مهووس ميساء

part 51

حطو تواب فالروض و كملو حتى فرانا قدام واحد البناية كبيييرة و فخمة... ميساء هزات عويناتها الخضرين كضورهم على المكان حتى لمحات فأعلى البناية مجموعة مدارس زنيبر، دورات راسها لعندو بالزربة و نطقات بتساؤل: واش هاد المدرسة ديالك ... غالي نطق وهو كيلعب ب الموسطاش ديالو: شنو بان ليك ... رجعات هزات راسها فالمدرسة و ضحكات بصوت و نطقات متحمسة وهي جامعة يديها لعندها: يااااي الباك مضمون ب 19 ... غالي خنزر فيها وحيد سمطة: لي جبتيها اتاخديها و تجيبي شي نطقة ماشي هي هاديك انسلخ ملتك ... ميساء ميلات شفايفها و جابت يديها قدامها كضور عويناتها حتى حل ليها الباب و هبطات، و هو اعيونو سقرية كيضورو كيشوف واش شيحد كيشوف فيها و ياااويل يلقى شي حد كيشوف فيها هاديك لخرا ليه ... شد فيدياتها الصغار بين يديه الكبار و جرها كيتمشى معاها فنفس ريتم ديالها وهو عاقد حجبانو و كيتمشى بعجرفة و كيبان مهيب بزاااف مكتقدرش تكمل فيه شوفة ... دخل مع الباب و الحارس لي تما حاني راسو بإحترام و غالي مشافش فيه كاع ، دخلو و دازو على الساحة لي كانت عامرة بحكم ديك ساعة كانت استراحة ديال العشرة و ميساء كتشوف بعويناتها كيبانو ليها غير ولاد الفشوش ولي تزادو بملعقة من ذهب ففمهم لما لا و ديك المدرسة كيقراو فيها غير شكون و شكون و ولاد ناس كبار فالبلاد... كلشي كان كيشوف فيهم و كيتسائلو شكون هادي لي مع مالك المدرسة و لي تقريبا فنفس عمرهم ... ميساء دازو على مسمعها واحد رباعة ديال البنات كيدويو... البنت الأولى و هي عاضة صبعها بإغراء: ياختي شحال طويل و مكضر ... البنت الثانية: شوفي عينيه كيفاش ديرين و فمو غير ديال البوسان ولكن منعرف شكون هديك العوجة ... البنت الثالثة كانت شادة الطيليفون هزات عينيها فميساء و رجعات نزلاتها: معندكم متقولو البنت فنة ... البنت ثانية خنزرات فيها ، ميساء سمعات كلشي و بحركة لا إرادية هزات يديها الخرا و حطاتها على دراعو بتملك هو نزل عينيه ليدياتها الصغار لي على دراعو و طلع عينيه لوجها لي كان حمر و كتشوف فيه عاقدة حجبانها فحال دراري الصغار ... غالي عقد حجبانو وهو كيشوف فيها قريبة تبكي: مالنا... ميساء كانت خاصاها غير السبة ميلات شفايفها و نطقات بطفولة: نتا ديما كتحكر عليا غير انا و كتلبسني هادشي مشفتيش راسك كلك كتبان البنات كيشوفو فيك... غالي بتاسم بجنب و جرها من خصرها و نطق فودنيها: كتغيري لمك ... ميساء خدودها توردو و نطقات بهمس: ويلي طلقني ناس كيشوفو فينا ... غالي دور عينيه على الساحة لقا كلشي حاضيهم و بشوفاتو خلاهم كلهم يحنيو راسهم و نطق بصوت مبحوح: يشوف لي بغا يشوف لي عندي مو يدي يديها مكنتسوق لتا زامل انا ... ميساء هزات فيه عويناتها: ملي اتجيبني المدرسة علاش مجبتش كتوباتي ... غالي : جبتك غير تشوفيها و ضربي فيها ضويرة حتال السيمانة جاية و بداي القراية ... ميساء هزات راسها بالإيجاب وهي مبتاسمة وعينيها كيلمعو .

ضرب بيها ضورا فالمدراسة كاملة وهي عينيها ايخرجو منهم القلوبة عجباتها بزااااف و ولات كتبان ليها ليسي ديالها القديمة فحال شي خربة حيت هاد المدرسة مجهزة بمعنى الكلمة... سالاو و خرجو ركبو فالطوموبيل و كسيرا موقف حتال قدام القصر ميساء يلاه بغات تنزل وهو يجرها من قرفادتها ... غالي مميل راسو فيها: منسيتي والو ... ميساء ببلاهة:لاء والو ... غالي جرها بايسها من فمها بشغف وهو كيجر شنايفها بشوق كل مرة كيبوسها كيحس فحالا اول مرة و كيتنشوا بشفايفها لي جامي داق فحالهم ... فصل القبلة فاش حس بيها سخفات و نطق بصوت مبحوح و غمزة: شبانليك نجربو الحوية د طوموبيل ... ميساء خرجات عينيها بخجل و سلتات منو نازلة من طوموبيل غادة كتجري وهو ميت بالضحك موراها من ردة فعلها حس براسو تخنق شوية و جبد الڤونطولين بخ زوج بخات حتى حس براسو مزيان و كسيرا نحو وجهتو المجهولة.

