South Boys #2: Heartbreaker

Chapter 72

KAILAN PA?

Kumibot-kibot ang sentido ko habang nakatitig sa basurahan. Bumalik sa isip ko ang mga ngiti ni Jordan. Ang pagiging relaxed niya. Napaka-inosente ng pagmumukha pero ang daming kabulastugang nalalaman.

Paharabas na isinara ko ang takip ng basurahan. May araw din sa akin ang lalaking iyon!

Sa ngayon ay kailangan ko na munang mag-ready. May lakad ako ngayon. Maaga ang meeting ko sa may ari ng shop para sa bubuksan kong cosmetic business. May mga ka-deal na ako na hahanguan ng products sa bansang Thailand. Meron na rin dito sa Pilipinas. 

Naka-set up na ako ng store sa mga online selling platform. May resellers na rin ako na nakuha. Mga working mothers sila na ang isa ay taga Bacoor at ang isa ay taga Binakayan. Malalakas magbenta pero mga walang puhunan kaya saulian ang naging usapan namin.

Si Nelly ang kinuha kong kasosyo. Malakas magtinda si Nelly sa online at nakikitaan ko siya ng potential sa business, iyon nga lang ay wala rin siyang siyang pera na pangpuhunan, kaya naman naisip ko na kunin na lang siyang business partner. Pinag-resign ko na siya sa factory na pinagta-trabahuan niya. 

Si Nelly ang magiging boss sa shop ko. Pinag-seminar ko siya ng tungkol sa mga cosmetics para mapalawig ang kanyang kaalaman. Ibinili ko rin siya ng sarili niyang laptop at bagong cellphone para sa mga online orders namin.

Pagkatapos ng pirmahan sa shop na kinuha ko ay tinawagan ko na si Charlotte. Ang babae ulit ang magre-renovate at hahawak sa decoration ng cosmetic shop. One week lang ang ibinigay ko sa kanya dahil sa weekend ay darating na agad ang mga in-order kong mga gamit na katulad ng refrigerator, aircon, at mga babasaging estante. Next week naman ay darating na rin ang mga stocks.

Napangisi ako sa isiping magkikita ulit sina Nelly at Charlotte. Hanggang ngayon kasi ay gigil pa rin si Nelly sa kapatid ni Charles. Muntik na pala kasi siya nitong masikmurahan noong nagsasabunutan sila. Noong panahon na iyon ay hindi naman alam ni Charlotte na buntis siya.

Pagkatapos sa shop ay nagpahatid ako ng PK2 sa Grab. Dahil nakabukas naman ang gate ng compound nina Isaiah ay nagdire-diretso ulit ako papasok.

Nakasalubong ko na naman ang mama ni Arkanghel na si Tita Roda. As usual sa mukha ng ginang, nakasimangot na naman siya, pero sanay na ako. Sanay na ako gaya ng pagkasanay ko naman sa parang armalite na bibig ni Tita Anya na mama ni Isaiah.

"Good morning po!" bati ko sa kanya.

Tumingin sa akin ang ginang. "Pupuntahan mo si Isaiah? Hayun, lasing sa kanila! Nag-inom kagabi kasama si Arkanghel. Madaling araw na sila natapos!"

"Lasing? Kagagaling lang sa pag-inom ni Isaiah sa amin."

"Ewan ko ba riyan sa anak ni Anya!" himutok ni Tita Roda. "Luto na yata talaga ang bituka niyan! Idinamay pa ang anak ko! Alam mo bang pagdating na pagdating ni Arkanghel kahapon ay lumayas agad ang dalawa. Nag-motor papunta na naman papuntang 7-Eleven. Pagdating ay ang daming dalang alak! Nag-inuman hanggang madaling araw!"