بون بش نشرحلكم مرضي شوية...
ورم ارومي دبقي مانكونش نبالغ كي نقوللكم اكثر الاورام خطورة وعدوانية فالعالم...وهذا الورم ناادر ويكون سامط و دونجي كثر كي يكونو مرضو بيه 2 من نفس العايلة... كيما حالتي انا و بابا الله يرحمو. .. الاعراض راكم شفتوهم فيا مي انا فاش ماشكيتش فيه بسكو فيه اعراض كثر... مع تقدم فالاصابة بيه يصرا فقدان ذاكرة... علابيها ماشكيتش فيه و اصلا نااادر....
نكون فالمراحل الاولى للمرض بسكو الاعراض ماعندهومش بزاف ملي بداوني....
العلاج كاين الكيماوي و الاشعاعي و بلا مانحكيلكم على الاعراض الجانبية تعهم... العذاب تع الصح...
و كاين العلاج المليح كامل هو الجراحي بصح مكش حتى علاج لحد الان يقدر يخليني نشد كثر من عام و 5 شهور بالتحديد...
انا راح نموت نموت علاه نبقا نكسر فراسي و نعالج....
..........
كي دخل د. عبد الوهاب تقعدت فبلاصتي جبدت مشوارة تاعي و مسحتلو بيها الدم لي في راسو و قتلو : بالاك تعاود دير هكاك
د. عبد الوهاب : سمحيلي... منال انا ستهزيت بيك بزااف انا ...*قاطعتو* : و لوكان عرفت من قبل وش راح دير ؟ حاجة ماتتبدل....
د. عبد الوهاب : كيفاه هذا ؟ كيفاه حاجة ماتتبدل بالعلاج تبراي منال
منال: انا قريت طب و علابالي وش راني نهدر
د. عبد الوهاب *وقف*: منال وش قالك د. صالح ؟هو عمرلك راسك هكا ؟
منال : لالا .
جا خارج بالزعاف وقالي : دك نتفاهم معاه
كان ڨرااف مقلق ...
نضت مبلاصتي و قتلو : عبد الوهااب!! تخرج منا ماتزيدش تشوف وجهي طول حياتك
يبس عند الباب بسكو علابالو نديرها... دار ليا قالي: علاه راكي ديريلي هكا ....
منال: نتا لي علاه راك ديرلي هكا انا علابالي بلي بقاولي يامات فحياتي و حابة نجوزهم معاك ...ونتا تمدلي فأمل زائف و تعذبني فالعلاج...
بقا يغزر فيا مشوكي قالي: لالا ماتتعذبي ماوالو نديرلك عملية نحيلك الورم و كلما يخلف نحيه مانخليهش يديلي مرتي
منال: دكتور راك دخلت الشهادة الطبية تاعك فالحيط بهد الهدرة، نتا علابالك و نا علابالي بلي هذي حاجة مستحيلة ...أنا نروح لدار نريح ، كي تولي لعقلك نهدر معاك...
جيت خارجة كان مورايا حكمني فالباب عنقني كنت ظارباتو بظهري ماقدرتش ندور ليه... سمعتو يبكي جيت ندور ماخلانيش.... حكمني لبكا قريب تخنقت و بديت نبكي... دورني ليه و عنقني.... قالي : انا مانستسلمش بسكو محال نقدر نعيش بلا بيك منال... دخلتي فحياتي قلبتيهالي ڨع. . كيفاه نقدر نوقف فهذ السبيطار ونتي ماشي فيه؟ كيفاش نقدر ؟؟؟
