فاليل هدرت معايا هانية و طلبت السماح على واش هدرت قدام د. عبد الوهاب فالحقيقة مازعفتش عليها بسكو علابالي تفرفشت مي نبينلها هكا باش ماتعاودليش على هاذ السوجي...
غدوة نخدم فالريسطو ...راني نحس الcorp تاعي ولا يعيا تمتم و الدوخة وراسي يوجع... بسكو راني نخدم سونزاري ...كون نشد بلاصتي فسبيطار ونولي نخدم عندهم تتحسن حالتي بلا مانخدم فالريسطو.. ان شاء الله...
رقدت...
6:00 am
فطنت على صوت الرفاي طيبت قهوتي وستقهويت صليت ...وديماريت على 7 لقيت شوية بنات الحومة لي يخدمو معايا تان رايحين فالكار
سيركيلاصيون كحلة فطريق راكم تعرفو الطريق مع صبح وقت الخدامين...
بون وصلنا حمد لله فالوقت و خدمت فالكوزينة نغسل لماعن....
جاز لوقت تمتم و فوقت لفطور زاد شغل كثر وكانت غير وحدة تعاون فيا وكل دقيقة رايحة جاية... كنت انا نغسل النص لكبير... عييت ريحنا ساعة و تقالبنا كي العادة لعشية ياك انا نخدم برا نساربي....
كنت نساربي ولغاشي مايخلاصش...
7:00 pm
جاز يوم ممل توحشت السبيطار...ونشوف هانية و يوسف و الاء و د عبد الوهاب و...
اياه وش راني نهدر وقيلا هبلت لالا سور ماشي واقيل هذا انفصام خطييبر فالشخصية....
ماتوحشتوش... هو علاه نتوحشو ااا سبحان الله...
فقدت التوازن تاعي و تعكلت رجلي طحت وسيحت شوية ماء على جون كان مع مدامتو
منال : ديزولي...
نضت وجيت رايحة
حتى نسمع لمرا لي كانت معاه قاتلي : ديزولي ؟ سمعي يا**** شكون قالك تقدري تروحي ؟
منال : وشنو ؟
الجون بدا يتبسم و قال: اه ياختي حصلتي روحك مع مهبولتي هذي قبيحة لبنات لي يغزرو فيا تعميهم
ايواه...
منال: ...
المرا : بون جيبي شيفونة ونسحقك تطلبي السماح مليح و...
منال *قاطعتها*: ونرفد رجلي ؟ ونكتبلك ورقة فيها اعتذار لالا؟ ايا روحي تروحي ماعنديش لوقت لتبهليل تاعك
بون هذ النوع تع لبنات شفتهم بزاااف فحياتي طايحين مافيا وزعمة يسبو... يلعبوها ...ديجا مالقعدة تعها باينة تحب طيح رجلة ولا ماعلاباليش ...
