•••غدوة منداك جاز النهار تمتم... فالريسطو ...وشنو كانو عندنا زوار غير متوقعين عل الفطور. ..جات ريهام و مسيو شهاب كانو يڨسرو مع لي يساربو ومول الشي رحت ليهم سلمت على ريهام حمد لله راهي مليحة سورتو مع راجلها تبانلي حالتهم مليحة مع بعضاهم ...
جاز الوقت مع لخدمة... لخدامين راح نصهم ماعلاباليش وين مي حصلت بالماعن و لاشارج تع les clients ... و على ال 8 تع لعشية دخلت هانية و حبيبنا جواد كانو في زوج ضاربين حطة... كنت وجدتلهم طابلة شابة ...و وصيت لبنات يتهلاو فيهم... جات سلمت عليا و قعدت معاه فالطابلة كان هو يغزر فيا سور كان حاير علاه طبيبة تخدم فريسطو...
المهم كنت نخدم و نعس في هانية ...كي شفتها بدات تتفرفش بعثتلها ميساج (ارواحي لتواليت)
تمتم لحقتني
منال : وش خير ؟
هانية *حمرة و تتلعثم* : حا يخطبني سوور شفت عندو باطة في جيبو
منال :خصرتي المفاجئة تاعو ... علاه عينيك راحو لجيبو يا طفلة...
هانية : اسكتي مزية فقت كون مافقتش و جبدلي لخاتم نطيح نتغاشا و لا نسوغ و الله يامنال هذي روحي و نعرفها... كابابل نضربو بطبسي نورمال...
منال : خلاص خلاص اتكالماي... ديري روحك مافقتيش و نسحقك تخمي فحاجة سيريو مثلا خدمتك بسكو نعرف كون نقلك كوفي روحك تتقبيها...
هانية : هههههه كي يتقدملي وش نقولو؟
منال : ياااه ملكة الرومنسية تسقسي في وحدة جامي ذاقت هذ المشاعر
هانية : سي تذوقيهم ماتتقلقيش برك هههه
منال: خلينا فالسوجي تاعك مادابيك...نقلك حاجة باش مانشوفكش تبكي اومبعدا...
هانية :*بالخوف * وشنو!
منال : كابابل هذيك ماشي باطة خاتم و. نتي تسرعتي كون مايخطبكش نسحقك ما. ...*قاطعتني *
هانية: منال! ختي صح تشوفيني نجياح مي في عمري 28 سنة مانيش ذراري نبكي ماتخافيش راني مرا وراني دايرة حساب لكلش ماتخافيش ...اااه
راني طولت عليه دك يفيق ههه
منال :*تنهدت* ايه روحي، كي تسحقيني بيپيلي نجي لهنا...
هانية : اوووكيي
راحت تجري ليه... قعدت معاه ...
كنت انا نخدم ونعس فيهم شفتهم يضحكو مزية كانت تكوف روحا مليح ...كملو لعشا...بعثتلي ميساج (منال واقيل صح ماراحش يخطبني هههه)
غزرت فيها كانت باينة دايقتلها مي كانت تتبسم وتضحك كيلي ماصرا والو
مانيش حابة نمدلها امل زائف مي اوموان ماتبقاش دايقتلها هكا.... بعثتلها : ( يرحم باباك سكتينا هذاك حابس عليك سور لتا بالهدرة و نسا يخطبك ).
