『Unicode』
《ရေသန့်ဘူးအဖုံးတောင်မဖွင့်နိုင်ဘူးတဲ့》
" အားလုံးအသင့်ပြင်ထား ၊ ထျန်းချုံတပ်ဖွဲ့ ၇ ၊ ၁၃ခုမြောက် Aအဆင့်မစ်ရှင် ၊ ထွက်ခွာမယ် !"
အမျိုးသားအသံ ခပ်နိမ့်နိမ့်က ကျစ်ယွီရှီ၏နားထဲ ဝင်ရောက်လာသည် ။
ထိုအသံက သူ့အသိစိတ်ကို ဖြတ်သန်းကာ သူ၏ အကြားအာရုံကြောများအား ထုံထိုင်းသွားစေ၏ ။
[သတိပေးချက် ! သတိပေးချက် ! သင်သည် သတ်မှတ်ထားသော ဦးတည်ချက်မှ သွေဖီနေပါသည် ! သင်သည် သတ်မှတ်ထားသော ဦးတည်ချက်မှ သွေဖီနေပါသည် ! ]
အာကာသယာဥ်အတွင်း အရေးပေါ်အချက်ပြမီးက အဆက်မပြတ် လင်းလိုက်မှိန်လိုက်နှင့် သူ့ရှေ့မှ ထုတ်ချင်းဖောက်ဘောင်ကွက်သည်လည်း ဆက်တိုက် တဖျတ်ဖျတ်ဖြစ်နေ၏ ။
အဖြူရောင်အလင်းတန်းက သူ့ရှေ့တွင် မှိတ်တုတ်မှိတ်တုတ်ဖြစ်နေပြီး ထို့နောက်တွင်တော့ ကျယ်လောင်စူးရှသော အချက်ပေးသံကို ကြားလိုက်ရသည် ။
[တရားမဝင် ရွှေ့ပြောင်းခြင်းကို တွေ့ရှိရသည် ! ]
[တရားမဝင် ရွှေ့ပြောင်းခြင်းကို တွေ့ရှိရသည် ! ]
တစ်ခုခု လွဲချော်နေ၏ !!
ကျစ်ယွီရှီသည် အံကိုကြိတ်လျက် အရေးပေါ်ခလုတ်ကို နှိပ်ရန် ထပ်တလဲလဲ ကြိုးစားလိုက်သည် ။ သို့သော် ယာဥ်ငယ်က မရပ်မနား ကြမ်းရမ်းစွာ လည်ပတ်ယမ်းခါနေ၏ ။ သူသည် အပြင်သို့ လွင့်ထွက်မနေအောင် ထိုင်ခုံလက်ရမ်းကို အားကုန်သုံးပြီး ဆုပ်ကိုင်ထားရုံသာ တတ်နိုင်သည် ။
ရာစုနှစ်တစ်ခုမျှ ကုန်လွန်သွားသကဲ့သို့ ခံစားရပြီးသည့်နောက် အာကာသယာဥ်သည် တဖြည်းဖြည်း ငြိမ်သက်လာသည် ။ ကျစ်ယွီရှီသည် ယာဥ်ငယ် လုံးဝရပ်တန့်သွားသည်နှင့်တစ်ပြိုက်နက် စက်ရုပ်လက်တစ်ဖက်က ပေးလာသော အာဟာရဖြည့်စွက်ရည်ကို အမြန်ဆွဲယူကာ တစ်ကျိုက်တည်း မော့ချလိုက်၏ ။ ဖြည်းဖြည်းချင်း ပြန်သက်သာလာရန် ဆယ်စက္ကန့်ကျော်မျှ အချိန်ယူလိုက်ရ၏ ။
နေပါအုံး......
ဘာကြောင့် ဒီမြင်ကွင်းကို.... မြင်ဖူးသလို ခံစားနေရတာလဲ ?
YOU ARE READING
မြူနှင်းငွေ့ [အဆုံးမဲ့]『မြန်မာဘာသာပြန်』〘Completed〙
Science FictionTitle: Mist[Unlimited] 薄雾[无限] Author : Wei Feng Ji Xu 微风几许 Status : 103 chapters + 3 extras (Completed) Genres : Action , Mystery , SciFi This is just a fan translation work ! I do not own this story