{الأحد 8:00} فالسبيطار :
كنت واقفة وحدي عند الباب تع لاشومبر تعنا ، كنت وصلت من قبل لبست طابليتي و بقيت نسنا فيهم تما...
وحد الزوج دقايق و انا واقفة جبدت تلفوني وكملت نقرا كتابي فالpdf
حتى نسمع الهدرة فالكولوار ،،، طلعت راسي لقيت الاء مع يوسف و د. عبد الوهاب و كاميليا جايين كامل كيف كيف...
غزرت فد عبد الوهاب كان يغزر فيا متبسم و لباقي كانوا يڨسروا عادي...
لحقو ليا تسالمنا ماعدا كاميليا بالطبع لي كانت تمص فالقارص...
دخل يوسف و الاء يلبسو طابلياتهم و بقينا حنا برا...
د.عبد الوهاب : صافا ؟ تبانيلي صفرة شوية منال
منال : راني مليحة ... مارقدتش مليح برك
د.عبد الوهاب : اذا عندك بروبلام مع الرقاد قوليلي نمدلك دوا مليح
منال : مرسي
خرجت الاء و يوسف و زادت لحقت لالة هانية مع دكتور فؤاد ..
سلمت عليا هانية و بقات تسيي تغمزلي على د. عبد الوهاب كي كان يغزر فيا...بلا مانزيد نفهمكم عل المنظر لي راني نشوف فيه وهي تتعوج هكا
بداو يڨسرو كامل...
د. عبد الوهاب : ليوم نهارك الاء... ليوم حاندخلك معايا للعملية...
يوسف : اه انا اللخر بديت بمنال... ودوكا الاءهههه دكتور هذي هڨرة ولا وش
د. عبد الوهاب : هههه السيدات اولا رجلة ولا بطلنا ؟
كاميليا : لالا منال بديت بيها بسكو مدامتك ياك!
كامل تشوكاو تما و بداو يغزرو فيا مشوكيين...
د. عبد الوهاب حسيتو داقتلو اما انا ماحسيت والو ماولاتش ديقلي منها بسكو الله غالب عليها فارغة شغل...
كان د. عبد الوهاب حا ينطق حتى نسمع هانية تقول: فواد. !!
د. فواد : صحا هكا تخبي عليا ؟ هي مع صاحبي لانتيم و نا نحبها كي البهلول و ماقلتيليش !! زعمة انا خوك!!
هانية : فؤاد! كي شفتك مع فراح جارتنا حسبتلي نسيتها
د. عبد الوهاب حط يدو على كتف دكتور فؤاد لي كان بااين ڨراااف مقلق ...خبطلو يدو و راح...
غاضني و غاضتني هانية تان قاتلنا :سمحولنا... و مبروك عليك دكتور ....
و راحت تجري مور د. فؤاد...
