ဖဝါးထက်က ပုလဲသွယ် (Complete)

ဖဝါးထက်က ပုလဲသွယ် (၂၇)

Translation of Pearl In The Palm.

ဖဝါးထက်က ပုလဲသွယ် (၂၇)

Translator - Jinnie Grace

________

အိမ်ပြန်ရောက်တော့ သူမကောင်းကောင်း အိပ်ခဲ့ရသည်။ ပုံမှန်ဆို သူမ အများကြီး တွေးလေ့မရှိသော်လည်းအခုတော့ သူမ ထိုအကြောင်းကိုပဲ တွေးတောနေမိတော့သည်။

တိရှောင်းက သူမဖူးစာရှင်ဟု သူမထင်နေမိသည်။

တိရှောင်းက သူမနှင့် နှလုံးသားချင်း နီးစပ်သည်ဟူ၍လည်း ခံစားနေရ၏။ တကယ်တော့သူမ ယောကျာ်းများများစားစားနှင့် မတွေ့ဖူးသော်ငြား တွေ့ဖူးသည့်သူများကိုလည်း မချစ်သလို ဘာခံစားမှုမှလည်းမရခဲ့။

သူမနိုးလာတော့ ခါတိုင်းထက် ခွန်အားပိုပြည့်နေသည်။ မနေညက ဘာအိပ်မက်ဆိုးမှ မမက်သည်မို့ ပိုမိုလန်းဆန်းနေ၏။

တိရှောင်းနှင့်ထိတွေ့ရတာ သူမခန္ဓာကိုယ်အတွက် အများကြီးကောင်းသည်ထင်သည်။

တိရှောင်းထွက်သွားမှာကိုတော့နှမျောပေမဲ့ပေါ့။

ယဲ့လီကျူးက ပုလဲလုံ‌လေးများကို ဖန်ပုလင်းထဲထည့်ရန် ပြင်နေသည်။ ပုလင်းလေးက သူမလက်ဖဝါးပေါ်တွင် ရှိနေကာ ကြည်လင်နေ၏။ ဒီပုလင်းလေးပြည့်လျှင် ဆောင်းရောက်လောက်ပြီဟု သူမ တွက်ထားသည်။ နှစ်သစ်ကူးဆို တိရှောင်းပြန်လာမည်မဟုတ်ပါလား။

သူမထိုနေ့အထိ အသက်ရှင်ဖို့တော့မျှော်လင့်မိသည်။

နောက်တစ်ပတ်လောက်အကြာတွင် ယဲ့အိမ်တော်သို့ ဧည့်သည်များ ရောက်လာကြ၏။

ယဲ့လီကျူး၏ တတိယဦးလေး၏သမီးဖြစ်သူက မြို့တော်သို့ မင်္ဂလာကိစ္စနှင့် လာမည်ဖြစ်ကာ သူမဒေါ်လေးကျွင့်ကိုပါ ခေါ်လာမည်ဟု ယဲ့ဖူအန်းကတစ်ခါပြောဖူးသည်။

အစကတော့ တစ်ခုခုမှားနေသည်ဟု သူမထင်မိသည်။ သို့သော် ဝူသခင်မက သူမမိခင်အရင်းမဟုတ်သူမို့ သူမကို သမီးအရင်းလိုတော့ သေချာပေါက် ချစ်နိုင်မှာမဟုတ်ပေ။ သူမ၏အဘွားကလည်း ထိုမိန်းမယုတ်မာကာ မြေးမလေးကို ဒုက္ခပေးမှာကို စိုးရိမ်နေသည်။

ဒုတိယအချက်ကတော့ မမရန်၏လက်ထပ်ပွဲကိစ္စ ဖြစ်သည်။

ကျင်းမိသားစုက မြို့တော်တွင်လည်း အိမ်ရှိသလို ဝမ်ကျိုးတွင်လည်း မြို့မျက်နှာဖုံးများ ဖြစ်ကြသည်။ ထို့အပြင် ကျန်းမိသားစုက အလှလေးတွေ ပေါများပြီး ယဲ့လီကျူးအမေကျန်းသခင်မဆိုသည်မှာလည်း ဝမ်ကျိုးတွင် အလှဆုံးမိန်းကလေး ဖြစ်ခဲ့သည်။