كي هدرت مع ماني دك نقدر نريح بعقلي بسكو مالغري تلعبها ماشي سامعة كون نطول توسوسلها خالتي حميدة بكاش حاجة نولي فالمشاكل...
رحت وجدت شومبرا لهذ الهم شهاب مع د. فؤاد لي مسكين كان مطروش شوية معانا شوية فقسم الاستعجالات كل دقيقة يعيطولو...
اما د. عبد الوهاب قالولي راح عندو اجتماع مع جراحيين تع الدماغ لي هو راهو يكمل يقرالها ...
.وهانية بقات رايحة جاية مع صاحب شهاب وقيل اسمو جواد صرعتلي راصي بيه...
كي حطينا شهاب فشومبرتو بقيت انا و هانية و جواد و شهاب برك فهذيك الشومبرا نسناو تلحق مسودة السعد ريهام
باش نحبسولها قلبها ...
جواد : مرسي دكتورة كي قبلتي تعاونيني باش نرجع راس الشحم هذا و مرتو كيف كيف
شهاب : دك نوض ليك نوريلك راس الشحم شكونو.
منال : انا ماقبلتش مالا مكلاه تشكرني
جواد : كيفاه؟
هانية : ههههه والو والو...قلنا سي شهاب الكسر تع يدك قديم ؟
شهاب: شوية...
جواد : مابقاش وينحي لپلاطر
هانية : حمد لله ...تبانلي دال تاخد فالضربات حاذر روحك شوية
(مكسر من يدو و يسوق ؟ والله غير هذ لبنادم وحدو ...)
جواد : اكي تشوفي هنوش ندل موراه مي مايسمعليش يسمع غير لمادام ريهام
شهاب : اياااا سكتنااااا ديجا مافهمتش وش مزالو شايدني هنااا ...
جواد : خلاص ماقلنا والو
أنا كنت غير نغزر وساكتة ماهدرت والو بسكو هنوش و مسيو فيلم هند ماشكيتش كون ننطق تسلك بخير...
منال : دك نولي
خرجت نحوس كاش ماشينة فالكولوار نستقهوا بسكو راسي حسيتو منفخ...
كنت ندور فالكولوار حتى نشوف سعاد جايزة درت روحي ماشفتهاش ... مانيش قادرة نواجها مادابيا مانزيدش نشوفها وخلاص
ماعلابالبش اذا شافتني ولا لالا مي كملت طريقها وراحت تكون جابت لعشا لامينة
كملت نمشي فالكولوار حتى نشوف د.عبد الوهاب مع جماعة تع اطباء كبار ...
حسيتو بنادم وحدوخر كامل ماشي كيما مالفة نشوفو استاذ برك دك حسيتو صح طبيب و جراح...
كي دخلت لسبيطار هذا كنت نتقلق منو... مي دوكا وليت نحب كي نشوفو ماعلاباليش اذا يتحسبو هذ المشاعر حب و لا مجرد اعجاب بسكو جامي جربتهم...
