رحنا لقسم الاستعجالات وبدينا نتفاهمو مع دكتور عبد الوهاب كيش نتعاملو مع الحالات الخطيرة....حتى نشوف الطبيبة كامليا دخلت مع الطبيب لي كان معاهم لبارح ...بداو يهدرو مع د.عبد الوهاب
د.عبد الوهاب : الاء يوسف منال !! نعرفكم على صديق طفولتي الدكتور فؤاد ...
هذا هو اللصقة لي حكاتلي عليه هانية؟
غزرت فيه شفتو يغزر فيا و بدا يتلون ...وشبي جد هذ الحرباء تاني ...
المهم تمتم نطقت هذيك المصفارة السامطة وانا بديت نقول وشبيها ساكتة...
كامليا : ههههه سرقتلي الاضواء ليوما فؤاد
...-_- مالقيت مانقول هاوليك مستوى الاطباء عندنا
سمعت طفل صغير يبكي باين مريض فحالة جيت رايحة ليه حتى تشدني كامليا
كاميليا : وين هاربة ؟ ليوم حاتعاونيني
منال : انا ماشي فارملية و مانيش تلميذة تاعك باه توريلي وش ندير
نحيتلها يدها وكملت طريقي وخليتها تخرج الدخان من نيفها وجها لمصفار ولا حمر مالزعاف...
لحقني دكتور فؤاد و قالي : هههه تعجبيني والله مسمومة بصح نحب المسمومات... ماتمديليش une chance ?
منال : وش من chance ؟
فؤاد : علابالك...واش قاتلك هانية لبارح ...
وبدا يتلون again -_- ...
منال : اه ...فهمت
فؤاد : ايه ...؟
منال : كنت واضحة فكلامي مع هانية لبارح بصح معليه نزيد نوضحهولك ...انا مانسحقش علاقات كيما هكا فحياتي ...دوك سمحلي نروح نشوف هذاك الطفل حايخرج على عقلو
فؤاد : نجي معاك
لالا لصقة تاع الصح
رحت للطفل الصغير ( عندو ٩ شهور هكاك) يماه رافداتو و دور بيه ...
منال : مادام وشبيه وليدك ؟
الام: يا دكتورة وليدي بالحمى عندو سمانة تطلعلو وتحبط بصح هذ لمرة ماحبطتش راهي 39
..درجة *تبكي* وليدي حايموت؟؟
منال : ماتخافيش دوك نفحصو ونشوف وشبيه ...
رفدتو وبديت نفحص فيه ....
بديت نروماركي ...عندو طاشات حمورة صغار فجسمو بلاك حساسية؟
مسيت راسو على مستوى اليافوخ(المرغيغة ههه) كان يابس و يبان خارج على اللزوم...زدت مسيت رقبتو كانت يابسة تان ...وكان يبكي كثر كلما نمسو ...
منال : madame وليدك راه يشرب حليبو ؟
الام : جوستومون يشرب شوية و يتقياه تمتم و زيد عندها ثلاث ايام كرشو جارية حاشاك...
