Blood Contract with her Royal Villainess

♕CHAPTER 24♕

♕CANA ANNALIS♕

♕ ♕ ♕

Ang isang selebrasyon na ginawa ng imperial palace ay tumatagal ng tatlong araw o mahigit isang linggo.

Ang pagtitipon para sa prinsesa ay nakatalagang gawin sa loob ng tatlong araw kung saan ang unang araw ay para sa lahat ng mamamayan ng Lumire Empire. Magkakaroon ng kapistahan sa Central plaza at bibigyan ng rasyon ang bawat tahanan galing sa emperor.

Pangalawang araw ay ang pagsasaya ng mga commoner at aristocrats sa iba't ibang atraksyon na inihanda ng imperial palace katulad na lang ng mga sirko, pagtatanghal ng mga kilalang musikero at iba.

Sa pangatlong araw ay gaganapin ang huling piging kung saan lahat ng noble family ay kailangan dumalo at sumalo ng pagkain sa gaganapin na banquet, sa huling gabi rin ng kasiyahan ay magkakaroon ng huling sayaw na may kasabihan at ibang kahulugan sa mga aristocrats, kung sino raw ang una mong makakasayaw ay ang taong nagugustuhan mo o may gusto sayo at ang huli naman ay ang taong makakasama mo habang buhay.

Bawat ginoo at binata ay may iisang rosas na pwede lang nila ibigay sa babaeng nais nilang makasayaw, kung sino ang pinakamaraming rosas na makukuha ay siyang tatanghaling queen of the night.

At iyon ang pangarap ni Kiera noon, nais niyang tanghaling Queen of the night kahit isang beses lang sa buhay niya kaso noon ay laging isa o tatlo lamang ang nakukuha niya.

Kilala naman si Kiera sa kakaibang ganda niya, ngunit kilala rin siya ng mga lalaki sa titulo niyang 'ang babae ng lahat'. Kung saan iba't ibang lalaki ang nakakasama niya o nadidikit sa pangalan niya.

Mahilig dumalo si Kiera sa mga pagtitipon kung saan mailalabas niya ang problema niya sa pagsasaya, hindi niya naman siniseryoso ang mga lalaking nakakasama niya dahil isa lang ang nais niyang makapansin sa kaniya.

Iyon ay si sir Grimm na walang ginawa kung hindi bumuntot sa prinsesa na siyang kaibigan niya, at kahit na naakit na ni Kiera ng kagandahan niya ang crown prince ay wala pa rin siyang pakialam dito dahil nakatuon lang siya sa lalaking iyon.

Pero ngayon na narito na ko sa katawan ni Kiera, pansin ko na mukhang mas may malalim pang dahilan kung bakit si sir Grimm lang ang nais niyang makuha.

Hindi sa totoong mahal niya ito o ano pa man, bagkos dahil sa nais niyang makuha kung ano ang mayroon ang kaibigan niyang si Diana.

Totong humahanga siya kay sir Grimm pero nung malaman niyang gusto rin ito ng kaibigan niyang si Diana ay nais niya nang makuha ang binata dahil sa takot na baka pati ang lalaking na gugustuhan niya ay mapunta sa kaibigan niya, isama pa ang inggit at pagnanais niyang malamangan ang kaibigan kahit na sa isang aspeto lang, iyon ay ang makuha niya ang pagtingin ni sir Grimm.

"Pero bigo ang gaga," bulong ko sa sarili ko habang nakatunganga sa labas ng bintana at pinagmamasdan si sir Grimm na rumuronda sa loob ng palasyo.

Kung na riyan ka pa rin sa loob ng katawang ito Kiera, pasensya ka na dahil hindi na kita matutulungan sa kagustuhan mong makuha si sir Grimm.

Dahil ako 'tong isa pang gaga na nahulog naman sa lalaking dapat ay kay Diana. Napailing na lang ako at tumingin kay Viggo na nakaupo lang din sa harapan ko at may hawak na libro.