حسيت يد نوضتني....
رفدت راسي لقيتو د. عبد الوهاب... حشمت بزاف بسكو جامي شافني نبكي...
د. عبد الوهاب: حسيت بلي جي لهنا بسكو هذ البلاصة كلما ماتبانيش نصيبك هنايا...
منال :م.. ماشي قتلي تروح عند سي محمد ؟
د. عبد الوهاب : ماهنانيش قلبي نروح ونخليك...
منال : ...
جبدني ليه فور وعنقني
وش راهو يدير! ...
مي حسيت بصدرو سخون حسيت بقنطة كبيرة تخنق فيا ...بقيت غير نبكي... ماسقسانيش وشبيا مي بقا معنقني حتى حسيت روحي تكالميت...
جبدت روحي وبديت نمسح فدموعي...
مام هو جبد روحو وقاعد يغزر فيا...
موالفة نتقلق من هذ التصرفات نحسهم شفقة بصح ليوم اول مرة حسيت روحي محتاجتهك...
وراني حاسة روحي spécial بالنسبة ليه ملي جيت لسبيطار يهتم بيا بزااف و يبدا يتبهلل كي يشوفني .. ويزعف تمتم بصح يطلب السماح ديراكت مايتكبرش...
كنت نكرهو بسكو يقلقني... بصح ليوم حسيت مشاعري من جيهتو بداو يتبدلو...
د. عبد الوهاب : راكي مليحة؟
منال: وي ليوم رتحت....
(صح بابا مات و هذي حاجة قسمتلي قلبي... بصح مدام عرفت بلي كان يحبني هذي حاجة تكفيني باش نحي الحقد من قلبي... ونرتاح...)
منال: نروح نغسل وجهي
د. عبد الوهاب *يتبسم*: ايا نحبطو كيف كيف ...
منال : اوكي
د. عبد الوهاب : قبل مانحبطو اسمحيلي نقلك حاجة
منال :همم؟؟
د. عبد الوهاب : نتي طفلة بزااااف قوية و هاذ الشيء يخليني فخور بيك بزاف و يشرفني نكون قريب منك
واش راه يهدررر راني حاسة وجهي بدا يولي حمر بسكو السخانة طلعتلي...
بديت نمشي للباب باش مايشوفنيش... بدا يضحك و جا تبعني.... حبطنا...دخلت لجيهة النسا غسلت وجهي سقمت روحي بيان ...
و خرجت... لقيت يوسف والاء فالكولوار يهدرو مع د. عبد الوهاب
غزر فيا وتبسم قالي : منال روحي معاهم لجاميعة ليوم ...
منال : اوكي...
يوسف : ايا بيان خلونا نروحو
خرجنا مالسبيطار ركبنا فالtransport وفي طريق بداو يڨسرو... على حالت المريض تاعهم
