•••راح د. عبد الوهاب و خلاني كي لبغلة نغزر...
نضت و كملت الخدمة ...حسيت روحي مشي مليحة كامل مزية كملنا نروح نرقد بش غدوة نفطن بكري...
كنا نمسحو فالطوابل و لبنات يڨسرو...
حتى نحس كتاب تغلق في وجهي....
مافهمت والو حليت عينيا صبت روحي فلرض و كامل عند راسي...طرشوني بلما راني مشمخة كامل...كانو ڨع يهدرو و يقولولي: راكي مليحة؟...
تبانلي طحت تصرعت...
منال : راني... مليحة
لساني راه ثقيل...
احح راسي راه يوووجع....
نضت نتمايل دخلت غسلت وجهي و خرجت...
قتلهم : ماتتقلقوش راني مليحة عييت برك...
كنت خارجة حكمني مول الشي قالي : اصبري يا بنتي محال نخليك تروحي هكا كريتلك طاكسي...
منال : صحيت ...ربي يجازيك
خرجت لقيت الطاكسي تسنا برا وصلتني حتى لباب الدار...
طلعت بسييف هذاك الدروج غير دخلت لقيت ماني تتعشا... راهي سهرانة ليوم.. سي لوكازيون نحكيلها عل العقد بسكو لازملي ولي امر...
منال : ماني عندي هدرة معاك...
ماني : انطقي راني قدامك ...
منال : مليح... مالا دكتور عبد الوهاب حب غدوة نعقدو
ماني: وشنوو؟؟ ماشي غدوة خدامة؟
منال : قالي تقدري تراطي صبح
ماني : علاه راكي صفرة كي حبة قارص عقد برك ماراحش نقولك لالا، مي لعرس مانقدرلوش نتي لميلو وحدك... مانيش نطبع فالدراهم
منال: حتى انا عرسي نحب نديرو وحدي
ماني : ايه مالا غدوة كي تكونو رايحين جوزو ادوني ولازملك 2 شهود خالاتك مايجوش راهم مشغولين شوفي صحاباتك...
من وكتاه تعرفي عندي صحابات !
منال: ممم غدوة تبان ايا مالا نروح نرقد...
طحت كي الحطبة رقدت...
...
6:00 am
..صونالي الرافاي... بسيييف بش قدرت نرفد راسي... شربت دوا تع السطر ...
ولبست حوايجي صليت و خرجت... غير وصلت لسبيطار طلعت للبيرو تع د. عبد الوهاب...
علابالي رانا نتسرعو بصح خليني نديرلو رايو و نشوف وش يدير... هكا بش مايزيدش يضارب معايا بسكو عييت مالمشاكل...
هانية مكاشها شكون حانشاور..وزيد ماعندي حتى وحد يشهد معايا...
شكون ندو... هو يدبر راسو
كنت نسنا عند البيرو لي كان مغلوق...باين مزال ماجاش ، شحال راهي الساعة؟
ضربت طلة علا الساعة لقيتها 7:45 وصلت بكري شوية مي نورمالمون دك يلحق....
سمعت المشية مورايا سوور هو درت و نلقا المصفارة جاية مع د. عبد الوهاب ... هو يهدر معاها و انا يقولي ماتريحيش مع يوسف...
غير شافني جا ليا قالي : صبح الخير منال... صافا؟
منال: حمد لله
د. عبد الوهاب : تبانيلي مريضة مزالك ماترقديش مليح؟
كاميليا : وهاب خلينا ندخلو نلبسو لي بلوز رانا روطار
منال : جيت نهدر معاك... نسحقك
كاميليا : ماشي دكا بب رانا مشغولين...
د. عبد الوهاب *غزر فيا مليح * : كاميليا!! اسبقيني راح نهدر مع منال...
كاميليا : اف...
دخلت و خلاتنا وحدنا
منال : تبانلي تصالحتو... ولا نتا ماتزعفش عليها؟
حل عينيه مشوكي وقالي : لالا ...طلبت السماح... علابيها...
راه يتأتأ تقول كشما راه يخبي مي علابالي هو حابس برك ...ماراحش نقولو ماتهدرش معاها بسكو اولا امي تاعو ، ثانيا ماعندها ماتقضيلي ، و اخيرا ماتقدرش تديهولي كون حبها كون راهو عندو شحال ملي خطبها...
منال : ممم...جبت كوارطي بش نعقدو نروحو نديرو ليزاناليز دك؟
تبسم و دنا ليا... حكمني من يديا باسهم و قالي : سمحيلي اذا ضغطت عليك بصح ماقدرتش نصبر كثر نغير كي نسمع اي واحد يعيط منال عبد الكريم برك مانرتاحش حتى يعيطولك باسمي...
قلبي بدا يخبط و حسيت روحي حانبدا نتفرفش و نبدا نطرش فالهدرة...
نحيتلو يديه...
و قتلو : مالا خلينا نروحو لابو بش يزربولنا فليزاناليز و كي نكملو نجوزو علا ماني و نتا ادي شهود انا ماعنديش شكون نجيب...
د. عبد الوهاب : ماتقلقيش راسك ماهدرتلكش من راسي كلش راه واجد... حاندي دكتور صالح و وحد ماتعرفيهش ...
منال : اوكي
د. عبد الوهاب : اصبري نتفاهم مع كاميليا بش تشد الاء و يوسف و نولي
دخل هدر معاها...وخرج...
د. عبد الوهاب : تبعيني
ايواه هنا تان نتبعو...
رحنا لابو كانو مزال مافتحوش مي رومپلاصونت تع هانية يعرفها د. عبد الوهاب ڨسر معاها شوية و غير حكالها قاتلو اقعدو دك نفريهالكم...
