منطوية

part 20 ^^~

نضت كي العادة طيبت القهوة ...ستقهويت.. صليت ...وديماريت ...

••• ماوليتش نحب نوصل بكري نخاف نلحق وحدي ونبقا مع د. عبد الوهاب و نتبهدل معاه...سورتو على وش قاتلو هانية لبارح

لحقت 7:45 ماشي بكري بزاف مي كومام... طلعت لبست طابليتي وخرجت نجري خفت يدخل ... مانيش قادرة نغزر فيه...وزيد لبارح تان حكمتنا هذيك المصفارة فهذيك اللحظة سور دارتلها الف حساب...

الله يسهل عليها... المهم...

كنت نمشي فالكولوار شفت الاء و يوسف جاين من بعيد و معاهم د. عبد الوهاب...

لحقو ليا

يوسف : صباح لخير منال...

منال : صباح الخير عليكم

الاء: واش صافا؟

منال: حمد لله...

كنت نهدر معاهم و ماغزرتش كامل من جيهت د. عبد الوهاب ...

د. عبد الوهاب : ايا ادخلو البسو طابليتكم يالاه...

جاو داخلين... اههه حايخلوني وحدي معاه!!! تفرفشت

منال: اه نسيت تلفوني...

دخلت معاهم ودرت روحي نخرب فلخزانة... كي شفتهم كملو خرجت معاهم... كانو د. عبد الوهاب يغزر فيا بنص عين... علابالي راني نبان اطفال بصح الله غالب وليت مانعرفش نهدر كي نريح معاه...

رحنا لقسم الاستعجالات عندنا شحال ماخدمناهش ليوم حانعوضو ڨاع واش فات.... -_-

غير دخلنا قابلتني وجه الشر تع كاميليا مع د. فواد... كانو واقفين يسناو اطباء تع اليل يخرجو ويمدولهم الحالات لي كاينين...

رحنا ليهم وبداو يڨسرو بيناتهم...كانت كاميليا تتلاح على د. عبد الوهاب وتغزر فيا مافهمتش واش راهي حابة توصلي مي راهي تعيي فروحا في باطل بسكو مانيش سامعة بيها ڨع...

جبدت روحي شوية بسكو عياولي وذنيا بالهدرة تعهم لي تعييني سورتو مع صباح ربي... جا ليا د. فؤاد قالي: صباح لخير منال صافا؟

منال: حمد لله ...

د. فؤاد : ههههه مام انا راني مليح

منال : ايه حمد لله...

يخلط فيا مع صبح والله ماتفرا...

د. فؤاد :ممممم عجباتك بيتي؟*يتبسم*

(اه قاتلو هانية !!! تبقا غير تبهدل فيا هكاا هذ الطفلة)

منال: سمحلي ماكانش لازم ندخللها ... مكاش علابالي بلي شومبرتك...