ديمارينا....
كنت ساكتة طريق كومبلي و حاطة راسي على الكارو... مام هو ماقال والو...
فالautoroute شفتو راطا الدورة تع دارنا
منال : ماشي منا الطريق...
د. عبد الوهاب:....
اففف حايهبلني ليوم...
كمل طريقو ماعلاباليش وين دايني راه غير يبعد وصلنا قدام فاست فود حبط جاب زوج كاسكروطات شاوارمة و حطهم فالكوسانة لي ملور ...
وانا غير ساكتة ماقلت والو....
بديت نشم ريحة لبحر ونسمع صوت لمواج حبس الطونوبيل و حبط حلي الباب تاعي
حبطت
كونا حابسسين على طرف الطريق تحتها سواسة لبحر كانو لمواج يخبطو فور...يبانو حايوصلو لينا....
جبد الكاسكروطات و مدلي واحد...
لحق راني ميتة لشر مافطرتش ... مي مانقدر نشدو عليه نولي نبان مخلوعة...
منال : مانيش جيعانة صحيت.... دكتور
د. عبد الوهاب : خطرة فحياتك اسمعيلي بلا ما تهبليني...
غزرت فيه بتشناف و شديتو... حليتو و بديت ناكل وهو يغزر فيا
غزرت فيه فاق لروحو.... و بدا هو تان ياكل...
د.عبد الوهاب : مممممهذيك لمرا يماك ؟
منال : لالا... انا ماعنديش يما
غزر فيا و قالي : احم.... غ.. غلطت ليوم معاك مي نتي مافهمتينيش علاش كنتي ديري هكاك انا...*قاطعتو*
منال : ماشي لازم نبررلك كلش و اون بلوس انا لي كنت غالطة ماكانش لازم نجيب مشاكلي تع الدار ونخرجهوم فيك..ديزولي استاذٍ...
حبطت راسي بقيت ناكل وهو قطع لحس تاعو بسكو علابالو وش راني نهدر هاذ الكلام هو لي قالهولي صباح....
كملت ناكل... غزرت فيه لقيتو يغزر فيا مشوكي....
د. عبد الوهاب : لالا لالا منال والله ماكان قصدي هكاك...كنت ....
منال: دكتور....مايهمنيش واش كان قصدك المهم الكلام نتا قلتو و انا فهمتو.... وزيد علاه راك تكسر في راسك معايا ياك راني مفصولة... غدوة تلتا غير بالمرضى تاوعك و تخدم مع ط. كاميليا و لباقي... .ماراحش تزيد تتقلق كامل تولي توجوغ تضحك صح!!
نفضت يديا و فتحت الباب تع الطونوبيل باش ندخل حتى نحسو عنقني فور....
.
د. عبد الوهاب : نضحك ؟ تحرشي بيا كيفاش حانزيد نضحك بلا مانشوفك قدامي فالسبيطار ...منال نتي غالية عليا كثر من واش راكي تتصوري... صح نعيط عليك...بصح ليوم علابالك وش حسيت كي شفت بلي هذيك لمرا هي يماك ونتي كنتي ساكتة برك كانت صدمة كبيرة كان لازم نوقف معاك... و كي خبطتي الطابلية عليا حسيت قلبي تخبط هكاك في الارض...
