مهووس ميساء

part 77

دخلات ابتسام و سمية لقاوها على حالها منهارة بالبكا و وجها البيص رجع حمر مزير مشاو عندها كيجريو مخلوعين.

سمية بخوف: بنتي مالكي علاش كتبكي كضرك شي حاجة.

ميساء هزات عويناتها الخضرين فسمية و نطقات بنبرة منهزمة كتقطع فالقلب: هئ هئ بغيت ماما علاش مجاتش عندي جيبو ليا هئ هئ ما ما.

ابتسام هزات عينيها فسمية لي بدورها شافت فيها و نطقات ابتسام محاولة منها باش تهدنها: راه فدار مبغيناش نخلعوها مسكينة باقي مفخبارها والو راك عارفة خالتي خديجة مريضة مبغيناش نزيدو عليها اولا.

سمية تنهدات تنهيدة من القلب كتعبر فيها على أحزانها و بنتها الوحيدة كتعيط المرا اخرى ماما بينما هي كتمنى تسمعها ولو مرة وحدة من فم بنتها.

ميساء زادت فوتيرة البكا و نفس كتقطع فيها: هئ هئ ه ه هو جا ل لعندي قبيلا هئ هئ هو مغاديش يبعد عليا هو مريض و غيمرضني معاه.

ابتسام عقدات حجبانها بعصبية: واش مريض هذا شوفي شنو داير فيها و مزال جاي لعندها.

سمية عنقات ميساء ضاماها لصدرها و نطقات بنبرة حنونة وهي كدوز يديها على راس ميساء: متخافيش ابنتي حنا معاك عمرنا غنتخلاو عليك.

تسمعو زوج طرقات على الباب الشي لي خلا ابتسام تنطق بصوتها الأنثوي الرقيق: دخل.

دخل طه ببنيتو الجسمانية ضخمة لابس تيشورت بيض و دجين كحل و سبرديلة بيضة كيبان وسيم لأبعد الحدود هاز فيديه بوكي ديال الورد الاحمر و بواط ديال الشكلاط.

عينيه الخضرين الجذابين مشاو نيشان الإبتسام طلعها من الفوق التحت عاد دور عينيه على ميساء لي ناضت من حضن سمية كتمسح دموعها.

شاف فوجها الصفر الشاحب لي عليه اثار ضرب باينين و عنقها الموشومة عليه سميتو بوضوح، زير عل البوكي ديال الورد بين يديه بعصبية و تقدم بخطوات موزونة باس راس مو و تقدم عند ميساء ناطق بصوتو المبحوح المميز بنبرة حنونة: سمعت شي اميرة هنا مريضة و جيت نشوفها.

ميساء شافت فيه بإستغراب من كلامو جاها غريب حيت عمرها هضرات معاه كانت كتشوفو فاش كان كيجي عند غالي ولكن عمرها كان عندها معاه شي تواصل، بتاسمات ليه ابتسامة صغيرة و نطقات بخجل: شكرا .

مد ليها الورد و الشكلاط لي خداتهم مبتاسمة و نطقات بإحترام و برائة: الله يخلف عليك .

طه بتاسم ابتسامة بالكاد كتبان من لطافتها و هز عينيه فإبتسام لي كانت بضورها كتشوف فيه دار ليها بعينيه بمعنى تبعيني، قبل ميخرج شاف فميساء و نطق: الله يشافيك.

ميساء:امين.

خرج و سد الباب من موراه و ابتسام نطقات وهي كتحك فوق حاجبها بتوثر: غنمشي نشري شي عصير بغيتو شي حاجة.