Lascivious Casanova (R-18) (Erotic Island Series #7)

Lascivious Casanova 17

(LC) Chapter 17

Isa pang malalim na halik ay hinila na niya ako palabas. Naroon si Peter paglabas namin ng banyo. Kahit nakainom at nahihilo, pinamulahan ako at naisip kung kanina pa ba siya diyan.

Walang pakialam itong humigop ng kape. Nang makita kaming lumabas sa banyo, itinuro niya kay Jax ang mainit na gatas at kape na katitimpla lang. Hindi natuloy sa pagtimpla si Jax kanina dahil bago pa siya magsimula sa paggawa, sinamahan na niya ako sa banyo.

"Papiliin mo na lang siya diyan kung anong gusto niya. Walang hot choco, hindi nakabili si Ate."

Pumikit ako ng mariin at pinilit na paayusin ang pakiramdam. Kaya ko namang tumayo pero hinayaan ko si Jax na nakaikot sa bewang ko ang isang braso. Pagdilat ko, nagkatinginan kami. Nanghingi siya ng pamunas kay Peter para sa basa kong mukha at nadamay na buhok. Pinaupo niya ako kung saan ako nakaupo kanina bago gumamit ng banyo. Nasa gilid ko siya at panay kuskos sa mukha at buhok ko. Habang pinupunasan ako, pinainom niya sa akin ang gatas.

"Gatas dapat ang iniinom mo. Hindi alak. Ayoko nang maulit ito, Clementine."

Tumango ako habang nakapaloob sa kamay ang mainit na mug. Hindi ko rin alam kung uulitin ko pa ito. Masakit pala sa ulo. At isa pa, kung anu ano ang nasasabi at nagagawa ko. Hindi pala ito maganda sa katawan. Nawawala ako sa wisyo. Pagkaubos ko sa gatas, kinuha niya sa akin ang baso at dinala sa sink.

"Hindi na kami magtatagal, Peter. Pakisabi na lang kay Ynah, salamat."

Nagtanguan sila at muli niya akong hinila palabas, patungo sa sasakyan niya. Ipinasok niya ako sa loob. Hindi niya muna isinara ang pinto. Ngayong nakainom ako, nakakaya ko siyang titigan sa mga mata. Para bang may mahika ang alak at nawalan ako ng hiya. Pati dignidad ko at delikadesa ko nilayasan na ako sa katawan.

"Anong gagawin ko sayo? Hindi kita pwedeng iuwi sa inyo nang ganito."

Ipinasok niya ang kanyang ulo sa sasakyan. Magkalapit ang mga mukha namin. Nasa dashboard ang isa niyang kamay at ang isa ay nasa sandalan ng inuupuan ko. Kinagat niya ang kanyang ibabang labi at tinitigan ako.

"Huwag mong kakalimutan ang ginawa mo ngayon. Nakainom ka pero hindi ka sobrang lasing para makalimutan mo ang ginawa mo bukas."

Pinamulahan ako. Natawa siya at inayos ang buhok kong basa pa rin galing sa sobra kong paghilamos. Lumagpas pala ang tubig sa mukha ko at umabot sa buhok. Kaonti na lang magmumukha na akong bagong paligo.

"Hindi ka ba pwedeng magpaalam na mags-sleep over ka muna kay Irene o Cathy? Pero doon ka matutulog sa akin?"

Lalo akong namula at doon pa lang nagawang mag iwas ng tingin. Nalalasahan ko pa rin hanggang ngayon sa labi ko ang matamis na alak. Ganoon din ang matamis na labi ni Jax. Kapag ganitong malapit siya at abot tingin ko ang labi niya parang gusto ko na lang siyang halikan at huwag nang magsalita.

"Nahihilo ka pa?"

Bumalik ang tingin ko sa kanya at tumango. Nakatulong naman kahit papaano ang gatas pero hindi nito tuluyang naanod ang lahat ng alak sa katawan ko. Tinignan niya ang labi ko at binasa ng dila ang labi niya. Nagbuga siya ng malalim na paghinga at yumuko para bigyan ako ng mabilis at mariin na halik. Mabilis lang iyon. Ni hindi niya ako binigyan ng pagkakataon na tumugon. Nang tapusin niya ang halik, mas malapit na ang mukha niya ngayon.

"Sa bahay ka muna? Patatawagin ko na lang si Lola sa Nanay mo-"

"Anong sasabihin mo? Mapapagalitan ako, Jax. Pagabi na," ngayon ko lang nahanap ang boses ko mula pa kanina. Ngayon ko lang naalala na maaari akong mapagalitan dito sa ginawa ko.