مهووس ميساء

part 32

كانت كالسة فالبيت وهي جامعة رجليها لعندها و ساهية فنقطة وحدة وهي كتفكر فحياتها كضيع من بين يديها و هي يلاه بادية حياتها شوية حركات راسها بالنفي و نطقات بهستيرية: لالا انا ميمكنش نبقا هنا
و خرجات كطير من البيت طلعات فالمصعد و نزلات حلات الباب ديال القصر و توجهات البوابة الكبيرة و هي كتفرك يديها بتوثر، يلاه بغات تخرج حتى كيوقفوها ليكارد
الكارد و هو حاني راسو: مدام ميمكنش ليك تخرجي و سي غالي معطاناش الإذن
ميساء حركات عينيها بتوثر و هي كتقلب على شي كدبة فالأخير حنحنات و نطقات: احم احم راه غالي هو لي قاليا خرجي
الكارد :ولكن الالة..
ميساء قطعاتوا: ما كين ما ولكن انا مغاديش نكدب عليك
و خرجات دغيا و غير فاتت القصر بشوية طلقات رجليها الريح و هي كتجري محاولة منها تخرج من ديك المنطقة لي كاين فيها القصر و هي كتجري شافت سيارة ديال غالي جاية بسرعة و كيف شافتوا شهقات و زادت فالسرعة ديال الجري و هي كتطلب الله يكون ماشافهاش ولكن تجري الرياح بما لا تشتهي السفن حيت هو لمحها و وقف لوطو بسرعة و نزل منها كيجري تجاها و هي كيف شافتوا وقف بدات كتجري بكل جهدها حتى كتحس بجلدة ديال راسها غطير من جرة لي جرها من شعرها حتى غوتات بألم: اييييييي طلق مني طللللللق
و بقا جارها من شعرها بدون مينطق حتى كلمة و كيف وصل الطوموبيل حل الباب الخلفي و لاحها فيه و سد الباب و طلع فمكان السائق و كسيرا بسرعة تجاه القصر لي مكانش بعيد من تما، و كيف دخل من البوابة الكبيرة حناو ليه ليكارد راسهم بإحترام من مورا محلو ليه الباب هو كيف دخل نزل من لوطو بسرعة و توجه لعند الكارد لي واقف حدا الباب و بدون سابق إنذار ضربوا بكروشي حتى داز ليه دم من نيفو و طاح فالأرض، و نطق غالي بجدية و نبرة مخيفة: حسابي معاكم هو اللخر
و توجه لعند ميساء لي كانت كترعد و حل الباب و جرها من مرفقها و هي كتبكي و كطيح و كتنوض من موراه لواحد اللحضة طاحت و مقدراتش تنوض و هو بقا جارها بدون ميكلف راسو يوقف باش يوقفها و بقا جارها و رجليها كيتجرحوا مع الأرض و هو ولا على بالو.
طلعها حتى البيتو و كيف حل الباب لاحها حتى جات طايحة قدامو و نزل لعندها و نطق بفحيح: مبغيتيش ديري عقلك ياك
ميساء طلعات فيه عينيها و نطقات بنبرة هادئة عكس دموعها لي كيطيحوا بغزارة: خليني نمشي فحالي عافاك انا مبغيتش نعيش هاكا مبغيتش نعيش فنضرك وحدة اخرى (كلسات حتى تقابلوا وجوهم و نطقات بهمس) انا ميساء مبغيتش نكون سهام
غالي عينيه حماروا و ميل فيها راسوا و وقف و هز واحد الڤاز لاحو حتى تهرس و نطق بالغوات و صوتو فيه بحة مميزة: شكوووون قااليييك اتكوني هي شكووووووون (توجه لعندها و شدها من فكها بعنف حتى وجها ولا قريب من وجهو) حيت الى كنتي هي ايكون مصيرك فحالها
ميساء طاحو دموعها و نطقات بخيبة امل: عمرك اتبدل ديما ايبقا عندك هنا (حطات سبابتها على قلبوا) قاصح و متقدر تبغي حتى شي حد
