منطوية ...معقدة...متكبرة ...حاسبة روحها...هذا واش يسموني الناس حتى في شي اوقات ننسا بلي عندي اسم خاص بيا
المهم معاكم بطلة القصة إسمي منال في عمري 24 سنة نقرا في جامعة الطب هذا عامي اللخر انا رابحة عوام و حمد لله مكلاصيا الاولى في سيكسيون تاعي الاساتذة كامل يحبوني و بزاف يشكروني على قرايتي بسكو حطيت راسي و وصلت لمستوى مشاء الله ... بون انا طفلة عادية بزاف ...خاطيني المخالطة
منعرفش واش معناها الصداقة ولا حتى الحب ...كي كنت صغيرة كنت نسمع بلي الطفولة هي عالم الاحلام و الخيال....انا ماعشت حتى حاجة هكاك بسكو ما عشتش فوسط عائلة تحبني ....
بابا عاود الزواج على ماما كي ولدتني و هي هربت و خلاتني نتلاوح عند فاميلتها ماني وخالتي حميدة هي الصغيرة فخالاتي غير كيما تزوجت ..
رباوني و كبروني صح ما حسيتش بالحنانة و علاقتي معاهم ماشي مليحة بزاف بصح ماننكرش بلي دارو فيا مزية....
••• فالبريمار كانو لبنات كامل يجو والديهم يدوهم و انا كانو يضحكو عليا كي نروح وحدي ...
ماعدا وحدة كانت صحبتي وسمها احلام كانت تڨسر معايا نورمال ماشي كيما لبنات لوخرين
وحد الخطرة قاتلنا الشيخة جيبوا ارانب تحطوهم فالحديقة تاع لبريمار كل واحد الارنب تاعو لازم يتهلا فيه انا بسيف باش شراتلي ماني واحد كنت نجوز معاه بزاف الوقت و كانت الاستاذة بزاف تشكرني كي نتهلا فيه هكاك و كانو بزاف يغيرو مني لبنات لي تما ...
خطرة عطيتلو الماكلة كي العادة و خرجت ..وكوم كانت تصب الشتاء وصلتني يمات احلام بالطونوبيل...
غدوة مينداك كي رحت للبريمار كانت الاستاذة بزاف زعفانة عليا مافهمت والو اپري حبطتني لغرفة العقاب هذ الغرفة بزاف تخوف يغلقو عليك وحدك تم ربعة سوايع و يقولو فيها الفيران كنت نخافها بزاف كي دخلتني قاتلي: نتي تكبري تولي مجرمة هكاك ديري للحيوان ! شكون رباك هكا كيفاش حتى قتلتيه هكاك نتي قتلتيه
و انا تالمون مربية وحدي ماشي موالفة نهدر بزاف واحد ماعلمني كيش ندافع على روحي إبان خلاصت عليا فغرغة الفيران ندخللها كل يوم لمدة شهر و ديرلي فلاقة و حتى احلام ماحبتش تشهد معايا بلي خرجت معاها و يماها وصلتني لدار و خليتو حي (الارنب) و بعد يامات شفتها ولات قريبة بزاف للبنات تاع القسم و يڨسرو معاها و يلعبو معاها فالساحة...
من هذاك الوقت ديسيديت مانزيدش ندير صحابات و نريح وحدي خرمن نهدر مع ناس يكذبو و يستغناو عليك على اتفه الاسباب ...
جوزت السيام و الليسي نورمال جابدة روحي مانهدر مع حتى واحد malgré كنت نسمعهم يهدرو عليا بلي متكبرة...حاسبة روحها مي واحد مايهدر في وجهي بسكو انا كنت ندير الجيدو من صغري لي يدنا ليا نخسرلو وجهو ....
حتى فالجامعة كنت لاتية غير بالقراية لدرجة كلاصيت لولة من بروميار حتى لهاذ العام وهذ العام ان شاء الله حايجوز كيما موالف كالم ووحدي كيما نحب ...(¬_¬)ﾉ
...يتبع
السلام عليكم ^^
هذ الكرونيك من الخيال تاعي بيان سور =]
اذا عجبتكم البداية ديرولي ڥوت √ و كومنت ...
