ទឹកភ្នែកភរិយាសុីឈ្នួល
ភាគទី65
"លីងអឺ? លីងអឺត្រូវត្រង់ណាខ្លះហ្នឹង?" អៃេដនកំពុងតែខឹងសុីងយីងផង ពេលនេះបែរជាមកតក់ស្លុតនិងរឿងដែលលីងអឺយំអង្គុយរាលដីឯណោះទៀត ធ្វើឲ្យគេវិលវល់ប្រញាប់ចូលមកលើរាងកាយតូច ទាំងមិនដឹងថារឿងគ្រប់យ៉ាងដែលកើតឡើងមួយប៉ព្រិចភ្នែកមុននោះ វាជាការគិតទុករបស់នាងច្រម៉ក់លីងអឺទាំងអស់។
"អ្ហឹកៗ អ្ហឺ.."នាងតូចដែលអង្គុយយំសោកឯណោះក៏ទាក់ទាញចំណាប់អារម្មណ៍ឲ្យអ្នកគ្រប់គ្នាមើលមកនាងទាំងអាណិតអាសូរតែម្ដង លោកតាដើរហួសសុីងយីង មានបំណងចូលមកមើលចៅស្រីដែលកំពុងតែពពោះឯណោះ ជាហេតុធ្វើឲ្យសុីងយីងនាងឆាបឆេះឆួលនូវកំហឹងដែលកំពុងតែមានស្រាប់។ សុីងយីងងាកបែរមុខចេញ មានបំណងចង់ច្រត់ដៃខ្លួនឯង ហើយធ្វើជាដួលដូចជាគ្មានកម្លាំងកំហែង ត្បិតចង់ទាក់ទាញការចាប់អារម្មណ៍ព្រមទាំងបិទបាំងរឿងដែលខ្លួនត្រូវគេចោទប្រកាន់នោះទៀត។
"លីងអឺ? លីងអឺ សុីរ៍! នាងកើតអី?" ថាសុីងយីងនាងមានល្បិចគិតទុកជាមុនក៏ពិតមែន តែនាងនៅតែយឺតមួយជំហានទៀត ព្រោះលីងអឺពេលនេះនាងលែងយំ តែក៏ប្ដូរមកជាដួលគ្រេងក្នុងរង្វង់ដៃអៃដេននាំឲ្យអ្នកគ្រប់គ្នាកាន់តែស្លោរស្លន់។
"ចៅអឺ? ចៅអឺកើតអី.. ពួកឯងឆាប់ខលហៅពេទ្យមក ប្រុសអៃ.." លោកតាឧទានឡើងបំណងបង្គាប់បញ្ជាអៃដេនរឿងលើកក្រសោបរាងកាយនាង តែមិនចាំបាច់លោកតាប្រាប់ក៏នាយគង់តែធ្វើដដែល ព្រោះវិនាទីក្រោយពីនាងដេកដួលលើទ្រូងអៃដេន រាងក្រាស់ក៏មានប្រតិកម្មរហ័សលូកក្រសោបលីងអឺរួចជាស្រេចទៅហើយ។ គេលើកបីនាងឡើងខ្ពស់ពីដី រួចបោះជំហានក្រោកចាកចេញពីកន្លែងដែលមានវត្តមានស្រីកញ្ជ្រោងបិសាចសុីងយីងឯណោះ។
ដោយធ្លាប់តែជាអ្នកឈ្នះ ធ្លាប់តែគិតថាមាយាស្ត្រីរបស់នាងអាចនឹងមានប្រសិទ្ធិភាពទៅលើអ្នកគ្រប់គ្នា តែពេលនេះទើបនាងបានដឹងថាគឺនាងគិតខុសតែឯងទាំងស្រុងតែម្ដង សុីងយីងព្រួសខ្យល់ដង្ហើមស្រាលរួចច្រត់ដៃឡើងបំណងចង់ចាកចេញតែ៖
"ចៅយីងក្រោក ហើយទៅជួបតានៅបន្ទប់ទទួលភ្ញៀវ ប្រុសធំ ប្រុសកណ្ដាលក៏ដូចគ្នា.. តាមមក" លោកតាក្រោយពីអៃេដនបីចៅប្រសារតូចគាត់ទៅបាត់ ទឹកមុខព្រួយបារម្ភក៏ប្ដូរផ្លាស់មកជាស្មើធេងវិញម្ដង បុរសចំណាស់ក្រពាត់ដៃទៅក្រោយ រួចដើរនាំមុខចៅប្រុសស្រីដែលកំពុងតែភ័យញ័រខ្លួនទាំងពីរទាំងបី ត្បិតខ្លាចថាអាថ៌កំបាំងពួកគេត្រូវបែកការណ៍ដល់ត្រចៀកលោកតាអស់។ រៃអេនងាកមើលមុខស្ទេហ្វាន៍បន្តិច រួចក៏នាំគ្នាដើរទៅតាមពីក្រោយលោកតាទាំងមានពិរុទ្ធ ត្បិតរឿងដែលកើតឡើងទាំងប៉ុន្មានក៏លានចំណែកខុសរបស់ពួកគេដែរ ពួកគេមិនបដិសេធនោះទេ។
ពេលនេះក៏សល់តែសុីងយីងម្នាក់ដែលមានកំហឹងពេញប្រៀបខ្លាំងមែនទែន នាងទម្លាក់ដៃខ្លួនឯងកាន់ក្ដាប់ជាយសំពត់ ខឹងសម្បារសឹងតែអាចហែកលីងអឺនិងអៃដេនទាំងដុំៗបានទៅហើយ។
(ពួកឯងចង់សាកល្បងជាមួយគូហ៍ សុីងយីងមែនទេ? ចាំតែមើលចុះ ហ៊ឹស)