غالي عض على شفايفو و نطق بنبرة مستفزة: نتي معندكش الحق تقرري حيت هاد الساعة باقا داخلة لي لراسي نهار انمل منك راك اتمشي تقودي فحالك
ميساء غمضات عينيها و حلاتهم و نطقات بألم و نبرة كتقطع فالقلب: حشومة عليك علاش كل مرة كتبين ليا حاجة علاش مرة كتبان زوين و مرة كتبان خايب
غالي بملامح ممحية: توووء ازين انا مفيا حتى جانب زوين ( و عطاها بالضهر و خطى زوج خطوات حتى وقف و ضار عندها و عطاها تصرفيقة بيدو مقلوبة خلاها دوخ على القبلة و داز الدم من جناب فمها و نطق بحدة) هادي حيت حاولتي تهربي و كل مرة اديري شي حاجة مغتعجبنيش اتعاقبي عليها
و عطاها بالضهر و خرج، هي دموعها طاحو و غوتات غوتة كتعبر على الألم و الخذلان لي كتحس بيه: اااااااااااااااااع
غالي كان خارج حتى سمع الغوتة ديالها و نطق تحت سنانو: مضورش متمشيش لعندها هي كتستاهل هدشي اه هوما كاملين فحال فحال
و طلع فلوطو هارب من أفكارو و من محبوبتو لي هو كيبغيها بزاف و مهووس بيها ولكن مرضو كيتغلب عليه و كيجرحها ديما و كيعدبها و هي معندها حتى ذنب.
🦋🦋
كان داخل كيتمختر و هو كيلاوح رجليه حتى كيوقفو صوت انثوي رقيق: مبقيناش كاع كنشوفوك
طه ضار لعندها و بتاسم حتى تغمضو عينيه و نطق بمرح: سمية فين الحب
سمية عقدات حجبانها: الله يمسخك قول ماما فحال الناس
طه قلب عينيه بملل و توجه لعندها باس راسها: فحال سمية فحال ماما لي عارف انا هو عندي وردة وحدة هي سمية التوتة ديالي
....: هاداك الحتروف بعد ليا من مرتي ها عار الله
طه ضار لعندوا و توجه تجاهو و عنقو عناق رجولي: عاش من شافك المختار
المختار: تشوف العما كون كنتي كتجي الدار كون كتشوفني ديما
طه: راك عارف الواليد الخدمة مكتساليش
المختار: واش كيحساب ليك انا عايش فشي جبل راه خبارك واصلاني
سمية عقدات حجبانها و توجهات لعند طه و عنقاتوا جنب: بعد ليا من ولدي خليه على خاطروا
المختار: ضسارتك هي لي خلاتوا لور لور
طه: إيه إيه إيه بشوية بشوية اشمن لور لور الواليد راه يلاه كنت فتازة مشيت على شي خدمة
المختار ضرب ليه كتفو بجهد: هو هكاك كون راجل
سمية بتاسمات و نطقات بحنان: الله يخليك ليا ولدي ( و تنهدات بأسى) هاد الدار ما غادي تكمل فرحتها حتى غادي نلقى بنتي حبيبتي
طه هاد الموضوع حساس بالنسبة ليه داكشي علاش فضل ينساحب بهدوء و يطلع لبيتوا.
المختار عند سمية و نطق بحنان:انشاء الله انلقاو بنتنا احبيبة متخافيش
سمية بنبرة باكية حزينة: ديما قلبي كيتشوى المختار معارفة بنتي واش حية ولا ميتة لابسة ولا عريانة 16عام لي دازت و باقا الكية ديالها فقلبي
المختار ضمها ليه كثر و هو كيبوس راسها بحنان... سمية امرأة أربعينية ولكن مهلية فراسها بزاااف شعرها أشقر طويل و عويناتها خضرين و بيضة بفيم صغيور منفوخ و طاي مقادة لي يشوفها يقول العشيقة ديال طه ماشي ماماه.... المختار رجل خمسيني و حتى هو باقي شاد و بوكوص كاعما كتبان فيه خمسين عام و هو رجل اعمال مشهور عندو عدة شركات و داخل بشراكة مع غالي...

يتبع..
الكبيدات كنعتاذر على التأخير و تصبحون على خير ❤️🦋✨