ထက်နောင်တို့လိုက်ပါလာသည့် တုတ်တုတ်ကလေးက တောင်မကြီးသို့ ဦးတည်ထွက်ခွာနေလေပြီ။
အညာနွေ၏လမ်းကား ဖုန်မှုန့်များဖြင့် ထောင်းထောင်းထနေ၏။
အညာဒေသ၏ပြယုဂ်ဖြစ်သည့် ထန်းပင်ကြီးများကလည်း မြင့်မြင့််မားမားဖြင့် လမ်းတစ်လျှောက်လုံး နေရာအနှံ့ ထီးထီးကြီးပေါက်ရောက်နေကြလျှက်...
ပုပ္ပားကား မိုးခေါင်ရေရှားသော အညာဒေသဖြစ်သည့်တိုင် နဂါးမောက်စိုက်ခင်းများအပြင် နှမ်းပင်များ၊ နွားစာပြောင်းခင်းများဖြင့် စိမ်းစိုနေလေသည်။
" နွေဦးကာလ မြူထသောအခါ၊
ရင်းထောင်ရင်းဆွဲ ဆောင်မြဲအိုးလွယ်ကာ၊
ဓားနှီးထက်စွာ ခါးမှာချပ်လျက်၊
ထန်းပွင့်ထန်းခိုင် ရွှန်းမြိုင်မြိုင်၊
ကလိုင်သာလွယ်လို့ တက်သည်နှင့်လေး။ "
လှပလွန်းသည့် ပတ်ဝန်းကျင်၏ဆွဲဆောင်မှုကြောင့်
သူတို့အားလုံး ဘေးဘီဝဲယာဆီ အကြည့်ရောက်နေမိကြခိုက် ရုတ်တရက် ထွက်ပေါ်လာသည်က ထက်ဝေအောင်၏ အသံပါပေ...
မားမားစွင့်စွင့်ရှိနေသည့် ထန်းပင်ကြီးများနှင့် သဘာဝမြင်ကွင်းကိုကြည့်ကာ ထက်ဝေအောင်တစ်ယောက် တက္ကသိုလ်ဝင်တန်းကဗျာလေးကို သတိရမိသွားပုံပင်။
ဝန်ကြီးပဒေသရာဇာ၏ ထန်းတက်သမားဘွဲ့ ကဗျာလေးနှင့် အညာနွေကား ပနံ့လည်းသင့်လှ၏။
သို့သော် ထက်ဝေအောင်က ထိုမျှသာဆိုကာ ရပ်တန့်သွားရာ စန်းစန်းဝေက အားမရဟန်ဖြင့်...
" ဟဲ့ ငဝေ ဆက်ဆိုလေဟ ဒီမှာ နားထောင်လို့ကောင်းနေတာကို "
စန်းစန်းဝေစကားကြောင့် ထက်ဝေအောင်က ခေါင်းကိုခပ်ဖွဖွကုတ်ရင်း ရယ်ကြဲကြဲဖြင့်...
" အဟဲ မရတော့ဘူးဟ ငါ အဲဒီအထိပဲမှတ်မိတာ "
" ငါရတယ် ငါရတယ် ငါဆက်ဆိုပြမယ် "
အသံပိုင်ရှင်ကား ဇင်မင်းထက်...
ဇင်မင်းထက်ကား စန်းစန်းဝေကို သဘောကျနေသူဖြစ်ရာ စန်းစန်းဝေ၏ အထင်ကြီးမှုနှင့် အာရုံစိုက်မှုကိုရရန် အမြဲကြိုးပမ်းနေသူပါပင်...
YOU ARE READING
ပုပ္ပားမြေမှ စံကားဝါ / ပုပၸားေျမမွ စံကားဝါ (Completed)
Romanceပုပ္ပားမြေမှ စကားဝါ ပင်လုံးညှာ ရွှေရောင်ဝင်းလေတော့ ကြူသင်းစွာ မွှေးရနံ့ရယ်(ကွယ်) နှလုံးသားအထိ...စွဲ။ တစ်စုံတစ်ယောက်က ပုပ္ပားတောင်ကလပ်အမြင့်ကိုမေးခဲ့ရင် ပေပေါင်း 2417မြင့်တာကို မျက်ကွယ်ပြုလို့ ပေ1500လို့ပဲ ကိုယ်ဖြေမယ် မင်းနဲ့တွေခဲ့တဲ့နေရာ... ချစ်မိခ...
