طلعت للسطح كليت فطوري وبلا ما فقت داتني عيني رقدت...حتى نسمع الهاراج ...حليت عيني صبتها هانية (تاع لابوراطوار) قاتلي : واش وقيل نوضتك!؟
كنت راقدة !!!!! ياجداااااك !! نسيت بلي راني فالسبيطار نضت نجري ....
منال : شحال راهي الساعة ؟
هانية : 2:20 pm ...
الله اكبر !! توخدت....
منال : سمحيلي لازم نروح راني روطار...
هانية : معليش ...ماتنسايش برك جوزي ليا للابو اليوم نسحقك...
منال : اوكي ان شاء الله
حبطت نجري روحت لشمبرا تاع الطفل هيثم لقيت الاء مريحة معاه و هو راقد ...
الاء : منال ! وين كنتي مالموقبيل و انا نحوس عليك !
منال : داتني عيني فالسطح بلا ما فقت ...
الاء : مي نتي صح مهبولة ! هههه مزية واحد مافاقلك....
اوه مزية !!!
منال : حَقَا ! راحتلك الضربة تاع موقبيل ؟
الاء : وي مزية ماتنفختش راهي حمرة شوية ماطولش تروح ان شاء الله ونتيا ياك ماشي حاجة ڨراف ؟
منال : انا !؟
الاء : ايه مدرتيش الباصمة علاجال الضربة ؟
منال : باصمة ! ...
مسيت جبهتي لقيت فيها باصمة شفيت بلي تجرحت مي ماشفيتش درت باصمة ! زعمة تكون دارتهالي هانية موقبيل كي كنت راقدة ؟
الاء : ههه اواه راكي مدوخة كامل ...
منال : لالا جرحة خفيفة علابيها نسيتها... حقَـا ! خرجو ليزاناليز تاع هيثم ؟
الاء : وي خرجو مي راني بعثت باش يعاودوهم بلاك ماداروهمش مليح...
منال : علاه واش خصهم؟
الاء : خرجو كامل ملاح...علابيها
منال : جيبي نشوف !
شفت النتيجة كان كلش مليح درنالو تاع مستوى الكالسيوم فالدم وقسنالو الفيتامين د
تان كان كلش مريڨلي ...كيفاش هذي يغلطو ليزاناليز بلاك يكونو صحاح ...وهو عندو....
خلي مانهدرش حتى نتأكد ...عيطت للفارملية و قلتلها : ديريلي ليزاناليز فيهم فحص دم شامل للمريض هيثم ...
الفرملية : بصح نتي ماشي طبيبة لازم طبيب يسينيي لوردونونس ...
الاء : صح ! انا حتى سينيالي د.عبد الوهاب
خلاص دوك نروح عندو و نقلو يسينيلي ...
رحت لشمبرا تاع العجوزة (لي مريضة لوكيميا) لقيت يوسف مريح معاها ..قالي بلي د.عبد الوهاب راه فالبيرو تاعو ...
