مهووس ميساء

part 50

كانو جابو ليبليزير ديالهوم و ميساء سخفات و جاها واحد النعاس خيالي... دوشو هو وياها دغيا و خرجها ملوية ففوطة نص د صدرها باين و ترمتها حتى هي و هو ملوي فوطة على خصرو... خرج هازها بين يديه و هي حاطة راسها على صدرو كتليبد فعويناتها حطها فوق السرير جات جالسة مربعة رجيلاتها و كتلعب بيديها و مشا زاد فدرجة الحرارة ديال الغرفة باش ميضربهاش البرد و دخل الدريسينك جاب دوبياس كحلين و كسيوة كحلة طويلة و كتجي واسعة و سبرديلة بيضة ... خرج من دريسينك خلاها كيفما لقاها يلاه بغا يحيد ليها الفوطة وهي تزير عليها بخجل وهي كتشوف فيه بعويناتها فحال القطة كيلمعو: عافاك غير خليني نلبس بوحدي ... حرك راسو بالإيجاب و عطاها بالضهر، غادي داخل الدريسينك حتى سمعها كتنكر و هو يضور عندها هاز حاجبو : مالنا... ميساء ميلات شفايفها و شافت فيه مقلقة: حرام عليك شهاد الكسوة جايب ليا ديال العيالات الكبار راه انلبسها مغنبقاش نبان ... خنزر فيها و نطق بحدة حتى حنات راسها كتشوف فيديها:ونتي لاش باغا تباني اممم غتلبسي داكشي ولا انصمك مك شنو بغيتي نخرجك مزيرة على ترمتك يزهاو عليك الزوامل (وهز فيها صبعو بتحذير) انا داخل نبدل نسمعك زدتي شي كلمة انخرج انفلعص بنتي ... و عطاها بالضهر داخل الدريسينك غير شافتو دخل وهي تنطق بصوت مغبن: حكار كيداير ... حيدات الفوطة و لبسات الدوبياس و تبعاتهم الكسوة لي جاتها عريضة ولكن انيقة ... لبسات سبرديلتها و مشات قدام الكوافوز دهنات وجها و يديها و سيقانها بكريم و دارت عكر غوز خفيف و صافي رشات ريحتها الخفيفة و كيف كملات لمحاتو خارج من دريسينك لابس تيشرت كحل و سروال دجين مقطع من الركبة و سبرديلة نايك كحلة و ماكانة فيديه و ريحتو كتشم من منين و منين و الوشامات لي فيدو عاطينو جمالية كثر ... هز فيها عينيه مسكانيها من رجليها حتال راسها و كيف وصل لفمها وهو يعقد حجبانو و قرب عندها بهدوء هز ليها راسها من ذقنها و هي غير كضور فعويناتها و جرها من خصرها لعندو بايسها من فمها كيدخل شنايفها بجوج ففمو بلهفة مطلق منها حتى تأكد من العكر تمسح و يلاه بغا يبعد و هو يعضها فشنافتها التحتانية حتى نطقات انين خفيف فحال القطة ... و شاف فعينيها نيشان لي كانت مخرجاهم مفاهمة والو و نطق بصوت مبحوح: فمك زوين بلا هاد القلاوي ... و جرها من يديها مخلاش ليها الفرصة فين تستوعب هضرتو و حل الباب متوجه بيها الأسانسير و هو كيتمشى خطواتو الكبار مع خطيواتها هي الصغار لي الى شفتيهم من بعيد اتبان ليك هي فحالا كتجري ... نطقات بصوت صغيور كيوت: بشوية عليا اويلي راني عيت ... غالي ضار عندها و هو باقي شاد فيديداتها و غمزها و هو كيطلعها و ينزلها: كان كيحساب ليا معندكش السوفل غير فالحوا صدق فكولشي ... ميساء غرقات فحوايجها و حنات راسها حشمانة و هو رجع كيتمشى ولكن ماشي فحال اللول خفض شوية السرعة ... ضغط على الزر و تحل الأسانسير و هو باقي شاد فيديها و هي سهات فيه و فواحد الوشمة فعنقو على شكل تاج و قربات منو حاطة يديها فوق منها حتى بورشاتو بلمساتها و نطقات بتساؤل: واش هاد الوشامات كلهم محرقوكش فاش بغيتي ديرهم ... غالي ضور وجهو لعندها عينيه معسلين و مطق بصوت مبحوح: تجربي ... ميساء دغيا جرات يديداتها لعندها و حركات راسها بالنفي وهي عاقدة حجبانها ... تحل الباب ديال الأسانسير و خرجو منو بزوج متوجهين الصالة مونجي لي كانت كالسة فيها عطاء المعري كثر من المغطي كيف العادة و نرجس انيقة كيف ديما و تواب كالسة كتشرب الحليب و طوسط بشكلاط ... تواب كيف لمحات باباها ناضت عندو كتجري كتعلق فيها يهزها و كيف هزها تلاحت عليه معنقاه و نطقات بطفولة: