Semper Fidelis

Untitled Part 3

PAGKATAPOS ng isang buwan, napapanood na sa buong Pilipinas ang bagong commercial ng Gleam na pinamagatan niyang "Sekreto ni Lola."

Ang tagpo: Hirap na hirap ang teenager na apo sa pagtanggal ng mantsa sa paboritong T-shirt. Sinisisi ang mumurahing detergent powder na walang iba kung hindi ang Gleam. Lumapit ang Lola. Ipinakita ang tamang pagkusot. Dahan-dahan at hindi mariin. Nawala nga ang mantsa. Ang sekreto ni Lola: "Sa mantsa, kailangan diplomasya!" Ang sabi sa apo. "Hindi na kailangan ang mamahalin!"

Naging bukang-bibig ng mga Pinoy ang payo ni Lola.

"You made it, Sari!" deklara ni Ralph. Nasa apartment niya ang lalaki at doon sila nagseselebra ng tagumpay. Nakaupo sa sahig habang kumakain ng pizza at umiinom ng beer.

"We made it!" aniya at idinikit ang boteng iniinuman sa boteng hawak ng lalaki.

"It was your idea," anang lalaki.

"S&A was your idea," aniya.

"Do you think you can get by for a while without me?" biglang tanong ni Ralph. "I know you're capable of running S&A without me... it's just that—is it okay if I take a vacation?"

"Fine with me. Saan ka pupunta?"

"I'm getting married, Sari," anang lalaki.

"W-what—really?!" Sa tuwa ay nayakap ni Sari ang kaibigan. "I'm so happy for you! Sino siya? Is it real—I mean, do you love her?"

"I think so. I proposed to her," natatawang wika ni Ralph.

"When is the wedding?"

"Next month. St. Augustine Church. And there's something else..."

"What?" aniya na parang hindi pa rin makapaniwala. Akala niya alam na alam niya ang nangyayari sa buhay ni Ralph. Hindi pala. Still, masaya siya para sa lalaki. At biglang napansin niya ang kakaibang glow sa mga mata nito.

"Kapag may groom, may best man, di ba?" Tumango si Sari. "Aldon is my best man."

"Who?"

"Your husband," ani Ralph. Hindi kaagad nakasagot si Sari. "He is my best friend, remember?"

Tumango siya. "No problem." She was laughing, a nervous, feigned laughter. "Ano ba'ng pakialam ko sa magiging best man mo, hindi naman ako ang ikakasal?"

"Hindi kasi ako sigurado kung gusto mo siyang makita. Alam mo na—"

"That was long ago, Ralph. At nagpapasalamat ako na naghiwalay kami. Kung hindi, ano ako ngayon? Isang maybahay na walang maipagmamalaki kundi ang pangalan ng asawa ko? Walang alam gawin kundi ang pagsilbihan siya. Na ang gabi at araw ay umiikot sa kanya? You've got to be kidding!"

"Will you be at my wedding? Is that what you mean?"

Sunud-sunod ang tango ni Sari.