جاز هذاك النهار و غدوة مينداك مانضتش بكري.... ماجاتش ماني حتى لعشية
#عيطت لهانية و طمنتها....
حكيت لماني واش صرالي مالڨري هي مايهمهاش امري مي حكيتلها باش ماتخرط عليها والو خالتي حميدة... وتقوللها راهي تضارب....
خليت النهار هذا يجوز و النهار لي موراه عيطت لدكتور عبد الوهاب
منال : الو
د. عبد الوهاب : وي ؟
منال : دكتور انا منال عبد الكريم
...
د. عبد الوهاب : اه منال!! صافا ريحتي شوية؟
منال : وي حمد لله... دكتور جات ماني قتلي راك حاب تهدر معاها...
د. عبد الوهاب : ايه... اوكي مالا عشية نضرب دورة لداركم نهدر معاها
منال : اوكي
مافهمتش واش راه يقوللها زعمة... اففف خليه يدبر راسو مهم يخطوني برك
قلت لماني... سنيناه مالظهر... ماجاش حتى 15:30
طبطب حليتلو الباب..
.
د. عبد الوهاب : سمحولي واقيل طولت عليكم شوية
منال : ايه ... سماح...
د. عبد الوهاب *يضحك*
دخل ريح فالصالون سلم على راس ماني و ريحو يڨسرو و كوم دابيجود ماني تحب تحشمني قاتلي : نوضي منا نتيا ...الاستاذ نتاعك حاب يهدر معايا ونتي داخلا في وسطنا
ايه قتلكم ماني تحب تحشمني و تسابوطيني توجوغ
د. عبد الوهاب بدا يضحك حسبتلو اي تڨسر...
نضت ورحت جبتلو سنيوة تع القهوة... ساربيتلو و دخلت لبيتي...
كنت مكسلة في بنكي نخمم كيفاه حاندير بالجمعة عندي خدمة فالريسطورون ولازم نخدم باش ماني ماتعيينيش بهدرتها
*صوت الطبطيب*
منال: شكون؟
د. عبد الوهاب : بوشون..
فتح الباب و دخل انا بقيت نغزر فيه مشوكيا بقيت مكسلة كي البهلولة... كي شافني هكاك
قالي : واش الاميرة النائمة !!
تقعدت نجري
منال : واش تسحق؟؟
د. عبد الوهاب *متبسم* : ماعليش نهدر معاك شوية ؟
منال : جيت تهدر مع ماني ولا معايا ؟
د. عبد الوهاب : ايهوه...
دخل و غلق الباب موراه و قالي: جيت نهدر معاكم في زوج... و كملت مع مانك و خليتها تستقهوا بعقلها... و دوك جيت نهدر معاك نتي ...كاشما تحبي نزيد نشرحلك؟