دخلات ميساء سخفانة و نيشان دخلات عند البنات لي كانو مشغولين ... دخلات وهي مبتاسمة: البنات لاباس عليكم ... ابتسام كانت كتستف الديسير فتلاجة و نطقات وهي يديها خدامين: فين الصاحيبة توحشناك ... ماجدة غمزاتها بمكر: فين مشيتي على صبيح نتي و الزوج الكريم شي خرجة رومانسية ... ميساء حنيكاتها توردو: اشمن رومنسية الله يهديك ... اية طلعات فميساء و نزلاتها و نطقات بغل:صباحاتو الله... ميساء هزات فيها حاجبها و حطات يديها على نصها جامعة الكسوة لعندها حتى بانو سيقانها البيضين، وقفة مشرملة بمتياز و نطقات بصوت عالي شوية: يصبحو عليك انشاءالله سبعة، تلاتة شفارة و ربعة مخارة مالك اختي كدخليني دخلات صيييك اه راه ثاني مرة كتجبديني و كنسكت ليك ... اية كانت خاصاها غير سبة و ميقات فيها كطلق فسمها: شكون داها فيك ولا تسوق ليك ايحساب ليك تزوجك السي غالي راه وليتي هاي كلاس راه يمل منك و يلوحك التوش ... ابتسام و ماجدة عياو يخنزرو فيها تسكت و والو حنى نطقات ابتسام مكززة على سنانها: سكتي باراكة سدي فمك ... ميساء بنفس النبرة لي نطقات بيها فاللول: لا غير خليها نبرد ليها قلبها ، المهم تزوجني ماشي كنضور بيه فحالك و ممعبرنيش و الحمدالله مزوجة بالحلال مقحبنا مدلاو علينا قلاوي و راه نهار باقا تجبديني غادي تشوفي معايا الأواخر راني جلاخة ... اية بقات كتمص الحامض و رجعات لخدمتها اما ماجدة قربات عند ميساء وهي كتخنزر ف اية: مديش عليها اختي ميساء طلعي طلعي ترتاحي ... ميساء تمشات خارجة: اوا الله يعميها لشي بعضين ... توجهات الأسانسير و طلعات لبيتها هي و غالي غير حلات البيت وهي ضربها ريحتو لي كتحمقها، غمضات عويناتها و طلعات شهيق من أعماقها و دخلات الدريسينك بدلات حوايجها ب بيجامة بياسة وحدة حد الركبة و خرجات شعلات التلفازة دايرة نيتفليكس و الشيبس فيديها كتنقب منها ... بقات على داك الحال حتى جاها الملال و هي تخرج البالكون كلسات فيه و البرد كيطير زغيبات متمردة من شعرها ... كلسات مكيمشة فراسها وهي كتشوف لبعيد للحضة تفكرات ماماها لي عمرها نساتها ولكن مكتبغيش تبين ضعفها، طاحت دمعة من عينيها و تبعوها بزاف ديال الدموع حتى تحول داك الصمت لشهقات صغار فحال ديال القطوط ... كانت على نفس الحالة حتى كتحس بشي شفايف سخان فوق عنقها غمضات عويناتها و ناضت واقفة على صبيعات رجليها و مشات معنقاه من كرشو كتشهق و تبكي لدرجة نفس تقطعات فيها ... غالي عقد حجبانو و عينيه حمارو وهز ليها راسها لعندو و نطق بقلق: مالكي واش شيحد دارليك شي حاجة واش قلقك شي حد ... ميساء حركات راسها بالنفي ، هو نطق بإنفعال: و مالك علاش كتغبني ... ميساء لهضرة بزز كتخرج ليها: هئ هئ توحشت هئ هئ ما ما ... غالي هزها من خصرها حتى خشات راسها فعنقو مفزكة ليه التيشورت و كلس فوق الفوطوي لي فالبالكون و حطها فوق رجليه و هي مكيمشة فيه فحال البيبي و نطق وهو كيدوز يديه على شعرها الأشقر الحريري: شووووت علاش البكا ماماك اتولي بيخير ... ميساء هزات فيه عويناتها الخضرين لي دابا ولاو حمرين ولاو كيبانو فحال شي حديقة مُحترِقة و نطقات بطفولة: واش بصح ... غالي هز راسو بالإيجاب وهو كيبعد الشعر على عينيها: اه مالي انا عمرني كدبت عليك اممم ماماك اتولي بيخير و قريب انشاء الله ( و عقد حجبانو و نطق بحدة: و نهار نلقاك كتخنني بدون سبب ديك ساعة انخلي دار عشتك و ندير ليك علاش تبكي ... ميساء ميلات شفايفها يلاه بغات ديماري عوتاني و هو ينطق بنبرة مخيفة بصوتو المبحوح: قطعي حسك ... ميساء عضات شفايفها حابسة البكية و حطات راسها على صدرو كتضور عويناتها.....

يتبع....
⭐ متنساوش