang sabit e wag mo ng pakawalan 'yan."

Nang kumilos si Kulitis sa sofa ay pinakpak ko ang bata sa pwet para hindi maudlot ang pagtulog.

Hindi pa rin naman tinigilan ni Tita Anya si Jordan. "Binata ka pa ba, 'To?"

"Opo," magalang na sagot naman ng lalaki.

"E seryoso ka ba rito kay Carlyn? Saka anong trabaho mo? Malaki ba sahod mo? Malakas kumain itong girlfriend mo."

"Tita, alis na siguro kami. Baka abutan kami ng traffic sa Malabon," sabi ko para matigil na siya sa mga sinasabi.

"Walang traffic sa Malabon, sa Tejero lang meron." Sinimangutan ako ni Tita Anya. "Saka kinakaliskisan ko itong boyfriend mo."

"He's not boyfriend."

Hindi pinansin ni Tita Anya ang sinabi ko. Nakangisi siyang nang harapin ulit si Jordan. "Ayang si Carlyn, parang anak ko na 'yan. Nawawalang anak ko nga siguro 'yan."

Ang dami pang sinabi ni Tita Anya bago kami pinakawalan ni Jordan. Pinilit din kaming doon maghapunan pero mabuti at tinawagan na ako ni Nanette. Ginawa ko iyong dahilan para makaalis na kami. Hindi na kami inihatid ng ginang sa gate ng compound nila dahil walang maiiwan sa natutulog na apo.