بابي توحستك ... غالي باسها فراسها: حتى انا ابنتي ... تواب قابلات وجها مع وجهو و نطقات عاقدة حجبانها: وعلاس مكتزيس تسوفني... غالي: كنجي معطل ونتي كتكوني ناعسة ... نطقات ميساء وهي مربعة يديها بطفولة:وانا فين نسيتيني امممم ولا كتشوفي باباك كتقلبي عليا وجهك ... تواب كيف لمحات ميساء بدات كتنتر بغا تمشي لعندها غالي قرب عند ميساء و عطاها تواب لي بدات كتبوس فيها و كتهضر معاها هضوراتها البريئة ... اما نرجس و عطاء كانو كيلمحوهوم بالشر كون كانو عينيهم قرطاس كون تيراو فيهم ... مشا غالي كلس مترأس الطابلة و ميساء حداه من جيهة الخرى و تواب حدا ميساء ... نطقات عطاء وهي كتشوف فميساء ببتسامة مزيفة: حبيبة لاباس عليك ... ميساء بتاسمات ليها: الحمدالله... ميساء كانت كتاكل كيك بشكلاط و كاس ديال الحليب اما غالي مكتافي بقهوة كحلة مركز عينيه على نرجس و عطاء لي نضراتو وتروهوم و نطق وهو عاقد حجبانو: شفتكم ولفتوها ... نرجس هزات فيها عينيها كترمقو بعدم فهم: مفهمتش اولدي ... غالي رشف من قهوتو: مبغيتوش تمشيو تقودو باراكة راه معنديش اوطيل المامونية هنايا كلستو رتاحيتو اوا قودو ... عطاء شربات من الكاس ديال العصير بإحراج اما نرجس كون لقات الأرض تشق و تبلعها و نطقات نرجس مفقوسة: دابا كتجري علينا ... غالي غمزها: جبتيها لاسقة... اما ميساء شبعات فيه قريس من تحت طابلة وهو يضور فيها بحدة: دخلي سوق كرك نتي شدخلك ... ميساء دخلات سوق راسها و كملات فطورها فصمت ... اما نرجس جمعات الوقفة و نطقات وهي الغصة فحلقها: واخا اولدي يكون غير خاطرك سيمانة جاية انمشيو ... كملات هضرتها و توجهات الأسانسير طالعة لبيتها ... اما عطاء باقا كالسة كتضور عينيها و ساهية فغالي ... غالي كمل قهوتو و ناض واقف طرطق عنقو و وجه هضرتو لميساء: كنتسناك برا ... حركات ميساء راسها بالإيجاب و كملات فطورها دغيا و بقات كتسنى تواب تكمل... عطاء بقات متبعة ليه العين غير شافتو خرج و هي تبعو كتلوا... خرجات لقاتو واقف متكي على طوموبيلتو رونج روڤر ڤيلار كحلة كتلمع... وقفات عليه و هو يهز فيها عينيه بلا مبالاة و عاود نزلهم و نطقات بصوت محلون: صاڤا غالي ... غالي نطق وهو باقي حاني راسو فتيليفون: صاڤا الي مشفتش كمارتك ... صرطات القمعة و لبدات عينيها كي دودة القز و رمات يديها الصغيرة لي فيها ضفار طوال حمرين و حطاتها على كتفو مع هاد اللقطة كتخرج ميساء شادة فيدين تواب لي سالات فطورها و لابسة كسيوة غوز و سبيبيط فنفس اللون ... عينيها متحركاتش من على يديها لي فوق دراعو عينيه غرغرو و حسات بالغصة فحلقها خانقاها ... زيرات على يدين تواب بين يديها حتى سمعاتها نطقات بألم: ايييي كضريني ... ميساء رخفات ليها على يديها و ضورات وجها لعندها و نطقات بتأسف: سمحيليا احبيبة سمحيليا مرديتش البال ... غمضات عينيها و عودات حلاتهم و تمشات تيجاهو حتى وقفات عليهم و بدون سابق انذار حيدات يدين عطاء بلطف و حطات يديها على دراعو فنفس البلاصة لي كانت حاطة فيها يديها عطاء و نطقات وهي هازة حجبانها موجهة كلامها لديك اللفعة لي وجها تلون قدامها: حبيبة بغيتي شي حاجة ... عطاء طلعاتها و نزلاتها بحقد و حركات راسها بالنفي و مشات كتزرب فالمشية و هي كتقيس عنقها بطريقة هستيرية... غالي نزل عينيه ليديها لي على دراعو و هو مبتاسم كيف شافتو كيفاش كيشوف فيها و هي تحيدها و نطقات بتلعثم: احم تواب اتعطل على الروض ... حلات الباب اللور و هزاتها حطاها وهو متبع العين لكل حركة كديرها و يديها لي كيرجفو ... طلعات حداه القدام وهي مرتابكة و حتى هو تبعها راكب فبلاصت السائق و كسيرا بسرعة....

يتبع....

ڤوط البنات متنساوش 🖤