جينا حابطين فالاصانصور كانت مبلوكيا... و كانت الحالة تصفر وين راهم العسكر ماشي لازم يعسو السبيطار... !
د. عبد الوهاب : ارواحي نحبطو مالدروج...
منال : اوكي...
غزر فيا متبسم و حكمني من يدي ...
ماحبيتش نحي يدي بسكو حسيت روحي كنت محتاجتها... اي طفلة تكون فبلاصتي حاتعيط لباباها كي تخاف ...انا ماكاش لي يشدلي يدي فهاذ الشدة مي د. عبد الوهاب راه يعطيني لحنانة لي كانت خاصتني...
حبطنا فالدروج شفنا راجل لابس كوستيم noir وواقف عند الباب تع الايطاج 3 (قسم خاص) ...شكون هذا!
د. عبد الوهاب حبّس و قال : مسيو وش راك دير هنايا! ؟
دار لينا هذاك الراجل هو هذاك السيد لي يخدم عند رؤوف لي دخل هنا علاجال الاكسيدون سمانة لي فاتت... هذاك المرفه...
طلق د. عبد الوهاب يدي
منال : اه هذا نتا... وش راك دير هنايا؟
الراجل : اه دكتورة هذي نتيا... بعثني سي رؤوف نعيط لطبيب باش يشوفو مي مالقيت حتى واحد مافهمتش علاه؟
منال : مزالو هنايا مسيو رؤوف؟ علاه ماخرجش مالسبيطار؟
الراجل : اه كي دارولو راديو شي وش لقاولو كش مرض ماحبوش يطلقوه...
منال : اه
د. عبد الوهاب : منال! ايا نعيطو للعسكر يجو يخرجو المرضى لي نعرفوهم كيما هذ السيد...
منال : نو كون نخرجو مايخلوناش ندخلو و كاپابل ما يسمعولناش... مايدخلوش حتى تلحق فرقة تع تفكيك القنابل...
الراجل : عسكر... قنابل ؟ وش كااين؟
د. عبد الوهاب : نقلك مي نسحقك ماتخافش ...
الراجل : اتفضل
د. عبد الوهاب : بون راهم شاكين كاينة بومبا فالسبيطار علابيها غلقوه و المشتبه به دخل على اساس مريض علابيها...
الراجل : و حنا علاه ماخرجوناش ...وزيد مسيو رؤوف راه بزاف عيان....
غزر فيا د.عبد الوهاب دخلنا نجرو ليه كان مكسل فشومبرتو فالقسم الخاص... كامل الخدامين تاوعو كانو يعسو عند الباب
وجهو صفر كثر من لي كي جا لخطرة لولة... وشبيه وش لقاولو فالراديو!
د. عبد الوهاب *يتبسم* : السلام عليكم سي رؤوف
رؤوف : وعليكم السلام... دكتور حبيت نعرف وش عندي خرجت لاراديو قالولي بانتلهم حاجة فيه مي ماراهمش سور من المرض لي عندي نورمالمون اليوم يكملولي الفحص بصح واحد ماجا ليا ...
د. عبد الوهاب : ممم لازم نشوف الراديو
رؤوف: قتلهم ديرولي نسخة منو بش نبعثو لسويسرا يشوفوهولي اذا هنا ماعرفولوش ...هايليك فالقجر هذا
جبدتهولو انا... و رفدتو لضو... بانت عندو مشكلة فالرئتين... حبوب منتشرة فيهم... مديتو لد.عبد الوهاب غزر فيه بيان وقال : مسيو رؤوف لازم ليزاناليز بش نقدرو نعرفو وش عندك بسكو هذي حاجة مانقدروش نعرفوها هكا...
رؤوف : اوكي هذا وش قتلكم مقبيل مي علاه ماجاوش ينحولي الدم للدرك؟
سكتنا...
و الراجل لي يخدم عندو فهمو وجهو ولا كحل. ...
رؤوف : مدلي تلفونك
الرجل : اتفضل...
وش راه يدير ليمن حايعيط!!
رؤوف : الو... انا رؤوف **** ، راني فسبيطار **** نسحقك تبعثلي جماعة تعنا ....وي دك ...ايا اوكي
كوپا.... جماعة ؟ وش يكون هذ السيد!
منال : دكتور العسكر علاه مزال مادخلوش ؟
د. عبد الوهاب*تنهد* : ماعلاباليش..
*صوت تلفون*
لقيتها هانية رفدت
منال : الو
هانية : منال وين راكي علاه مزال ماخرجتيش ؟ و د. عبد الوهاب راه معاك؟
منال : وي راه معايا... هانية قوليلي وين راهم العسكر علاه مزال مادخلوش
هانية *تبكي* : ضاربنا معاهم عند الباب ماحبوش يدخلو قالك حتى تلحق فرقة تفكيك القنابل و هذيك الفرقة حسها مابانش مع الطريق لي راهي مقطوعة ماراحش يلحقو ... تعيشي اخرجووووو
منال : اتكالماي هانية ديجا وقيل ماكانش بومبا ماراهمش سور...اصلا...
هانية : بصح راهم شاكين بنسبة 50% تعيشي اخرجو
منال : صاحا...ماتتقلقيش
كوپيت
فهمت د. عبد الوهاب و ش قاتلي
د. عبد الوهاب تنارفا ...
رؤوف : دكتور... اخرجو نتوما دك و اهدرو مع العسكر هذوما.... مابيدما تلحق جماعتي
د. عبد الوهاب : وش راك تهدر! ؟
رؤوف : قتلكم اخرجو ...هذوك العسكر ماراهمش حايدخلو بسكو لي راهم فالسبيطار ماشي ولادهم بش يتقلقو عليهم... مي انا عندي الحل تعهم روحو وماتخافوش دك نفريها
وقيل مهبول هذ السيد... مي راه يهدر سيريو...
قالي د. عبد الوهاب : نخرجو منال! !
